Read igala E̩wñ kʼAme̩nukpuche̩ Che 23 Bible Online

E̩wñ kʼAme̩nukpuche̩ Che 23 - igala bible

E̩wñ kʼAme̩nukpuche̩ Che 23

¹Taku Po̩l kejurʼabo̩hiala le̩ chii, i kakini, Amo̩maye-mi aboke̩le̩, omi te̩te̩do̩mo̩ ache e̩wñ-mi, akone̩ o̩la ki dʼe̩do̩-mi kpʼumi abi o̩gba O̩jo̩ n, gbogbo tʼojolu eñini-i.

²Tak Ananaius, agboji amatama ñwa ñw abo ku ma dago kpenyʼu ku ma fʼo̩wo̩ fiʼo̩ alu.

³E̩gbale̩ Po̩l ka ñw u kakini, O̩jo̩ ache kʼi fʼo̩wo̩ fiʼuwe̩, uwe̩ o̩do̩ ku ma dʼafu kurʼu! kʼuwe̩ la gugu kʼe̩ kajo̩ mi alu kʼo̩lo̩da ka, oñ e̩ je̩ ñw ma fʼo̩wo̩ fio̩ mi alu kʼo̩lo̩da ma ka n?

⁴Tak abo ku ma dago kpenyʼu kakini, E̩ bʼagboji amatama ina?

⁵Oñ Po̩l kakini, Amo̩maye-mi, u ma kʼagboji amatama de̩ n: Todu i che̩ko̩tane̩ kakini, E̩ ki kʼe̩wñ e̩bie̩ne̩ nyʼagboji amone̩-we̩ n.

⁶Oñ abu ku Po̩l chema ka kʼo̩wo̩ʼka-ma che Sadiusi, kʼo̩wo̩ ekeji-ma la che Farisi, i kwa ef unyi o̩hiala le̩ kakini, Amo̩maye-mi, aboke̩le̩, omi che Farisi, o̩ma Farisi u che̩, tod o̩la ibekono kpʼo̩la e̩dajikwane̩ kwef abo ki ku oñ ma kajo̩-mi-i.

⁷Oñ abu kʼi fʼe-kide̩ ka, i chʼaro̩ te̩ ñw amaFarisi kpʼamaSadiusi, tak ugwe̩ko̩ amone̩ le̩ kpe̩reji.

⁸Todu amaSadiusi ka kʼudajikwane̩, tʼe-onuche̩ O̩jo̩, tʼe-afu do̩mo̩ n. AmaFarisi muda gbalu ka kʼejeji-wñ do̩mo̩.

⁹Tak i mud ukwa lile lile jo̩, oñ abu kʼamako̩takada iche̩ka e-o̩wo̩ amaFarisi kwane̩ dago ma chane̩ ejuja kakini, A li e̩wñ e̩bie̩ne̩ du o̩la e̩ne̩ kide̩ n; iche̩wñ kʼafuʼka abe̩k onuche̩ O̩jo̩ ko̩la ñw u fa?

¹⁰Oñ abu kʼi mud aro̩ lile jo̩ onu ogu kwodejiji tode̩gba ku ma fu Po̩l fana rinyo̩, i je̩ ñw amisoja mugwo̩ru nyʼo̩mo̩ ku ma mu Po̩l dinya kwʼalumeji ku ma mʼu du wʼef aku.

¹¹Oñ odu o̩jo̩ le̩ Ondu wa banʼowñ, oñ Ondu kakini, Fʼe̩do̩ ne̩, todu lu kʼe̩ gbibenu e̩wñ o̩la-mi Je̩rusale̩m nyo̩nyo̩ abe̩le̩ e̩ ñʼagba Rom chuu.

¹²Oñ abu kʼo̩jo̩ muñwa, amaJu fʼalu-ma jo̩ ma fʼe̩bo̩ kpe nʼo̩la-ma ka ku ma aje̩ n, ma añmo̩ n, gbogbo tʼe̩gba ku ma fu Po̩l kpa.

¹³Abo ku ma la jʼalu o̩la le̩ tʼone̩ o̩gbo̩ meji le.

¹⁴Taku ma lewa ugbo amagboji amatama kpʼabogijo, ma kakini, A fʼe̩bo̩ kpe nʼo̩la-wa kakini, A dʼe̩wñ du chalu n gbogbo tʼe̩gba kʼa fu Po̩l kpa.

¹⁵Todule̩ ame̩ kpʼabo̩hiala mʼinabali duwa ñw onu ogu fa-i kʼi mʼowñ du gwo̩ru wa ñw me̩ dabe̩ne̩ ku me̩ che kume̩ gwili e̩wñ o̩la-wñ o̩bio̩bie̩; o̩la-wa la che̩mu kʼa fʼu kpa o̩gba tak i me̩ro̩mo̩.

¹⁶O̩ma o̩maye Po̩l onobule̩ muda gbo̩ ku ma kpala jʼanede-wñ, i lewa oñ i mugudu tef aku oñ i mʼu duka ñw Po̩l.

¹⁷Taku Po̩l fʼagboji uche̩ amisoja ogume̩luʼka do̩ wa, kakini, E̩ mʼokolobia kide̩ du nyʼugbo onu ogu, todu i chenʼe̩wñ kʼi adu ka ñw u.

¹⁸Todule̩ i mʼu du le tʼugbo onu ogu, oñ i kakini, Po̩l, e̩namu le̩, do̩ mi wʼugbo-wñ oñ i rodubo̩ mi kʼu mʼokolobia kide̩ du wʼugbo we̩, abu kʼi chenʼe̩wñ kʼi aka ñw e̩.

¹⁹Tak onu ogu le̩ gwo̩nyʼu o̩wo̩ tʼo̩wo̩ʼka, i tʼowñ ene, kakini, O̩la e̩wñ e̩ ne̩ kʼe̩ duka ñw mi?

²⁰Oñ i kakini, AmaJu fʼalu jo̩ ku ma rodubʼe̩ todu kʼe̩ du Po̩l gwo̩ru nyʼunyi o̩hiala o̩na, dabe̩ne̩ ku ma che ku ma agwili o̩la-wñ o̩bio̩bie̩ tule.

²¹Todule̩ e̩ ki je̩ ñw ma gbʼe̩ ibe n, todu aboke̩le̩-ma ku ma kpala jo̩ anede owñ tʼo̩gbo̩ meji le; ma fʼe̩bo̩ kpe nʼo̩la-ma ka ku ma aje̩ n, ma añmo̩ n gbogbo tʼe̩gba ku ma mʼowñ du kpa; ma la fʼo̩la-ma mu fa-i, ma jʼaneju alu kʼuwe̩ aka ñw ma.

²²Todule̩ onu ogu ka ñw okolobia le̩ kakini, E̩ ki ka ñw e̩ne̩ du ka kʼe̩ mʼinabali kide̩ du ñw mi n, oñ i tʼo̩ no̩ kʼi lo.

²³Tak i fʼamagboji uche̩ amisoja ogume̩lu meji do̩ wʼugbo-wñ, i kakini, Me̩ je̩ ñw amisoja o̩gwo̩ko̩ kpʼamananya o̩gbo̩ me̩ta nyoke me̩gwa kpʼabo ku ma nʼo̩kwo̩ o̩gwo̩ko̩ fʼo̩la-ma mu anede agogo me̩la odu eñini ku ma le gbogbo nyi Se̩saria.

²⁴I ño̩ je̩ ñw ma tene ame̩la ku ma nʼadu todu ku ma du Po̩l tanʼo, ku ma nʼe̩ nyʼugbo Filiks igo̩bina e̩be̩bo̩.

²⁵Tak i fʼo̩takada ko̩; uwo̩li alu kʼo̩takada le̩ de̩ de̩-i kakini:

²⁶Klaudius Laisius tugbo igo̩bina Filiks e̩ne̩lile, agba;

²⁷amaJu fʼe̩ne̩ke̩le̩ kide̩ mu, oñ ma che ku ma dʼu kpa, tak omi kpʼamisoja lewa bʼuma ma, oñ a bʼuma gba abu kʼu gbo̩ ka kʼo̩mane̩ Rom i che.

²⁸Oñ abu kʼu neku kʼu ma e̩wñ ki chʼofe o̩la ku ma kʼalu darʼowñ o̩la, u mʼu du gwo̩ru tef unyi amo̩hiala-ma:

²⁹oñ u li ka kʼalu ku ma ko darʼowñ o̩la i chʼugbo ene e-o̩lo̩da-ma, ama udajo̩-ma nʼe̩wñ du ki bʼuku kpʼeji jo̩ n.

³⁰Ama abu ku ma mʼoji o̩la kʼamaJu ñwa nyʼe̩ne̩ke̩le̩-i ku ma tene echʼo du ka ñw mi, e̩re̩re̩ le̩, u mʼu du kpuche̩ wʼugbo we̩, oñ u ka kʼabo ku ma gwajo̩ nʼowñ ku ma kʼo̩la-ma kpʼowñ o̩gba-we̩.

³¹Todule̩ amisoja mu Po̩l du alu ku ma ñwa ñw ma le̩, oñ ma mʼu du nyi Anripatris odu.

³²O̩jo̩ñwa-wñ ma la je̩ ñw amananya le̩ mʼowñ du le oñ abo ki bo̩ mudabi tef aku.

³³Tak abo le̩ mugudu tef ewo Se̩saria, oñ ma dʼo̩takada le̩ ñw igo̩bina, ma ño̩ mu Po̩l du ñw u.

³⁴Tak abu kʼi fʼo̩takada le̩ kalata kʼi la tene ojane̩ ugbo kʼi kwo kʼi la fʼili-wñ gwa ka kʼi kwo Silisia,

³⁵i kakini, Nagbʼo̩la-we̩ nyane̩ e̩gba du kʼabo ku ma gwajo̩ nʼuwe̩ lewa. Tak i je̩ ñw ma dʼu tefu Praito̩rium e-He̩ro̩d ku ma dide owñ.