Read igala Abo E̩fe̩sus 3 Bible Online

Abo E̩fe̩sus 3 - igala bible

Abo E̩fe̩sus 3

¹Todu e-le̩, omi Po̩l, e̩namu e-Kraist Jisus tod ame̩ abo uche̩ichi—

²u neju ka kʼame̩ gbʼinabali igede ufe̩de̩nyo̩ e-O̩jo̩ ku ma du ñwu mi kʼu de todu me̩ kakini,

³Lʼo̩na o̩la ebite̩ oñ ma je̩ ñwu mi ma afili le̩ alu kʼu ko̩ o̩la-wñ pe̩ nyʼef o̩takada o̩gbo̩gba le̩.

⁴I chʼe-le̩, me̩ chʼo̩kalatu-wñ me̩ neke mʼoji ibe kʼu ne̩ ef afili Kraist,

⁵e-ku ma ma du ñw amo̩ma amone̩ o̩gba o̩gba kibo̩ ku ma ma alu ku ma mubite̩ ñw ame̩nukpuche̩-wñ kiafo̩ kpai amakache̩-wñ ef Afu-wñ abajo̩-i n.

⁶O̩wñ chʼeka kʼabo uche̩ichi kpai amaju chʼabo kʼama de̩de̩ aje̩ e̩wñ ogu le̩, ama de̩de̩ la chʼaño̩laʼka, ama de̩de̩ la ñʼadama nyʼe̩wñ ku ma ko̩la-wñ tane̩ le̩ efu Kraist Jisus lef Uche̩nyo̩,

⁷e-kʼomi mud e̩ne̩ kʼi ache e̩wñ ñw one̩ ef uwñ, likpa ele ufe̩de̩nyo̩ e-O̩jo̩ ku ma du ñwu mi alu kʼukpahiu-wñ achuko̩lo̩.

⁸Omi ki nya tʼabo kiafo̩ du le, oñ ma du ufe̩de̩nyo̩ kide̩ ñw u, kʼu fʼuche̩nyo̩ unana Kraist e-kʼo̩kpa-wñ ma je̩ ate̩ n le̩ je̩ rʼabo uche̩ichi;

⁹kʼu laño̩ dʼe̩wñ ki chʼigede afili ki maja ef O̩jo̩ kʼi nyi e̩wñ du le̩ kwo igbele igbele wʼef ugane̩,

¹⁰todu ku ma ki je̩ ñw amagboji kpai abo̩da ef uña efojale ma unibe O̩jo̩ ki chʼo̩la ojoji ojoji wewe fai lef ujeju abudo̩ Ondu.

¹¹Owñ chʼalu kʼi ñwʼibe e̩wñ ogbegbele̩ du tane̩ efu Kraist Jisus Ondu-wa.

¹²Ef owñ a nʼeju e̩gbo kpai o̩na kʼa guduwa ef e̩do̩-edachi lef e̩do̩ ekono e-owñ.

¹³Lef e-le̩ oñ nabi me̩ ku me̩ we egwegbo̩ ef o̩bata kʼu nali todu me̩, e-le̩ chʼojima e-me̩.

¹⁴E̩wñ ki chi de̩ kʼu natʼokuku-mi kpe̩ ñw Ata,

¹⁵e-kʼunyi du tʼe-efojale tʼe-ane̩ ile̩-i, kʼodu kwugbʼowñ le̩,

¹⁶todu kʼi du ñwu me̩, teju alu kʼunana ojima-wñ de̩, kʼukpahiu-me̩ ki nyo̩gba ku me̩ gbiti ef one̩ e-ejefu lef Afu-wñ;

¹⁷ku Kraist kʼi dodo ef e̩do̩-me̩ lef e̩do̩ ekono; abu ku me̩ fʼili nyʼane̩ kʼe̩re̩-me̩ ño̩ dʼane̩ ef ufe̩do̩;

¹⁸todu ku me̩ ki chegbiñmi kʼame̩ manyʼabo kiafo̩ duu ki dʼo̩wo̩ e-ibe do e̩wñ ki chʼunula kpʼujiji kpʼo̩gba kpʼunefu-wñ;

¹⁹ku me̩ ki ño̩ fʼufe̩do̩ Kraist e-ki tʼe̩wñ kʼone̩ ama le ma, todu ku me̩ ki che̩ko̩ gbogbo wa e̩ko̩ e-O̩jo̩ chaka.

²⁰Ama tugbo e̩ne̩ ki neke che tʼe̩wñ du kʼa abiebi abe̩k e-kʼibe-wa atʼo̩ le nana ololo teju ukpahiu ki achuko̩lo̩ efu-wa;

²¹ojima ki chʼe-owñ ef ujeju abudo̩ Ondu kpai efu Kraist Jisus gbogbo tʼo̩gba o̩gba du ogbegbele̩ nyile̩wa. Ami.