Read igala Abo Filipai 1 Bible Online

Abo Filipai 1 - igala bible

Abo Filipai 1

¹Po̩l kpai Timoti, amadu Kraist Jisus-i, tʼugbo abo kiafo̩ efu Kraisti Jisus chaka ku ma jo̩ Filipai, manyʼamafejute̩ kpai abo ku ma che e̩wñ ñwu ma.

²Ufe̩de̩nyo̩ kpai ure̩do̩ kwugbo O̩jo̩ Ata-wa kpai Ondu Jisusi Kraisti kʼi dʼugbo me̩.

³NagwʼO̩jo̩-mi e̩gba du kʼu rewa me̩.

⁴E̩gba du ef o̩ko̩ du kʼu nagbabʼo̩ todu me̩ chaka nagbo̩ko̩bʼo̩ kpai uyo̩

⁵noji uta ku me̩ ta kpʼawa ñw Uche̩nyo̩ le̩ akwʼo̩jo̩ ejodudu gbogbo wʼifa-i.

⁶A ke̩do̩no kakini, E̩ne̩ kʼi chane̩ uko̩lo̩ ki nyo̩ eche ef ume̩ le̩ ache gbogbo wʼo̩jo̩ Jisusi Kraisti ki kpoji.

⁷I chʼo̩kpakpa ñw omi kʼu nibe abe̩le̩ todu me̩ chaka, todu ene̩ kʼu ne̩ me̩ ef e̩do̩-mi, abu kʼo̩chaka me̩ jʼabʼumi tuta ef ufe̩de̩nyo̩-mi ef eji ku ma ji mi-i, kpai ef ohi kʼu nadu, kpai ef Uche̩nyo̩ elonyane̩.

⁸Todu O̩jo̩ chʼe̩nibenu-mi, alu kʼeju-me̩ chaka ano mi ef e̩do̩ Jisusi Kraisti ki achʼiwo̩ one̩ le̩.

⁹Oñ adua kʼu nache-i chʼutodu kʼufe̩do̩-me̩ ki tule nyo̩gba ololo ef e̩wñ-ema ogbolo kpai o̩ka e̩wñ eche;

¹⁰kʼame̩ ki ñwa e̩wñ ojoji ojoji go; todu kʼame̩ ki de̩ yaala wʼo̩jo̩ Kraisti; ku me̩ we eje̩ ñw one̩ ke̩re̩.

¹¹E̩ro o̩kpakpa ki kʼume̩ efu lefu Jisus Kraist tod ojima kpai uñwulo̩ O̩jo̩.

¹²U la cheneku ku me̩ ma, amo̩maye, kakini, E̩wñ ugbo-mi-i je̩ ñw Uche̩nyo̩ nyʼo̩gba tule,

¹³oñ eji ku ma ji mi-i kwotejugede efu Kraist ef o̩gbo̩ Praito̩rium-i chaka kpai ugbo abo ki bo̩ du.

¹⁴Ojile amo̩maye ef Ondu ño̩ ke̩do̩no tule tod eji ku ma ji mi-i, e̩do̩-ma la gbo ololo oñ ma ma railo o̩lO̩jo̩ eka n.

¹⁵Abo iche̩ka la ka lef ulie̩na kpai iñwa ochochi; abo iche̩ka muda nʼakoya Kraist ata ef ibe e̩nyo̩:

¹⁶abo-i la ka kwef ufe̩do̩ abu ku ma chema kakʼu tʼemi kʼu kʼomu Uche̩nyo̩;

¹⁷abo ekeji le̩ dʼUche̩nyo̩ Kraist kpogo kwef edane̩kpeju, e-ma fe̩ n, ma nʼibe kaku ma adʼo̩bata kwane̩ ñwu mi ef eji ku ma ji mi te̩-i.

¹⁸Tod e̩wñ? Alu du ki chaka de̩, dagba i chʼedʼo̩wo̩ yʼone̩ eju dagba i chʼochochi, ma du Kraist kpogo me̩; u nayo̩ ef e-le, u ñʼayo̩ kpo̩ ge̩.

¹⁹Todu u chema ka kʼoji e-i achʼujadu ñwu mi lef o̩ko̩ ku me̩ agba bʼO̩jo̩ kpai ate̩ko e-Afu Jisusi Kraisti.

²⁰I ade̩ alu kʼeju-mi chʼefe̩rʼo̩na, kʼu nakibeno ka kʼanyo̩ amu mi ef e̩wñ du n, ama alu ki te̩te̩ de̩, fa-i ge̩ ef eju e̩gbo du uwohi anana Kraist atule ef año̩la-mi, dagba i che lef udeju, dagba i che lef uku.

²¹Todu ugbo e-mi edeju che Kraisti, eku la chʼile eje̩.

²²I muda che̩wñ kʼedeju ef o̩re̩la chʼe-ki anʼe̩ro uko̩lo̩ ñwu mi, mak e-kʼu nadu u ma n.

²³E̩wñ meji le̩ la mʼumi ne̩ gaga, e̩ño̩-wñ ache mi kʼu mutu kwʼemi alo kʼu dʼugbo Kraist; todu e-le̩ nyo̩ tule nana ololo.

²⁴Eguane̩-mi ef o̩re̩la-i muda chʼeku ki aku ume̩ tule.

²⁵Oñ abu kʼu ke̩do̩no abe̩le̩, u che ma kak u naguane̩, kʼu la bʼo̩chaka-me̩ gugu, ku me̩ dʼo̩na nyo̩gba, ku me̩ ño̩ nʼuyo̩ ef e̩do̩-ekono;

²⁶todu kʼuba-me̩ ki mud ololo efu Kraisti Jisus ef umi lef eju-mi kʼi ñʼadubi adane̩ ugbo me̩ ge̩.

²⁷Ama ke, me̩ ki nʼe̩wñ ache alu kʼo̩mane̩ ache nyo̩nyo̩ bʼUche̩nyo̩ Kraisti jo̩: todu dagba u lewa ali me̩, dagba kʼeju-mi ma dane̩ n, todu kʼu gbʼinabali-me̩ kakini, Ame̩ dago ef afuʼka, e̩do̩-me̩ chʼoka, oñ me̩ jo̩ abʼomune̩ dobulu ñw o̩la e̩do̩-ekono e-Uche̩nyo̩;

²⁸ku me̩ ma chʼokpo abo ku ma kobʼume̩ le̩ ef e̩wñ du n; e-te̩ chʼujiwe ule-nyo̩ ñwu ma, i muda chʼujiwe ujadu ugbo e̩-me̩, e-i la kwʼugbo O̩jo̩.

²⁹Todu i chʼeke̩do̩nʼo kate oñ ma du chʼume̩ ele ufe̩de̩nyo̩ todu Kraist in, chai ku me̩ ki ño̩ li uwa todu owñ ge̩:

³⁰abu ku me̩ ne̩ eju egbiti e-ku me̩ li ef umi le̩, ku me̩ laño̩ gbo̩ ka kʼi dʼef umi fa-i.