Read igala 1 Pita 1 Bible Online

1 Pita 1 - igala bible

1 Pita 1

¹Pita, e̩nukpuche̩ Jisusi Kraisti, tʼugbo amilowa ku ma che̩kpatuka jʼane̩ Po̩nto̩s kpai Galatia kpai Kapadosia kpai Esia kpai Be̩tunia.

²Owñ chʼabo kʼO̩jo̩ Ata chi ma likpa alu kʼi fʼe̩wñ du ma tane̩ ef efo̩ e-Afu, kʼame̩ ki gbʼo̩la Jisusi Kraisti gbo̩, kʼe̩bie̩-wñ ki natafi ume̩ o̩la. Ufe̩de̩nyo̩ kpʼure̩do̩ ki dʼugbo me̩. I ki nana nyo̩gba.

³O̩jo̩ kʼi laño̩ chʼAta Ondu-wa Jisusi Kraisti ki nele. I fʼuwa bi etito̩ teju ejumomi-wñ o̩gbaje̩je̩ ñw ukibeno ki deju, lef edajikwane̩ ki Jisusi Kraisti dajikwane̩ kwef abo ki ku.

⁴Kʼa ki jʼe̩wñ ogu ki ma ache̩ n, e-kʼe̩wñ ma damʼo̩ n, kʼi ma la acha n, e-kʼama jʼadejutʼo̩ efojale tod ame̩,

⁵kʼukpahiu O̩jo̩ jʼadide me̩ lef e̩do̩ ekono tod ujadu kʼi chʼeñwo̩che te̩ ku ma mubi rʼeju adiko otitala.

⁶Me̩ nagwoguyo̩ ef e-le̩ waa; dagba i chaka dukpe̩ kʼame̩ ache̩do̩dudu iko re-i ef ajama ojoji ojoji ta.

⁷Todu ku ma ki li ka kʼe̩do̩ ekono-me̩ ku ma añwago kʼi chʼe̩wñ akoko tʼo̩jamalia ki akpabie le nana dagba ma chaka nʼuna gwe̩, anʼuñwulo̩ kpʼojima kpʼubumo̩ ef ebite̩ Jisusi Kraist,

⁸owñ kʼame̩ ma li n, kʼame̩ muda afe̩do̩ uwñ le̩; dagba kʼeju-me̩ ma dʼo̩ fa-i ta n; abu ku me̩ muda ake̩do̩nʼo, me̩ nʼuyo̩ ki ma jʼaka n e-kʼojima che̩ko̩ ñw u agwoguyo̩.

⁹Ame̩ agba oji e̩do̩ ekono-me̩ le̩, owñ chʼujadu e-onugo-me̩.

¹⁰Amakache̩ ku ma fʼache̩ o̩la ufe̩de̩nyo̩ le̩ ka ñwu me̩ feju oji e̩wñ ujadu kʼa ka-i ema, ma laño̩ tejane̩-wñ kiili.

¹¹Ma jʼatejane̩ iko e̩gba, kpai alu kʼiko kʼAfu Kraisti kʼi dʼef uma le̩ adu dufu ade̩, owñ chʼabu kʼi nagbʼibenu tane̩ ugbo iwo̩ ki Kraist ali kpai ojima ki dʼubi-wñ.

¹²Ma mubi rʼuma eju ka kʼi chʼo̩la-ma n, chai ame̩ oñ ma jo̩ ache e̩wñ le̩ ñw u, owñ chʼe-ku ma dʼu ka ñwu me̩ fa-i lef abo ku ma fʼuche̩nyo̩ je̩ rʼume̩ ef Afu Kiafo̩ ku ma kpe̩ kwʼefojale wa. E̩ño̩-wñ che amonuche̩ O̩jo̩ ku ma te̩kpe̩ agʼo̩.

¹³Todule̩ me̩ nafʼe̩wñ lʼago e-ibe-me̩ de. Ibe-me̩ ki chʼewane̩, ku me̩ kibeno ufe̩de̩nyo̩ ku ma ane̩ wa ñwu me̩ ef ebite̩ ku ma abi Jisus Kraisti te̩ tʼukpoji.

¹⁴Dabe̩ne̩ kʼamo̩ma ku ma agbʼo̩la gbo̩, ame̩ ki chʼo̩la-me̩ ku me̩ biu alu ku me̩ de̩ o̩gbo̩gba ef e̩ño̩ e̩wñ ku me̩ che iko ugbodu-me̩ le̩ n;

¹⁵ame̩ ki la mud abo kiafo̩ ef e̩wñ du ku me̩ jo̩ ache, alu kʼe̩ne̩ kʼi do̩ me̩ afo̩ le̩.

¹⁶Todu ma fʼu ko̩ tane̩ kakini, Ame̩ ki chʼabo kiafo̩, ukpe̩ kʼomi afo̩.

¹⁷I la che̩wñ kʼe̩ne̩ ku me̩ do̩ kʼAta-me̩ le̩ ma nʼe̩nejuma n, kʼi muda akajo̩ one̩ teju alu kʼuko̩lo̩ e̩ne̩ne̩ne̩ne̩ de̩, maku me̩ ki jo̩ ef ailo era iko ilowa-me̩-i,

¹⁸abu ku me̩ chema ka kʼi chʼe̩wñ kʼi ache̩ dab ajifa kpʼo̩jamalia oñ ma ne̩ la me̩ tane̩ kwef e̩wñ o̩gu o̩wai kʼamata-me̩ du tane̩ ñwu me̩ le̩ n.

¹⁹Chai e̩bie̩ akoko, kʼi dabe̩ne̩ kʼe-o̩mala kʼi ma nʼuchalu n, kʼi ma la nʼe̩kpabie̩ o̩la n, owñ chʼe-Kraisti,

²⁰e-kʼO̩jo̩ fʼu ma tane̩ o̩gba taku ma kpʼe̩re̩ ile̩-i, ma muda dʼu tejugede iko otitala-i tod ame̩,

²¹ku me̩ ke̩do̩nʼO̩jo̩ lefuwñ. Owñ chʼO̩jo̩ kʼi dʼowñ kwane̩ kwef abo ki ku, kʼi laño̩ mʼojima du ñw u, todu kʼuke̩do̩no-me̩ kpʼukibeno-me̩ ki chʼO̩jo̩.

²²Abu ku me̩ fʼonugo-me̩ gworinyo̩ ef ochochi ku me̩ mugbagbo̩ kʼeche̩do̩ amo̩maye-me̩ ki we enʼakoru, me̩ ki fe̩do̩ omune̩ kpʼe̩do̩-me̩ gbali,

²³abu ku ma ma fʼume̩ bi etito̩ kwef ugbe̩ kʼi ache̩ n, chai kwef e-ki ma ache̩ n, lef o̩lO̩jo̩ kʼi deju ki ado̩mo̩ pioo.

²⁴Todu, o̩re̩la du dab egbe, ojima-wñ chaka la dab ododo egbe; egbe-wñ gbe̩, ododo-wñ chi tane̩.

²⁵Uko̩la Ondu muda ado̩mo̩ tʼogbegbele̩. E-le̩ la chʼuko̩la kʼa dʼu juche̩nyo̩ rʼume̩.