Read ikwere Matiyu 27 Bible Online

Matiyu 27 - ikwere bible

Matiyu 27

¹N'ọnu ọsisi, kpakara ele risi arịohna nụ ele okno badnụ ele Ju gbarụ iznuznu, kpebi o gbu Jizọsi.

²Be kne a eriri, duru a zne, gweru a nyewhete n'aka Paịleti nye nẹechi.

³Nga Judasị nye reru a whnụrnu nụ be kperu Jizọsi ikpe ẹnwu, marnụhnini mernu a k'agịda, ọ chịhnalanu ele risi arịohna nụ ele okno badnụ nri siliva ẹto wam,

⁴kaa, “M mmehiele m nụ ogweru ọvnarna nye ikpe mána resi anụ.” Be kanụ a, “Ndaa ke gbasịri aị? Kị bụ mkpa ị.”

⁵Judasị tụsa ịwai wam nụ rime Ọro Nsọ Chiokike, whọga, kpọgbu ẹhni a.

⁶Ele risi arịohna gweru kpakara ịwai wam, kaa, “O megidnernu iwu aị o yisi ịwai ka nụ nhne be bịta ịwai n'Ọro Nsọ Chiokike, kwnornu nụ ọ bụ ịwai ọvnarna.”

⁷Be kpebi o gweru ịwai wam zụ ẹli ele kpụ ite hne be jeeli ele izne.

⁸Ka kpayarụ be nookwu a Ẹli Ọvnarna dụ tna.

⁹Nhne ka mernu ma nhne Jerimaya nye ọwhnurninya kwuru mezu, “Be gweru nri siliva ẹto bụ ọnu ahịa ele Izirẹli whnụrnu ọnu a,

¹⁰be gweru a zụya ẹli ele ọkpu ite, lele kpa Nyenwe aị nyernu m n'iwu.”

¹¹Kọvu nụ Jizọsi gwuzo nụ ruwhnu nye nẹechi ẹchi, nye ọchichi wam sịkwa a, “Ị bụ Eze ele Ju?” Jizọsi sarụ a, “Owe! Jị n'iwhuru i karụ kpam.”

¹²Nga ele risi arịohna nụ ele okno badnụ noobno a nhne, ọ sála be nhne ọbula.

¹³Paịleti sịkwa a, “Ị nụ́na kpakara nhne be noobno i?”

¹⁴Kọvu nụ Jizọsi sála a ọka ọbula, ke mernu o gbagwojiri nye ọchichi anya k'agịda.

¹⁵N'Iriri Ọgawhe ọbula, nye nẹechi ẹchi nẹesigbasinu be otu nye ikelu be rịoru a.

¹⁶Be nwernu otu nye ọjo ke ọhna marnụ zị n'ọro ikelu be nookwu Barabasị.

¹⁷Nga igbudu badnụ wam gbakọru, Paịleti sịkwa be, “Ndaa nye anụ pioru me sịgbasinu anụ, Barabasị[12] sọbu Jizọsi, nye be kwu Karaịsi?”

¹⁸Paịleti kwuru ka kwnornu nụ ọ magwụ nụ be kwuyannụ a Jizọsi kwnornu ọwho-anya.

¹⁹Kpa Paịleti dazịri nụ ngadna ikpe a, nnwerne a ziznenu a izi, kaa, “Aka ị zị́ nụ nhne gbasịri nye mee mma wam, kwnornu nụ m tarụ m agịda awhnụwhnu nụ mbọro tna kwnornu a.”

²⁰Kọvu nụ ele risi arịohna nụ ele okno badnụ sigidnernu igbudu ele badnụ wam be rịo a Barabasị, gbu Jizọsi.

²¹Paịleti sịkwa be, “Ndaa nye anụ pioru me sịgbasinu anụ n'ẹhni badnụ lawụru ka?” Be kaa, “Barabasị.”

²²Ọ sịkwa be, “Kịni bụ nhne anụ pioru me mee Jizọsi, nye be kwu Karaịsi?” Kpakara be siwama, “Kpọgidne a n'ọgba.”

²³Paịleti sịkwa, “Kịni mernu? Kịni bụ nhne ọjo ke o mernu?” Be siwama okokoba ke kakwo, kaa, “Kpọgidne a n'ọgba.”

²⁴Nga Paịleti whnụrnu nụ o nwée rikne mee nhne ọbula, kọvu agịda ọgbugbo dnarnụ, o gweru mini kwọ aka a lawụru nụ ruwhnu kpakara be, kaa, “Aka m zị rịchna n'ọvnarna nwerukna ka, anụ n'iwhuru anụ magwụ nhne gbasịri a.”

²⁵Kpakara be karụ, “Ọvnarna a zị nụ risi aị, zị masị nụ risi rụmu aị.”

²⁶Paịleti sịgbasinu be Barabasị. Nga ọ pnịarnu Jizọsi nhne, o gweru a nyewhete be ma be kpọgidne a n'ọgba.

²⁷Ele ọgwnu nye ọchichi duru Jizọsi zne n'ọbna ele ọgwnu hne kpakara odobiri ele ọgwnu gbarụ a gburugburu.

²⁸Be tụma a iwo a, wosi a iwo ihie ihie.

²⁹Be kpa okpu igwnu, kpusi a nụ risi, nyee a mkpara n'akarikwnunga, gbunu a mpnerne ọchi nụ ruwhnu a, kparị a, be kaa, “A bekwulem jị, Eze ele Ju.”

³⁰Be gbụ a ọnu-mini, gweru mkpara wam nẹeli a nụ risi.

³¹Nga be kparịkworu a, be tụma a iwo wam, wosi a kpakara iwo a, duru a zne ma be kpọgidne a n'ọgba.

³²Nga be whụyaru, be whnụrnu otu nwerukna Sirini, rẹwhna a bụ Saịmoni, be sigidne a ma o vuru ọgba a sno be.

³³Nga be vaduru hne be kwu Gọlugota, ke bụ “Hne Okpokoro Risi,”

³⁴be nyee Jizọsi manya be gwarụ nhne lu nlulu. Kọvu nga Jizọsi ratụru a riro, o kwéle ọ nwọ a.

³⁵Be kpọgidne a n'ọgba, ele ọgwnu ke iwo a n'esilawụru be nga be vukworu ọgbanuchi. [13]

³⁶Be dazịri ẹli neese a.

³⁷Be bịtaru n'olu risi a nhne be bnornu a, “Ka bụ Jizọsi, Eze ele Ju.”

³⁸Be kpọgidnernu ele buznu lawụru nụ Jizọsi n'olu ọgba, otu badnụ n'akarikwnunga a, nye ke berere n'akarita a.

³⁹Ele naagawhe naakaja a, neewhnuwhne risi,

⁴⁰be kaa, “Jị nye naakwnadna Ọro Nsọ Chiokike, wu a n'ọbochi ẹto, znọhia ẹhni ị. Ọ bụru nụ ị bụ Nnwọ Chiokike, hi n'olu ọgba hiedna.”

⁴¹Ọ bụ masị kpa ele risi arịohna nụ ele zni iwu nụ ele okno badnụ naakparị a.

⁴²Be kaa, “Ọ znọhiaru ele berere, kọvu o nwée rikne znọhia ẹhni a, ọ bụ eze Izirẹli, o hi n'olu ọgba hiedna kịtna, a jeekweru nụ a.

⁴³Ọ tụkwasiri Chiokike mkpọma, ọ znọhia a kịtna, ọ bụru nụ ọ masịri a, kwnornu nụ ọ karụ, ‘M bụ m Nnwọ Chiokike.’ ”

⁴⁴Ọ bụ masị kpa ele buznu wam be kpọgidnernu be nụ Jizọsi n'olu ọgba zị masị naakparị a.

⁴⁵Hite n'esilawụru iwhnehnie,[14] ọchichiri gbasnirni kpakara ẹli wam dụ n'ọtnu-ige ke ẹto.[15]

⁴⁶N'ọtnu-ige ke ẹto, Jizọsi jiri okne nkọli siwama, kaa, “Ẹloi, Ẹloi, lama sabatanị,” ke bụ, “Chiokike m, Chiokike m, kịni mernu ị ghasarụ m?”

⁴⁷Agwna ele gwuzo ndụndu nụrnu a, be kaa, “O noosukwu Ẹlaija.”

⁴⁸Ngangam, otu badnụ gba ẹso gweru spọnji gbajite a nụ manya gbarụ ọka, tụkwasi a n'olu isisi, nyee a ma ọ nwọ.

⁴⁹Ele berere kaa, “Gharụ a, a lesi ma Ẹlaija jaava ọ znọhia a.”

⁵⁰Nga Jizọsi jiri okne nkọli si okokoba berere, o nwebime inwe.

⁵¹Ige wam ikpe obnosni ke Ọro Nsọ Chiokike gbawarụ ibekala lawụru hite n'olu dụ n'ẹli. Ẹli otne enye dnarnụ, agịda rugwu gbawarụ.

⁵²Ilili kpumernu, agịda ele nsọ hiri n'ẹnwu lizọ,

⁵³be whụya nụ rime ilili. Nga Jizọsi hiri n'ẹnwu lizọ, be bnazne nụ rime ẹli-ọhna nsọ, gesi agịda ele badnụ ẹhni be.

⁵⁴Nga nye nẹechi otu riwhu ele ọgwnu nụ ele ọgwnu a zị neese Jizọsi whnụrnu ẹli otne enye nụ kpakara nhne mernu, be tụ ogwnu k'agịda, be kaa, “N'ezi, nyerukna ka bụri Nnwọ Chiokike.”

⁵⁵Agịda ele rinya zị masị hne zị ikere neelekiri, ele hi nụ Galili snornu Jizọsi va, neeznenu a izi.

⁵⁶N'esilawụru be bụ Meri Magịdalini, nụ Meri nne Jemisi nụ Josefu, nụ nne rụmu Zebidi.

⁵⁷Nga ogbednachi, otu nye eze be kwu Josefu, nye Arimatiya, nye sno apna Jizọsi,

⁵⁸znekwnusiri Paịleti, rịo a iznu Jizọsi. Paịleti nyernu iwu be vute a iznu Jizọsi.

⁵⁹Josefu vuru iznu wam, whụ a n'ikpe abọchna marnụ mma,

⁶⁰zne lite a nụ rime ilili ikne ke aka a, ke o gwuwaru nụ rime rugwu. O vuru otu rugwu hna ezi kpusni ọnu-mgbo ilili wam.

⁶¹Meri Magịdalini nụ Meri kịyari zị ndụndu, kete ruwhnu n'ilili wam.

⁶²N'ekile a, ke bụ ọbochi ke sno ọbochi ojiknernu, ele risi arịohna, nụ ele Farisi gbakọru znekwnusi Paịleti,

⁶³kaa, “Nda-aị-kwu, a chenwanyarnụ nụ nye nduwhu wam karụ nga ọ zị bụdnu, ‘Nga ọbochi ẹto whemernu, m jeehi n'ẹnwu lizọ.’

⁶⁴Kam kpayarụ, nyee iwu ma be mesni ilili wam rikne dụ ọbochi ẹto, ma ele sno apna a gharụ o znurnu a n'abalị, kanụ ele badnụ nụ o hiri n'ẹnwu lizọ. Aghalaghala ke ipne-aznụ jaakakwo ke mbọm.”

⁶⁵Paịleti kanụ be, “Anụ zne, gweru ele ọgwnu, be se, anụ mesni ilili wam rikne kpa anụ nwernu rikne o mee a.”

⁶⁶Be zne, mesni ilili rikne, kasị ilili a akara n'olu akaworugwu, bịta masị ele nse.