Read ikwere Lukwu 1 Bible Online

Lukwu 1 - ikwere bible

Lukwu 1

¹Tiofilọsi, agịda ele badnụ yisiri aka be n'ọgba ọkwukwo gbasịri nhne be mernu n'esilawụru aị,

²lele kpa be nyernu aị n'aka a bịta. Ele nyernu aị bụ ele hiri n'ọpanizo gweru anya be whnụ be, bụru ele izi ikwu-ọnu Chiokike.

³Ọ bụru ọma hne me snornu kpakara nhne nkarị hite nụ mbọm, me gbanụ ị ọkwukwo nụ ekere nụ ekere, Tiofilọsi zị igwugwu,

⁴mee ma ị mahịa nụ kpakara nhne be jiri ikwu-ọnu ọnu zni ị bụ nhne kwesiri ọkwnata mkpọma.

⁵N'ige Erọdu bụ eze Judiya, otu nye ọkwa arịohna zị, be kwu Zakaraya, ke hi n'ọro Abija, nnwerne a bụ Ẹlizabeti nye hi n'ẹbnurnu Erọni.

⁶Be lawụru bụ ele ọma nụ ruwhnu Chiokike, be naabịta kpakara nhne Nyenwe aị nyernu n'iwu, be nwée ọru.

⁷Kọvu nụ be nwée nnwọ, kwnornu nụ Ẹlizabeti bụ nyerinya rẹkpa nnwọ a mesnirni emesni. Be lawụru menem okno badnụ.

⁸Otu ọbochi, ige ele otu Zakaraya nọornu ẹrnu, Zakaraya zị nọornu ẹrnu nye arịohna nụ ruwhnu Chiokike,

⁹lele kpa ẹrnu arịohna jiri zị, ọ dnabnarnụ nụ ọ bụ ya jọokporne isensi n'Ọro Nsọ Nyenwe aị.

¹⁰Kpakara ele Ju neekpe okpukpe n'ederezi ige ọ nọokporne isensi.

¹¹Enine izi Nyenwe aị mernu Zakaraya whnụ a anya hne o gwuzo n'akarikwnunga ojo arịohna hne be nọokporne isensi.

¹²Nga Zakaraya whnụrnu a, mkpọma larụ a mini, ogwnu tụmako a.

¹³Enine izi wam kanụ a, “Ogwnu tụ́ko ị, Zakaraya, Chiokike nụna m okpukpe i. Ẹlizabeti nnwerne i jọomunu ị nnwọ rukna, ị jookwu rẹwhna a Jọni.

¹⁴Ị jọonwudna, mkpọma jọoso masị ị n'ọnu, agịda ele badnụ jeenwe snarnịma kwnornu ọmumu a.

¹⁵Ọ jọobu nye kwu n'anya Nyenwe aị. Ọ jọ́onwo manya mọbu nhne ọbula ke bna n'anya rịa rịa. Enine Nsọ Chiokike jeejihịa nụ rime a, hite nụ rime rụwho nne a.

¹⁶O jeeme agịda ele Izirẹli hiehnakwnusi Nyenwe aị Chiokike be.

¹⁷O jeezne nụ ruwhnu Nyenwe aị n'enine nụ rikne Ẹlaija. O jeeme ele nda tụhnasna mkpọma hne rụmu be zị, ma ele zá noobno nsnị bna n'apna akọniche ele ọma, o jiknernu Nyenwe aị ele kwesiri a.”

¹⁸Zakaraya sịkwa enine izi wam, “Ndaa nhne me jeeji mahịa ka? Le, me nụ nnwerne m menem okno badnụ k'agịda.”

¹⁹Enine izi wam sarụ a, “Mawa bụ Geburẹli, nye noogwuzo nụ ruwhnu Chiokike. Chiokike ziyaru m me kanụ ị ọka ka nụ o zni i izi ọma ka.

²⁰Le, ị jaadna mgbu, i jéenwe rikne kwu ọka tem dụ ọbochi kpakara nhne ka jeeme, kwnornu nụ i kwéle ikwu-ọnu m ke jeemezu n'ige a.”

²¹Ele badnụ wam zị neese Zakaraya n'ederezi, be naarị nhne kpayarụ o gburu ọkwnu n'Ọro Nsọ Chiokike.

²²Nga ọ whụyaru, o nwée rikne o kwunu be ọka. Be mahịa nụ ọ whnụrnu ọwhnurninya n'Ọro Nsọ Chiokike, o neewhenu be aka, kọvu o nwée rikne kwunu be ọka.

²³Nga ige ẹrnu a zuru n'Ọro Nsọ Chiokike, Zakaraya lahna ọro a.

²⁴Nga nhne ka mekworu, Ẹlizabeti nnwerne a tụru rime, o tugwa ẹhni a ẹnwa isne nụ rime ọro.

²⁵Ọ kaa, “Ka bụ nhne Nyenwe aị mennu m, o gesilem ruwhnu ọma a, ma o kwnosnama iwhnerne m n'esilawụru ele badnụ.”

²⁶N'ẹnwa isunu a,[1] Chiokike ziznernu enine izi Geburẹli zne n'ẹli Nazarẹti ke zị nụ Galili,

²⁷znekwnusi otu nnwọ oknornokno máa nyerukna be kwu Meri, nye Josefu ke hi n'ẹbnurnu Devidi kweru ọ lụ.

²⁸Enine izi wam zne hne ọ zị, kaa, “M bekwulem o, jị nye Nyenwe aị dagwụnu, ị bụ nye ọwa ọma.”

²⁹Mkpọma larụ Meri mini nga ọ nụrnu ikwu-ọnu a, ọ naagbadi nụ mkpọma a ọkpa ibekwu ke nụ kpa.

³⁰Kọvu enine izi wam kanụ a, “Meri, ogwnu tụ́ko ị, Chiokike menu i oru k'agịda.

³¹Ị jọotu rime, mụhia nnwọ rukna, ị jookwu a Jizọsi.

³²Ọ jọobu nye kwu, be jookwu a Nnwọ Nye Kakwo Nhne Dum Olu. Nyenwe aị Chiokike jeenye a ngadna eze nda a, Devidi.

³³Ọ jaachị ọro Jekọpu tim tọm, ẹli-eze a jóokwo okwo.”

³⁴Meri sarụ enine izi wam, “Ndaa kpa be jeeme nhne ka, hne me máa nyerukna?”

³⁵Enine izi wam sarụ a, “Enine Nsọ jaadnakwasị ị, iknernema ke Nye Kakwo Nhne Dum Olu jookpusni i. Be jookwu nnwọ wam zị nsọ ke ị jọomu Nnwọ Chiokike.

³⁶Le, Ẹlizabeti nwene i rinya zị rime ọmumu n'okno badnụ a, ọ bụ nye be nookwu nnwerne nwée nnwọ, ka bụ ẹnwa isunu a.

³⁷Ọ zá nhne nyịrni Chiokike.”

³⁸Meri sarụ, “Le, m bụ m nnwọ izi ke Nyenwe aị, o menu m lele kpa i kwuru.” Enine izi wam gharụ a la.

³⁹Ige wam, Meri jiknernu wara wara zne n'otu ẹli rugwu ke zị nụ Judiya.

⁴⁰Ọ bna n'ọro Zakaraya bekwusi Ẹlizabeti.

⁴¹Nga Ẹlizabeti nụrnu ibekwu Meri, nnwọ zị a nụ rụwho wụlizoru olu. Enine Nsọ jipịyaru Ẹlizabeti.

⁴²O gweru okne nkọli kwu ọka kaa, “Ị bụ nye ọwa ọma n'esilawụru ele rinya, nnwọ ke i jọomu bụ masị nye ọwa ọma.

⁴³M bụ m nye ruwhnu ọma nụ nne ke Nyenwe m jaava lekasi m.

⁴⁴Kwnornu nụ kpa me nụrnu ibekwu i, nnwọ zị m nụ rụwho wụlizoru olu nụ snarnịma.

⁴⁵Ị bụ nye ọwa ọma kwnornu nụ i kweru nhne Nyenwe aị kwuru nụ o jeemezu a.”

⁴⁶Meri kaa, “Mkpọma m ja Nyenwe aị,

⁴⁷ovu m nọonwudna ọnwudna kwnornu nụ Chiokike Nye Ọznohia m,

⁴⁸kwnornu nụ o chenwanyarnụ nnwọ izi a ovu hieru ẹli. Hite nụ kịtna kpakara ele ebiri jookwu m nye ọwa ọma,

⁴⁹kwnornu nụ Chiokike Nye bụ Dikne mennu m nhne hna ezi, rẹwhna a zị nsọ.

⁵⁰Chiokike nọodonu ele nọotu ogwnu a obirizi, hite n'otu ebiri dụ ebiri berere.

⁵¹O ji aka dikne a mee nhne hna ezi, ọ chịsaru kpakara ele oknomokno nụ kpakara mmụma be.

⁵²O gwednarnụ ele eze nụ ngadna eze be, o gwelizọru ele ovu hieru ẹli.

⁵³O nyejilem ele wiri nọogwnu rụwho, kọvu ọ gbatarụ ele eze aka.

⁵⁴O yinu nye izi a Izirẹli aka, ọ chenwanyarnụ ọ dọnu a obirizi,

⁵⁵ke o kweru Ebereham nụ ẹbnurnu a mkwna tim tọm, lele kpa ọ kanụ ele nda aị.”

⁵⁶Meri dazịri n'ọro Ẹlizabeti ẹnwa ẹto, lahna ọro a.

⁵⁷Ige ọmumu nnwọ Ẹlizabeti dụru, ọ mụhia nnwọ rukna.

⁵⁸Ele agbatibi[2] a nụ rụmu nwene a nụrnu nụ Nyenwe aị dọnnu a obirizi k'agịda, be snornu a nwụdna.

⁵⁹Ọ dụ n'ọbochi ẹsato, be varụ ọ kpa nnwọ wam nka. Be noopio ọ jịta a rẹwhna Zakaraya ma ọ bụru ogbo nda a,

⁶⁰kọvu nne a karụ, “Ọ́za, rẹwhna a bụ Jọni.”

⁶¹Be kanụ a, “Ọ zá nye naaza rẹwhna ka n'esilawụru ele ke i.”

⁶²Be whenu nda a aka, jịkwa a rẹwhna be jookwu nnwọ wam.

⁶³Ọ kaa be nyee a nhne ọgba ọkwukwo, ọ gbagwojuru be anya nga ọ gbasịri, “Rẹwhna a bụ Jọni.”

⁶⁴Ngangam, ọnu a kpumernu, riro a tọma, o bete nookwu ọka, naaznarnị Chiokike.

⁶⁵Ogwnu tụru kpakara ele agbatibi be, be wheke ọtnutnu ka kpakara ẹli rugwu Judiya.

⁶⁶Nye ọbula ke nụrnu a zị nẹechenwu, be nẹesikwa, “Ọkpa badnụ kịni bụ nhne nnwọ ka jọobu?” Kwnornu nụ be whnụrnu nụ aka Nyenwe aị zị n'ẹhni a.

⁶⁷Enine Nsọ jipịyaru Zakaraya nda Jọni, ọ whnụ ọwhnurninya, kaa,

⁶⁸“Ọjija zịnu Nyenwe aị, Chiokike ke Izirẹli, kwnornu nụ o lekasiri ma ọ gbahịa ele ke a.

⁶⁹O gweyarụ nye dikne jọoznohia aị hite n'ọro nnwọ izi a Devidi,

⁷⁰lele kpa o kwuru hite n'ọnu ele ọwhnurninya a zị nsọ agịda ige wheru ewhe.

⁷¹Ọ jọoznohia aị hite n'aka kpakara ele sno aị irno.

⁷²Ọ dọnnu ele nda aị obirizi, o chenwanyarnụ ọgba-njọ-ẹhni nsọ a.

⁷³O kwesiri Ebereham nda aị mkwna rikne,

⁷⁴ọ dọhia aị n'aka ele irno aị, ma a kpenu aị n'énwe ogwnu,

⁷⁵ma a zịri nsọ nụ ele mee mma nụ ruwhnu a kpakara bụdnu aị.

⁷⁶Jị, nnwọ m matị, be jookwu i nye ọwhnurninya ke Nye Kakwo Nhne Dum Olu, kwnornu nụ i jeezne nụ ruwhnu Nyenwe aị neemekwatanu a apna.

⁷⁷I jeeme ele ke a mahịa ọznohia, hite n'ọgbarunu be mmehie be.

⁷⁸Hite n'obirizi nụ ovu ọma ke Chiokike aị, o jeeme ẹhnam nọomukwasi aị hite n'oligwe,

⁷⁹iwhne jọomukwasi ele zị n'ọchichiri nụ ele zị n'oyinyo ke ẹnwu, noodumakọ ọchi aị n'apna udno.”

⁸⁰Nnwọ wam nooso oso, gbasị rikne nụ enine, o wu n'ẹli-ịkpa tem dụ nga be gesiri a ele Izirẹli.