Read ikwere Lukwu 24 Bible Online

Lukwu 24 - ikwere bible

Lukwu 24

¹N'ọnu ọsisi n'ọbochi mbọm n'ikwezu, ele rinya wam gweru mọno otute wam be gwakọtaru ke nwernu ẹknarna ọma, zne ilili Jizọsi.

²Be whnụrnu nụ be vumernu akaworugwu be jiri kpusni ọnu ilili wam.

³Be bnazne nụ rime ilili, be whnụ́ge iznu Nyenwe aị Jizọsi.

⁴Be gwuzoru naarị nhne ka bụ, ngangam, ele rukna lawụru wogwu iwo abọchna noogbu amụma gwuzoru nụ ngeri be.

⁵Ogwnu tụru ele rinya wam, be dna kpu ruwhnu n'ẹli, kọvu ele rukna wam kanụ be, “Kịni kpayarụ anụ noopio nye zị bụdnu n'esilawụru ele nwụrnu ọnwu?

⁶Ọ zị́la hna, o hilem n'ẹnwu lizọ. Anụ chenwanya nhne ọ kannụ anụ nga ọ zị nụ Galili,

⁷nụ be jeegweru Nnwọ ke Badnụ nyega ele mmehie, be kpọgidne a n'ọgba, n'ọbochi ke ẹto, o jeehi n'ẹnwu lizọ.”

⁸Ele rinya wam chenwanya ikwu-ọnu a.

⁹Be hi n'ilili wam lahna, kanụ nri nụ otu badnụ ele sno apna a nụ ele berere nhne be whnụrnu.

¹⁰Ele rinya wam bụ Meri Magịdalini, nụ Joana, nụ Meri nne Jemisi, be nụ ele rinya berere kanụ ele izi wam ọka ka.

¹¹Kọvu be kwége nhne ele rinya kwuru, be naarị nụ ọ bụ ọka etekne.

¹²Pita lizọ, gba ẹso zne n'ilili, o whudna, whnụ ikpe iznu, ọ zá nhne berere ọ whnụrnu. Ọ lahna ọro naarị nhne mernu.

¹³N'ọbochi wam, ele sno apna a lawụru neezne ẹli Emaọsi, nhne nụ lele maịli ẹsau.

¹⁴Be nookwurita kpakara nhne mernu.

¹⁵Kpa be neezne nookwu nhne ka, Jizọsi n'iwhuru a kpayabetụru ndụndu, snornu be neezne.

¹⁶Be whnụ a, kọvu be máa nụ ọ bụ Jizọsi.

¹⁷Jizọsi sịkwa be, “Kịni bụ nhne anụ nọotnurni kpa anụ neezne?” Be gwuzoru bii, gbarụ ruwhnu.

¹⁸Otu nụ rime be rẹwhna a bụ Kilopasi, sịkwa a, “Okwole jịwa bụ nye izne ke zị nụ Jerusẹlem nye máa nhne mernu ọbochi ele nụ ele ka wheru ewhe?”

¹⁹Jizọsi sịkwa a, “Kịni bụ nhne kọ?” Be kaa, “Nhne gbasịri Jizọsi nye Nazarẹti, nwerukna ka bụ nye ọwhnurninya Chiokike, ọ bụ dikne n'ikwu-ọnu ma nụ ẹrnu nụ ruwhnu Chiokike ma nụ ruwhnu ele badnụ.

²⁰Ele risi arịohna nụ ele risi aị gweru a nyee ma be kpe ikpe ẹnwu, be kpọgidne a n'ọgba.

²¹Kọvu a leru anya nụ ọ bụ nye jaagbahịa Izirẹli. Ke kakwo, tna bụ ọbochi ẹto a kpa nhne ka mernu.

²²Agwna ele rinya aị nụ be zị kpasịri aị ogwnu tna. Be znernu n'ilili a n'ọnu ọsisi,

²³kọvu be whnụ́ge iznu a. Be va kanụ aị nụ be whnụrnu ọwhnurninya ele enine izi, ke kannụ be nụ ọ zị bụdnu.

²⁴Agwna ele aị nụ be zị znernu ilili a, whnụ masị lele kpa ele rinya wam kwuru, kọvu be whnụ́ge iznu a.”

²⁵Jizọsi kanụ be, “Anụ bụ ele iwhnirniwhno, anụ zị́la gnarnagnarna nụ okweru nhne kpakara ele ọwhnurninya kwuru.

²⁶Ọ zị mkpa nụ Karaịsi jaata kpakara awhnụwhnu, bna n'igwugwu a.”

²⁷Jizọsi kọwamanu be nhne be gbarụ n'ọkwukwo nsọ gbasịri ẹhni a, hite n'ọkwukwo Mozizi nụ ele ọwhnurninya.

²⁸Kpa be vaduru ẹli wam be neezne, Jizọsi mee lele o neewhe ruwhnu,

²⁹be sigidne a, kaa, “Snornu aị dazịri, ọbochi zneminem.” O snornu be dazịri.

³⁰O snornu be dazịri ẹli n'ikpechi wiri, o gweru brẹdi, tụ mmamma, nyawama a, bete neenye be.

³¹Anya be kpume, be mahịa a, kọvu o whume n'anya be.

³²Be kwukwarita n'ẹhni be, “Ọ nụ lele nụ bẹkwnu neerne nụ mkpọma aị nga o nookwunu aị ọka n'apna, nọokowanu aị ọkwukwo nsọ.”

³³Be lizọ ngangam lahna Jerusẹlem. Be whnụ ele sno apna a nri nụ otu wam, hne be gbakọgwu nụ otu nụ ele berere.

³⁴Be naakaa, “Ọ bụ n'ezi, Nyenwe aị hilem n'ẹnwu lizọ, o mernu Saịmoni whnụ a anya.”

³⁵Badnụ lawụru wam kọwanu be nhne mernu n'apna, nụ kpa be jiri mahịa Nyenwe aị nga ọ nyawarụ brẹdi.

³⁶Kpa be zị nookwu ọka ka, Jizọsi gwuzoru n'esilawụru be, kanụ be, “Udno zịnu anụ.”

³⁷Ogwnu tụru be k'agịda, be che nụ be whnụrnu rẹnwu.

³⁸Jizọsi kanụ be, “Kịni mernu ogwnu nọotu anụ? Kịni mernu anụ neenwe mkpọma lawụru nụ mkpọma anụ?

³⁹Anụ le aka m lawụru nụ ọchi m lawụru. Ọ bụ mawa. Anụ kpatụ m aka whnụrnu, rẹnwu nwée anọ-ẹhni nụ ọkpukpu, lele kpa anụ whnụrnu me nwernu.”

⁴⁰Nga o kwuru ka, o gesi be aka a lawụru nụ ọchi a lawụru.

⁴¹Be nwée rikne kweru kwnornu ovu ọso n'ọnu nụ ọtun'anya, ọ sịkwa be, “Anụ nwernu wiri o riri hna?”

⁴²Be nyee a otu aznụ be siri esi,

⁴³o gweru a ri nụ ruwhnu be.

⁴⁴Ọ kanụ be, “Ka bụ nhne me kannụ anụ nga me nụ anụ zị. Kpakara nhne be gbarụ n'ọkwukwo nsọ gbasịri m n'iwu Mozizi jeeme, ma ke ele ọwhnurninya nụ Eri Ọma.”

⁴⁵O kpume echiche be ma be ghọhia nhne be gbarụ n'ọkwukwo nsọ.

⁴⁶Ọ kanụ be, “Ka bụ nhne be gbarụ n'ọkwukwo nsọ, nụ Karaịsi jaatarịri awhnụwhnu, nụ o jeehi n'ẹnwu lizọ n'ọbochi ke ẹto,

⁴⁷nụ be jeeji rẹwhna a kpọ okwo ọtuhnasna mkpọma nụ rime kpakara mba, ma Chiokike gbarụ mmehie be. Be jeehite nụ rime Jerusẹlem panịzo nọokpo okwo.

⁴⁸Anụ bụ ele akebne kpakara nhne ka.

⁴⁹M jeeziyanu anụ nhne Nda m kweru nụ mkwna, kọvu anụ dazịri nụ Jerusẹlem tem rikne ke hi n'oligwe dnakwasị anụ.”

⁵⁰Jizọsi duru be whọga zne n'ẹli Bẹtani, ọ chịlizo aka lawụru olu, gọzi be.

⁵¹Kpa ọ zị nọogozi be, be gwelizọ a la n'oligwe.

⁵²Be kpọnu a risi ẹli, lahna Jerusẹlem, snarnịma jihịa mkpọma be.

⁵³Be dazịgidne n'Ọro Nsọ Chiokike nọotunu Chiokike mmamma.