Read ikwere Lukwu 3 Bible Online

Lukwu 3 - ikwere bible

Lukwu 3

¹N'awha ke nri nụ isne ke ọchichi Taberọsi Siza, nga Pọntiosi Paịleti nẹechi Judiya, nga Erọdu nẹechi Galili, nwene a rukna Filipu nẹechi Ituria nụ Tirakonitisi, Lisanasị nẹechi Abilini,

²Anasị nụ Kayafasị bụ ele risi arịohna, ige wam ikwu-ọnu Chiokike dụru Jọni, nnwọ Zakaraya nsnị n'ẹli-ịkpa.

³O zne nụ kpakara ẹli ke zị Osimini Jọdani gburugburu, nọokpo okwo naakaa ele badnụ tụhnasna mkpọma ma be wụ be mini, ma Chiokike gbarụnu be mmehie.

⁴Lele kpa be gbarụ a n'ọkwukwo nsọ hite n'ọnu Azaya nye ọwhnurninya, kaa, “Akpịri otu badnụ nọokpo okwo n'ẹli-ịkpa, anụ mekwata apna Nyenwe aị, anụ mee apna a snị asnị.

⁵Be jeemesni kpakara ngwulangwu, be jaakwnadna kpakara rugwu nụ rugwu matị. Kpakara apna zị mgbahịrigodo jaasnị asnị, kpakara apna zị ndagwurugwu jaazị snam.

⁶Kpakara ele badnụ jọowhnu ọznohia Chiokike.”

⁷Jọni kanụ igbudu badnụ nọowhokwnusi a ma ọ wụ be mini, “Anụ ẹbnurnu agwọ, nyele kannụ anụ gbanahọru ovu owe ẹhni Chiokike ke naava?

⁸Anụ mịnya mkpụru ke neegesi nụ anụ tụhnasnarnu mkpọma. Anụ káa nụ Ebereham bụ nda anụ. Kwnornu me kanụ anụ ezi ọka, Chiokike nwernu rikne mee kpakara akaworugwu ka ghọ rụmu Ebereham.

⁹Be bịtalam ehnigwe n'ikwnu kpakara isisi, isisi ọbula ke mị́nyala mkpụru ọma, be joogbudna a, tụbna nụ rime bẹkwnu.”

¹⁰Ele badnụ wam sịkwa a, “Kịni bụ nhne a jeeme?”

¹¹Jọni sarụ be, “Nye nwernu iwo lawụru, o kesi nye nwée otu, nye nwernu wiri, mee masị kpam.”

¹²Ele ọna ntụ varụ ma Jọni wụ be mini, be sịkwa a, “Nye-zni-nhne, kịni bụ nhne a jeeme?”

¹³Jọni sarụ be, “Anụ náhịa ele badnụ ịwai kakwo kpa be nyernu anụ iwu.”

¹⁴Ele ọgwnu sịkwa a, “Kịni bụ nhne a jeeme”? Ọ kanụ be, “Anụ mée ele badnụ nhne rikne, mọbu bno ele badnụ nhne aghalaghala, ọgwo ẹrnu anụ ji anụ rụwho.”

¹⁵Ele badnụ neele anya nụ Jọni bụ Karaịsi.

¹⁶Jọni kanụ be, “M ji m mini wụ anụ mini, kọvu nụ nye kakwo m rikne vawa, nye me kwésile o whudnahie tọma eriri okoro-ọchi a lawụru. Nye wam jeeji Enine Nsọ nụ bẹkwnu wụ anụ mini.

¹⁷Nye nhne ọwhusna ịkpa zị n'aka a, ọ jọowhusna ịkpa a nkarị, chịbna ịkpa a n'ọbna, kọvu o jeeji bẹkwnu chní echni kpọrne ruznurnuznu ịkpa.”

¹⁸Jọni ji agịda ikwu-ọnu zị ichne ichne zni izi ọma, naarịasno be tụhnasna mkpọma.

¹⁹Kọvu nụ Jọni bigbọru Eze Erọdu kwnornu Erodiasi nnwerne nwene a, nụ agịda nhne ọjo berere ke Erọdu mernu.

²⁰Erọdu tụkwasiri n'olu nhne ọjo ka, nga o yisiri Jọni ikelu.

²¹Nga Jọni wụkparu ele badnụ mini, ọ wụru Jizọsi mini masị.[5] Nga Jizọsi neekpe okpukpe, oligwe kpumernu.

²²Enine Nsọ whekwasịri a lele nduru, otu akpịri hiri n'oligwe dna kaa, “Jị bụ Nnwọ m, me whnụrnu n'anya, nhne i masịri m.”

²³Nga Jizọsi gbarụ nri awha ẹto, ọ panịzo ẹrnu izi ọma a, ele badnụ naarị nụ ọ bụ nnwọ Josefu, nnwọ Hili,

²⁴nnwọ Matatị, nnwọ Livaị, nnwọ Meliki, nnwọ Janaị, nnwọ Josefu,

²⁵nnwọ Matatayasi, nnwọ Emọsi, nnwọ Nahum, nnwọ Ẹsili, nnwọ Nagaị,

²⁶nnwọ Matị, nnwọ Matatayasi, nnwọ Sẹmeni, nnwọ Josẹki, nnwọ Joda,

²⁷nnwọ Jonani, nnwọ Resa, nnwọ Zerubabẹli, nnwọ Seatẹli, nnwọ Neri,

²⁸nnwọ Meliki, nnwọ Adị, nnwọ Kosam, nnwọ Ẹlimadam, nnwọ Ẹr,

²⁹nnwọ Josụa, nnwọ Eleza, nnwọ Jorim, nnwọ Matatị, nnwọ Livaị,

³⁰nnwọ Simiọni, nnwọ Juda, nnwọ Josefu, nnwọ Jonam, nnwọ Ẹliakim,

³¹nnwọ Mela, nnwọ Mena, nnwọ Matata, nnwọ Natanị, nnwọ Devidi,

³²nnwọ Jesi, nnwọ Obedi, nnwọ Boazi, nnwọ Salịmoni, nnwọ Nasọni,

³³nnwọ Aminadabụ, nnwọ Ram, nnwọ Hezirọni, nnwọ Pẹrezi, nnwọ Juda,

³⁴nnwọ Jekọpu, nnwọ Aziki, nnwọ Ebereham, nnwọ Tera, nnwọ Nahọ,

³⁵nnwọ Sẹrugi, nnwọ Ru, nnwọ Pẹlegi, nnwọ Ẹbe, nnwọ Sẹla,

³⁶nnwọ Kaịnani, nnwọ Afazadị, nnwọ Sẹm, nnwọ Noa, nnwọ Lamẹki,

³⁷nnwọ Metusela, nnwọ Ịnoku, nnwọ Jarẹdi, nnwọ Mahalalẹli, nnwọ Kaịnani,

³⁸nnwọ Enọsi, nnwọ Sẹti, nnwọ Adam, nnwọ Chiokike.