Read ikwere Ẹrnu Ele Izi 2 Bible Online

Ẹrnu Ele Izi 2 - ikwere bible

Ẹrnu Ele Izi 2

¹Nga ọbochi Pẹntikosi zuru, kpakara be gbakọru n'otu ọro.

²Ngangam, imerne ke nụ lele okne ruwhere hiri n'oligwe va, jipịya kpakara ọro wam be zị.

³Be whnụrnu nhne nụ lele riro bẹkwnu ke dazịri n'olu risi be otu otu.

⁴Enine Nsọ mejihịaru be, be bete nookwu ọka nụ riro ele berere lele kpa Enine Nsọ wam nyernu be iknernema o kwu ọka.

⁵Agwna ele Ju ele nọotu ogwnu Chiokike wu nụ Jerusẹlem, ele hi nụ kpakara mba ke zị nụ mkpururu oligwe va.

⁶Nga be nụrnu mkpakpọ ka, be gbakọ, ọ tụru be n'anya kwnornu nụ be nụrnu kpa ele sno apna Jizọsi nookwu ọka nye ọbula nụ ikwu-ọnu ke a.

⁷Ẹhni nwụrnu be, be kaa, “Kpakara ele ka nookwu ọka, be bụ́o ele Galili sa?

⁸Ndaa kpa a nọonu be nookwu ọka n'ikwu-ọnu be jiri mụ aị?

⁹Ele Patịa, nụ Midia, ele Ẹlam, ele hi nụ Mesopotemia, Judiya nụ Kapadosia, nụ ele hi nụ Pọntosi nụ Esia,

¹⁰ele hi nụ Firigia nụ Pamfilia, ele hi nụ Ijipiti nụ ele hi agwna ẹli Libiya ke zị Sirini ndụndu, nụ agwna ele hi nụ Rom,

¹¹ma ele Ju ma ele bnarnụ okpukpe ele Ju, ele Kiriti nụ ele Arabu, a nụrnu kpa be nookwu ọka n'ikwu-ọnu aị gbasịri ẹrnu ndu-ẹhni Chiokike.”

¹²Ọ gbagwojiri be anya, kpakara be nẹesikwa, “Ka bụ kịni?”

¹³Kọvu ele berere mernu be nhne mkparị, be kaa, “Manya noogbu ele ka.”

¹⁴Pita gwuzoru ya nụ nri badnụ nụ otu wam bete nookwunu ele badnụ wam ọka n'okne nkọli, kaa, “Ele Ju ibne m nụ kpakara anụ ele wu nụ Jerusẹlem, anụ bnote nsnị nụ nhne me nookwu gbasịri nhne anụ whnụrnu.

¹⁵Ọ zá manya noogbu ele rukna ka lele kpa anụ cheru, ọ bụ ọtnu-ige tolu ke ọsisi.[1]

¹⁶Kọvu ka bụ nhne nye ọwhnurninya Juwẹli kwuru ọka gbasịri a,

¹⁷Chiokike karụ kpa, ‘Ka bụ nhne me jeeme n'ọbochi ipne-aznụ, m jọowukwasi Enine m n'ẹhni kpakara ele badnụ, rụmu anụ ele rukna nụ ele rinya jọokpo okwo ikwu-ọnu Chiokike, rụmu ikoro anụ jọowhnu ọwhnurninya, ele okno badnụ anụ jọoro mbọro.

¹⁸M jọowukwasi ele izi m rukna nụ rinya Enine m n'ọbochi wam, be jọowhnu ọwhnurninya.

¹⁹M jeegesi ẹrnu ndu-ẹhni n'oligwe nụ nhne elekema n'ọwa nụ mkpururu oligwe, ọvnarna nụ bẹkwnu nụ okne rụnwurnu bẹkwnu.

²⁰Ẹhnam jaagba ọchichiri, ẹnwa jaachna ihie ihie lele ọvnarna, ka jeeme sị okne ọbochi ke zị igwugwu ke Nyenwe aị va.

²¹Be jọoznohia nye ọbula ke noosukwu rẹwhna Nyenwe aị.’

²²“Ele Izirẹli, anụ bnote nsnị n'ọka ka, Chiokike jiri kpakara ẹrnu ndu-ẹhni nụ nhne tụ n'anya nụ elekema ka n'esilawụru anụ gesi nụ ya ziyaru Jizọsi nye Nazarẹti. Kpakara anụ magwụ kpam.

²³Chiokike marnụ ama kweru be gweru a nyega anụ, anụ gweru a nyee n'aka ele máa Chiokike, be kpọgidne a n'ọgba, gbu a.

²⁴Kọvu nụ Chiokike mernu o hi n'ẹnwu lizọ, gweme nhne igbugbu ke ẹnwu kwnornu nụ ẹnwu nwée rikne nwụgwu a.

²⁵Ka bụ nhne Devidi kwuru gbasịri a, ‘M whnụrnu m Nyenwe aị nụ ruwhnu m kpakara ige. Ọ zị n'akarikwnunga m, ovu jáala m mini.

²⁶Ka kpayarụ ovu sọru m n'ọnu, riro m nwụdnarnu k'agịda, anọ-ẹhni m jaazị bụdnu n'olile anya.

²⁷Kwnornu nụ ị jẹ́esigbasi mkpụru ovu m n'ilili, i jéekwe nye nsọ ke i ro oro.

²⁸I gesiri m apna ke bụdnu, ruwhnu i mernu snarnịma jihịa mkpọma m.’

²⁹“Rụmu nda m, m nookwunu anụ ọka n'anya rikne nhne gbasịri nda aị ọknani bụ Devidi, ọ nwụrnu ẹnwu, be li a, ilili a zị hna dụ tna.

³⁰Ọ bụ nye ọwhnurninya, ọ magwụ nụ Chiokike kwesiri a mkwna rikne nụ ọ jeeme otu nye hi nụ avnụrnu a dazịri nụ ngadna eze a.

³¹Ọ whnụrnu nụ hne zị nụ ruwhnu, o kwu ọka gbasịri olizọ n'ẹnwu Karaịsi, Chiokike jẹ́esigbasi a n'ilili, anọ-ẹhni a jóoro oro.

³²Chiokike mernu Jizọsi ka hi n'ẹnwu lizọ. A bụ ele akebne ezi ọka ka.

³³Be gwelizọru a olu n'akarikwnunga Chiokike, ọ nahịaru n'aka Nda a mkwna ke Enine Nsọ bụ ke ọ wụkwasiri aị, ke anụ whnụrnu, nụrnu masị.

³⁴Devidi láge olu nụ rime oligwe, kọvu o kwuru, ‘Nyenwe aị kannụ Nyenwe m, Dazịri ẹli n'akarikwnunga m,

³⁵tem dụ nga me jaabịta ele irno i lele nhne ị jọotukwasi ọchi ị lawụru.’

³⁶“Kam kpayarụ, kpakara ele Izirẹli, anụ mahịa n'ezi ọka nụ ọ bụ Jizọsi ka, nye anụ kpọgidnernu n'ọgba bụ nye Chiokike mernu Nyenwe aị nụ Karaịsi.”

³⁷Nga be nụrnu ka, o gburu be igbugbu k'agịda nụ mkpọma, be kanụ Pita nụ ele izi berere, “Rụmu nda aị, kịni bụ nhne a jeeme?”

³⁸Pita kanụ be, “Nye ọbula hi nụ mmehie a tụhnasna, ma be wụ anụ mini nụ rẹwhna Jizọsi Karaịsi, ma Chiokike gbarụnu anụ mmehie anụ. Ige wam anụ jeenwehịa nkesi Chiokike ke bụ Enine Nsọ.

³⁹Kwnornu nụ mkwna Chiokike ka zịnu anụ, nụ rụmu anụ, nụ kpakara ele zị ikere, ele Nyenwe aị Chiokike joosukwu.”

⁴⁰Pita ji agịda ikwu-ọnu berere dọ be aka nụ nsnị, kaa, “Anụ gweme ẹhni anụ awhnụwhnu ke ebiri ọjo ka.”

⁴¹Be wụru ele kweru izi ọma ka mini. Be tụkwasinu be pokwu badnụ ẹto n'otu ọbochi.

⁴²Be dazịgidne nụ iznizni ele izi, snornu be mekọta nhne, ri wiri nụ neekpe okpukpe.

⁴³Ele izi wam rnụrnu agịda ẹrnu ndu-ẹhni nụ elekema ke mernu ogwnu tụ ele badnụ.

⁴⁴Kpakara ele kweru ekwe dazịkota n'otu, neekeri nhne n'otu.

⁴⁵Be re ẹkwu be nụ ẹkwnu be nwernu, keme ịwai n'esilawụru be lele kpa mkpa kparụ nye ọbula.

⁴⁶Be dazịgidne n'otu n'Ọro Nsọ Chiokike kpakara ọbochi. Be neezne n'ọro nụ ọro, gweru mkpọma zị rịchna neeri wiri n'otu nụ ovu ọso n'ọnu.

⁴⁷Be naaznarnị Chiokike, neenwe ruwhnu ọma nụ hne ele badnụ zị. Nyenwe aị nọotukwasinu be ele badnụ n'ọbochi n'ọbochi ele be jọoznohia.