Read ikwere Ele Rom 9 Bible Online

Ele Rom 9 - ikwere bible

Ele Rom 9

¹M nookwu ezi ọka nụ rime Karaịsi, ọ bụ́o aghalaghala, Enine Nsọ naagbanụ ovu m akebne nụ m zá m naagha aghalaghala.

²Anya-mini zị m nụ mkpọma, nhne igbugbu zị m nụ mkpọma kpakara ige.

³Ọ jaamasị m, ọ bụru nụ Chiokike vụru m ọnu, kewama m nụ hne Karaịsi zị, kwnornu rụmu nda m, ele ẹli m,

⁴ele Izirẹli. Chiokike mernu be bụru rụmu a, o okpumennu be igwugwu a, ya nụ be gbarụ njọ-ẹhni, o nyernu be Iwu, be nwernu okpukpe ọma, nụ kpakara mkwna Chiokike,

⁵be bụ avnụrnu kwu ele nda ọknani, Karaịsi hiri n'avnụrnu be va n'anọ-ẹhni. Ọznarni zịnu Chiokike ke nẹechi kpakara nhne ọkwnukokwnu. Amịm.

⁶Ọ bụ́o nụ Chiokike mézule ikwu-ọnu a, kwnornu nụ ọ bụ́o kpakara ele hi n'avnụrnu Izirẹli bụ rụmu Izirẹli n'ezi.

⁷Kpakara be bụ́o rụmu Ebereham n'ezi, ọ bụbedi nụ be hi n'avnụrnu Ebereham. Kwnornu nụ ọkwukwo nsọ kwuru, “Kọvu be jọogwnu rụmu ị hite n'Aziki.”

⁸Ka bụ nụ ọ bụ́o rụmu be mụrnu n'anọ-ẹhni bụ rụmu Chiokike, kọvu ele be mụrnu lele kpa Chiokike kweru Ebereham nụ mkwna bụ rụmu a n'ezi.

⁹Kwnornu nụ ka bụ nhne mkwna wam kwuru, “N'ige be karụ aka, m jeehiehna, Sera jọomu nnwọ rukna.”

¹⁰Ọ bụ́o ka kpọi, rụmu Ribeka nwernu otu nda, ke bụ nda ọknani aị Aziki.

¹¹Sụ ọ mụrnu rụmu ejima rukna lawụru wam, nga be mége nhne ọma mọbu ke ọjo, ma nhne Chiokike kwuru gwuzosi rikne,

¹²ọ bụ́o hite n'ẹrnu kọvu kwnornu nụ o sukwu ikwu a, Chiokike kannụ Ribeka, “Nye ke okno badnụ jeeznenu nye ke matị izi.”

¹³Lele kpa be gbarụ a n'ọkwukwo nsọ, “M whnụrnu m Jekọpu n'anya, sno Isọ irno.”

¹⁴Ndaa nhne a jookwu? Ọ bụ nụ Chiokike bụ nye ndala sa? Ọ́za rịa rịa.

¹⁵Kwnornu nụ ọ kannụ Mozizi, “M jọodonu nye me jọodonu obirizi, obirizi, mee masịnu nye masịri m oru.”

¹⁶Ka neegesi nụ ọ bụ́o hite nụ nhne badnụ noopio mọbu nhne be nọornu, kọvu ọ bụ obirizi Chiokike.

¹⁷Kwnornu nụ ọkwukwo nsọ kannụ Fero, “Ka bụ nhne me kwno gwuzote i, ma m gesi m iknernema m n'ẹhni ị, ma kpakara ọwa mahịa rẹwhna m.”

¹⁸Chiokike nọodonu nye masịri a obirizi, neemenu nye o pioru ma o knesni mkpọma, knesni mkpọma a.

¹⁹Otu badnụ jaakanụ m, “Ndaa kpa Chiokike naama aị ikpe? Nyele nwernu rikne o gwuzogidne echiche a?”

²⁰Jị badnụ etekne, ị bụ nyele naasa Chiokike ọka? Nhne be kpụru ọkpu ọ jaasịkwa nye kpụru a ajịji, “I kwno kịni kpụ m kpa?”

²¹Ọ bụ nye nọokpu ite o nwée rikne n'ẹhni otu ọrura wam kpụ ite lawụru, otu bna n'ẹrnu zị okne mkpa, ke berere be ji a rnụ ẹrnu kpakara ige?

²²Ọ zị Chiokike n'aka o gesi ikpe nụ iknernema a, kọvu, ọ zị kwno a n'aka o gesi ogologo ọsnuta ovu n'ẹhni ele o neekpe ikpe, bụ ele ọ bịtaru ma ọ la be n'iyi.

²³Ọ zị masị n'aka a ọ wụkwasi ọkwnamarna igwugwu a nụ bụdnu ele ọ bịtannu obirizi a.

²⁴Kwnornu nụ a bụ ele o sukwuru, ọ bụ́o hite n'avnụrnu ele Ju kpọi, kọvu ma hite n'ẹli ele bụ́o ele Ju.

²⁵Ka bụ nhne o kwuru n'ọkwukwo Hosiya, “M jookwu be ele ke m, ele wam bụ́o ele ke m, ele wam me whnụ́ge n'anya, m jookwu be ele me whnụrnu n'anya.

²⁶Ọ jọobu nụ hne be zị kaa, nụ be bụ́o ele ke m, jọobu hne be jookwu be rụmu Chiokike ke zị bụdnu.”

²⁷“Azaya siri okokoba gbasịri rụmu Izirẹli, kaa, Ọ bụ n'ezi nụ rụmu Izirẹli nụ lele rịzna ke ngeri osimini, ele be jọoznohia jaazị matị k'agịda.

²⁸Kwnornu nụ Jihova jeekpebi ikpe ọwa wara wara n'ome mma.”

²⁹Lele kpa Azaya kwuru nụ mbọm, “Ọ bụru nụ Chiokike ke Meli Nhne Dum dọ́nu aị obirizi ghasanụ aị agwna rụmu, a znernu ọnu lele Sọdom, a znernu ọnu lele Gọmora.”

³⁰Ndaa nhne a jookwu? Ọ bụ nụ ele bụ́o ele Ju ele zá noosno ome mma Chiokike, nwehịaru ome mma ke hi n'ọkwnata mkpọma?

³¹Kọvu ele Izirẹli, noosno iwu ome mma nwée nhne iwu ome mma karụ, be píohịala a.

³²Kịni kpayarụ ka? Kwnornu nụ be jíge ọtukwasi ovu pio a, kọvu lele nụ ọ bụ n'ẹrnu. Be dna n'olu rugwu nọokpobi ọchi.

³³Lele kpa be gbarụ a n'ọkwukwo nsọ, kaa, “Le, m bịtaru m otu akaworugwu nụ rime Zayọni ke jeeme ele badnụ kpọbi ọchi, rugwu ke jeeme be dna. Kọvu nye ọbula ke tụkwasiri a mkpọma, be jéekwe iwhnerne tụ a.”