Read ikwere Ele Filipaị 2 Bible Online

Ele Filipaị 2 - ikwere bible

Ele Filipaị 2

¹Ọ bụru nụ ọgba inwe zịnu aị nụ Karaịsi, ọ bụru nụ ọsnuta mkpọma hite n'ọwhnun'anya a, ọ bụru nụ omekọrita zị n'Enine Nsọ, ọ bụru nụ ovu ọma ọbula nụ obirizi,

²anụ mee ma ovu ọso n'ọnu m zu ozu, anụ nwe otu echiche, otu ọwhnun'anya, anụ zịri n'otu enine nụ echiche.

³Ọ zá nye ọbula mee nhne kwnornu nhne o jeenwehịa mọbu ovu ọjo, kọvu hite nụ badnụ ogwedna ẹhni ẹli, nye ọbula kweru nụ nye berere ka a mma.

⁴Ọ zá nye ọbula ke lebna anya nụ nhne ke a kpọi, kọvu nụ nhne gbasịri ele berere.

⁵Nye ọbula nwe ovu ke Karaịsi Jizọsi.

⁶Nye, ọ bụ n'ezi nụ ọ bụ Chiokike méne a lele nhne anya rikne nụ ya nụ Chiokike hna.

⁷Ọ sịgbasiri kpakara nhne o nwernu, o gweru ọnodi ke nnwọ izi, be mee a lele badnụ etekne.

⁸Ọ whụya iwhne lele badnụ etekne, o gwedna ẹhni a ẹli, o bno nsnị dụ n'ẹnwu, bụ ẹnwu ke olu ọgba.

⁹Kam kpayarụ, Chiokike jiri gwelizọ a olu kakwo kpakara nhne, nyega a rẹwhna ke kakwo kpakara rẹwhna,

¹⁰ke bụ nụ rẹwhna Jizọsi kpakara mpnerne ọchi joogbu, nhne ke zị n'oligwe, ma n'ọwa, ma nụ mkpururu ọwa,

¹¹kpakara riro jookwuhịa nụ Jizọsi Karaịsi bụ Nyenwe aị, ma be nyee Chiokike Nda igwugwu.

¹²Kam kpayarụ, ele me whnụrnu n'anya, anụ noobno nsnị lele kpa anụ neeme, ọ bụ́o nụ ruwhnu m kpọi, ke kakwo, nga me zị́la ndụndu. Anụ gweru ogwnu nụ ọznu biri biri rnụhia ọznohia anụ.

¹³Kwnornu nụ ọ bụ Chiokike nye nọornu ẹrnu nụ rime anụ, nye neeme anụ kweru hite nụ mkpọma anụ, neeme nhne lele kpa echiche a jiri zị.

¹⁴Kpa anụ neeme kpakara nhne, anụ gweme ọtamu nụ agịrigo,

¹⁵ma anụ bụru ele nwée ọtna, ele zị snam, rụmu Chiokike ele nwée ọru nụ rime ebiri ele ọjo ka hịri aghị, hne anụ noonwu lele mbọ n'ọwa.

¹⁶Anụ jikwaru ikwu-ọnu ke bụdnu ka aka rikne, ma m gweru m anụ mee oknomokno n'ọbochi Karaịsi, ke jeegesi nụ m gbáge m ẹso etekne, mọbu ọ dọgbu ẹhni m n'ẹrnu bụ́o nhne etekne.

¹⁷Ọ bụbedi nụ be jọowusi ọvnarna bụdnu m lele arịohna manya n'omezu arịohna, lele kpa ẹrnu ọkwnata ovu anụ bụ arịohna anụ kwannụ Chiokike, ovu nọoso m n'ọnu, m sno m anụ nọonwudna.

¹⁸Anụ n'iwhuru anụ snornu m nwe ovu ọso n'ọnu nụ ọnwudna.

¹⁹M neele anya nụ Nyenwe aị jeekwe me ziyanu anụ Timoti ige matị, ma ovu sọ m n'ọnu nga me jọonu izi gbasịri anụ.

²⁰M nwée m nye berere nụ lele ya, nye nhne gbasịri anụ neemetụ nụ mkpọma n'ezi.

²¹Kwnornu nụ nye ọbula neele anya nụ nhne ke a, ọ bụ́o ke Karaịsi Jizọsi.

²²Kọvu anụ magwụ nụ Timoti gesiri ẹhni a lele nnwọ nụ nda a, o znenu m izi, snornu m rnụ ẹrnu izi ọma.

²³M neele anya nụ m jeeziya a ige matị kpa nhne jaaganụ hna me zị.

²⁴M kwnatarụ m Chiokike ovu nụ me n'iwhuru m jaava whnụ anụ ige matị.

²⁵Kọvu m whnụrnu m nụ ọ bụru ọma me zihnahie Epafroditusi, nnwọ nda m, nụ nye ẹrnu nụ nye ọgwnu ibne m, nye bụ masị nye izi anụ, nye anụ ziyannu m o lebna anya nụ mkpa naakpa m.

²⁶Ọ nọogwnusi a rikne ọ whnụ anụ anya, kwnornu nụ anụ nụrnu nụ ọ rịaru ẹhni igbugbu.

²⁷N'ezi, ọ rịaru ẹhni igbugbu, ọ gwnarnụ matị ọ nwụ. Kọvu Chiokike dọnnu a obirizi, ọ bụ́o ya kpọi, kọvu ma me, ọ zị me nwe nhne igbugbu n'olu nhne igbugbu.

²⁸Kam kpayarụ, ovu nọoso m n'ọnu k'agịda o ziya a. Nga anụ jọowhnu a, ovu jọoso anụ n'ọnu, mkpọma jáala m mini berere.

²⁹Anụ gweru okne ovu ọso n'ọnu nabnanya a nụ rẹwhna Nyenwe aị, anụ sọ ele nụ lele ya anya k'agịda.

³⁰Kwnornu nụ ọ gwnarnụ matị ọ nwụ nụ ẹrnu Karaịsi. O gweruru bụdnu a n'aka a nọornu ẹrnu kpa anụ nwée rikne rnụ.