Read ikwere Ele Hiburu 1 Bible Online

Ele Hiburu 1 - ikwere bible

Ele Hiburu 1

¹N'ige wheru ewhe, Chiokike kwunnu ele nda aị ọknani ọka agịda ige hite n'ọnu ele ọwhnurninya n'apna zị ichne ichne.

²Kọvu kịtna, n'ọbochi ipne-aznụ ka, o kwunnu aị ọka hite n'ọnu Nnwọ a Jizọsi, bụ nye ọ họhiaru ma ọ bụru nye jeeri kpakara mkpe, nye o hiri n'aka a kpụ ọwa.

³O nwernu igwugwu Nda a. Nnwọ wam bụ nhne Nda a bụ. O ji ikwu-ọnu a ke nwernu iknernema jigidne kpakara nhne. O jiri aka a snụsnama mmehie ọwa. Nga o mekworu ka, ọ dazịri ẹli n'akarikwnunga Chiokike n'oligwe, nye kakwo kpakara nhne n'olu.

⁴Nnwọ wam kakwo ele enine izi lele kpa rẹwhna a “Nnwọ,” ke Chiokike nyernu a kakwo rẹwhna be.

⁵Kwnornu nụ ọ zá enine izi ọbula ke Chiokike kannụ, “Ji bụ Nnwọ m. M ghọlam Nda ị tna.” Mọbu, ọ zị́ masị enine izi ke Chiokike kannụ, “M jọoburunu ị Nda, ị jọoburu Nnwọ m.”

⁶Nga Chiokike neeziya Nnwọ a nụ rime ọwa, ọ kaa, “Kpakara ele enine izi Chiokike kpọnu a risi ẹli.”

⁷Ka bụ nhne Chiokike kwuru gbasịri ele enine izi, “Chiokike mernu ele enine izi a lele ruwhere, ele izi a lele bẹkwnu neerne erne.”

⁸Kọvu nhne gbasịri Nnwọ wam, Chiokike karụ, “Chiokike, ngadna eze i jaazị tim tọm, Mkpara ẹli-eze i bụ ikpe zị snam.

⁹Ị whnụrnu nhne ọma n'anya, sno nhne ọjo irno, kam kpayarụ, Chiokike, bụ Chiokike i teru i mọno ovu ọso n'ọnu, bịta ị nụ hne kakwo kpakara ele ibne i.”

¹⁰Ọ kaa, “Jị Jihova, ị tụru ntụ-ẹli ọwa hite nụ mbọm. I ji aka ị lawụru kpụ oligwe.

¹¹Kpakara be joowhu, kọvu ị jaazị ọkwnukokwnu. Be jaaka bụka lele iwo.

¹²Ị jaapịakota be lele iwo olu, be jaagbanwo be lele ikpe, kọvu ị zị kpa ị zị nụ mbọm, ọnu ọgwnugwnu awha ị jéebi ebi.”

¹³Ọ zá enine izi ọbula ke Chiokike kannụ, “Dazịri ẹli n'akarikwnunga m tem dụ nga me jaabịta ele irno i lele nhne ị jọotukwasi ọchi ị lawụru.”

¹⁴Ele enine izi, kpakara be bụ́o ele o ziyaru o yinu ele jeekehịa ọznohia aka sa?