Read ikwere Ele Hiburu 10 Bible Online

Ele Hiburu 10 - ikwere bible

Ele Hiburu 10

¹Iwu wam bụ enine nhne ọma ke jaava, ọ bụ́o nhne wam, kam kpayarụ, o nwée rikne hite nụ arịohna ke be naakwa ige ọbula mee ele naava ọ kpọ risi ẹli zu ozu.

²Ọ bụru nụ ele neekpenu Chiokike zị rịchna nụ rime ovu, ikpe mmehie ba mána be. Kpakara ọkwa arịohna znernu okwome.

³Kọvu kpakara arịohna wam bụ nhne ke neechenwanyanụ be mmehie be hite n'awha dụ n'awha.

⁴Kwnornu nụ ọvnarna ehni nụ owu nwée rikne vume mmehie.

⁵Kam kpayarụ nga Karaịsi varụ n'ọwa, ọ karụ, “Arịohna nụ nkesi ruwhnu ọma másige i, kọvu ị bịtannu m anọ-ẹhni o bnonu ị nsnị.

⁶Ovu zá nọoso ị n'ọnu kwnornu arịohna ọkporne bẹkwnu mọbu arịohna mmehie.

⁷M kaa, ‘Chiokike, le, m valẹm o mee nhne i pioru me mee, lele kpa be gbarụ nhne gbasịri m n'ọkwukwo nsọ.’ ”

⁸Ke mbọm, ọ karụ, i píole arịohna nụ nkesi ruwhnu ọma, mọbu arịohna ọkporne bẹkwnu mọbu arịohna mmehie, ọ bụ n'ezi nụ iwu wam karụ be mee kpam.

⁹Ọ kaa, “Chiokike, le, m valẹm o mee nhne i pioru me mee.” O gwemernu nhne ke mbọm ma ọ zị kpa o gwuzote nhne ke ẹbo.

¹⁰Kwnornu nụ Jizọsi Karaịsi mernu nhne Chiokike pioru o mee, ọ snụsnamarnu mmehie aị hite n'arịohna ke o jiri ẹhni a kwa otu mgba ke zuru ọhna.

¹¹Nye ọkwa arịohna ọbula noogwuzo kpakara ọbochi nọornu ẹrnu a, naakwa otu arịohna agịda ige. Kọvu kpakara arịohna ka nwée rikne noovume mmehie.

¹²Kọvu nga nye arịohna ka kwarụ arịohna ke zị ọkwnukokwnu kwnornu mmehie, ọ dazịri ẹli n'akarikwnunga Chiokike.

¹³Hite n'ige wam, ọ zị neese ige Chiokike jaabịta ele irno a lele nhne ọgbakwasi ọchi a.

¹⁴Hite nụ otu arịohna, o mernu ele zị snam hite nụ mmehie zu ozu ọkwnukokwnu.

¹⁵Enine Nsọ naagbanụ aị akebne ka hite nụ nhne o kwuru nụ mbọm,

¹⁶“Ka bụ njọ-ẹhni ke me nụ be jaagba, n'ọbochi ke jaava, bụ nhne Jihova kwuru, m jeeyisi iwu m nụ rime ovu be, m jaagbakwasị be n'echiche be.”

¹⁷Ọ kaa kwno berere, “M jéechenwanya arụru-ẹli be, nụ mmehie be berere.”

¹⁸Kịtna, ọ gbarụnnu be kpakara mmehie be, arịohna berere zá kwnornu mmehie.

¹⁹Kam kpayarụ, rụmu nda m, a nwernu ovu siri rikne ọ bnazne nụ Hne Kakwo Nsọ hite n'ọvnarna Jizọsi.

²⁰Ọ gbamannụ aị apna ikne ke zị bụdnu hite n'ikpe obnosni wam ke bụ anọ-ẹhni a.

²¹A nwernu nye risi arịohna ke kakwo, nye neelegidne ọro Chiokike anya.

²²Ngwa ma a gweru mkpọma zị rịchna nụ ezi ọkwnata ọvu, nụ ovu ikpe mána vakwnusi Chiokike, ya nụ ẹhni be jiri mini zị rịchna snụsnama.

²³Ngwa ma a knetasị olile anya ke ọkwnata ovu aị aka rikne, kwnornu nụ nye kweru aị mkwna jaabịta mkwna o kweru.

²⁴A gbalị mee nhne joovulizọ ọwhnun'anya n'ovu ibne aị hite n'ọrnu ẹrnu ọma.

²⁵A ghása ọgbako rụmu nda n'otu lele kpa agwna ele badnụ neeme. Kọvu a kwnagidne ibne aị ke kakwo kpa ọbochi wam naava ndụndu.

²⁶Ọ bụru nụ a jaazị kọriri neeme mmehie hne a nụrnu ezi ọka wam, ọ zá arịohna berere be jaakwa kwnornu aị.

²⁷Kọvu nhne ke gwnarnụ bụ olile anya ke tụ ogwnu ke ikpe, ya nụ ke okne bẹkwnu ke jeerne ele neemegidne Chiokike.

²⁸Nye ọbula ke dnarnụ Iwu Mozizi nwụrnu ẹnwu hne badnụ lawụru mọbu ẹto gbagidnernu a akebne, be dọ́nnu a obirizi.

²⁹Anụ le kpa ikpe wam jaazị rikne bụ awhnụwhnu nye wam jaata bụ nye lednarnụ Nnwọ Chiokike anya, nye kpọ́ge ọvnarna ọgba-njọ-ẹhni ke Chiokike nhne, ke snụsnamarnu mmehie a, nye lednarnụ Enine Nsọ ke oru anya.

³⁰Kwnornu nụ a magwụ nye karụ, “Mawa nwe mmegwnahịa, m jeemegwnarnụ.” Jihova kwuru berere, “Jihova jeekpe ele ke a ikpe.”

³¹Ọ bụ nhne tụ ogwnu ọ dnabna n'aka Chiokike ke zị bụdnu.

³²Anụ chenwanya ọbochi ele ke wheru ewhe kpa anụ snụrnu ovu kpa iwhne Karaịsi mụkwasiri anụ nụ rime kpakara awhnụwhnu.

³³Agwna ige anụ bụru ele be kpasịri iwhnerne n'ọhna, ige berere anụ dasịri ele berere be neemegbu emegbu n'ikwnu.

³⁴Anụ dọnnu ele zị n'ikelu obirizi. Nga be nahọru anụ nhne anụ nwernu, ovu sọru anụ n'ọnu kwnornu nụ anụ magwụ nụ anụ nwernu ẹkwnu ke jaazị ọkwnukokwnu n'oligwe.

³⁵Anụ túwhu ovu osi rikne anụ, o jeenwe ọgwo ẹrnu zị agịda.

³⁶Anụ snụta ovu ma anụ nwernu rikne mee nhne Chiokike pioru, nahịa masị nhne o kweru nụ mkwna.

³⁷Kwnornu, “Ige matị, nye wam jaava bụ nye jaava, o jóogbu ọkwnu.

³⁸Kọvu, nye mee mma ke m jeehi n'ọkwnata ovu zịri bụdnu, ọ bụru nụ nye ọbula lahna aznụ, nhne gbasịri a jọ́oso m ovu n'ọnu.”

³⁹Kọvu a bụ́o ele naalahna aznụ, whu etekne, a bụ ele kweru dụ n'ọznohia mkpụru ovu.