Read izere aMatiyu 14 Bible Online

aMatiyu 14 - izere bible

aMatiyu 14

¹Nizen iyong, aHiridus tá fok itak aYeso.

²Ayong a fe̱ be áfe itomong wu ye, “Aner'e nye aYohana aner abatisma, wu ne ku dorok nure̱k. Iyong ne i sak a ta nye ike̱re̱ azhing anong.”

³Kamok aHiridus tsang a yiir aYohana nong a tá rosom ne a ku te nitso̱m kamok aHirudiya, abining aronyining wu, aFilibus.

⁴Kamok aYohana ta yiir ife̱ be wu ye, “I se gye̱r a tá sok aHirudiya nong a tin nye abining baꞌ.”

⁵aHiridus tsang a shim ke a fe̱r aYohana, amma a ra fok inyim kamok ánerawe sok ye aYohana nye aner kuzarap Adakunom.

⁶Katuk kukak izen kunye riye̱ rikan kuyiring be kutes aHiridus tá fa nye, angas aHiridus tá to nato nasho̱o̱n ánerawe a ta tseng sak ma aHiridus nye riye̱ rikan dide̱ng.

⁷Ayong aHiridus no̱o̱k kuto̱ ye, wu tu ku no̱o̱k ike̱ng iya wu tá shim.

⁸Ango̱ wu tú ku tak ike̱ng iya a tana fe̱, yong a fe̱ ye, a ra ku no̱o̱k rice aYohana aner abatisma kaye̱e̱r kures.

⁹aHiridus'e daam dide̱ng, amma kamok wu tá tsang a no̱o̱k kuto̱ nasho̱o̱n ánerawe, yong a sak a tu ku no̱o̱k ike̱ng iya wu tá rip.

¹⁰A tom á ta se te̱n rice aYohana'me nitso̱m.

¹¹Iyong á be̱ be rice'me kaye̱e̱r kures. Á ta no̱o̱k kanamang ame. Ne kanamang ame sok a tá se no̱o̱k ango̱ wu.

¹²Álimazhiri aYohana be̱ á tá sok kubir kuro̱m'me nong a ta se ne̱r'e. Ne á se tak aYeso ike̱ng iya i tá nye.

¹³Nizen aYeso tá fok itak'e, iyong a dorok azong a tá no̱ nukpara ashi a tá be naro̱ kakak wu ze̱r. Ánerawe tá fok anong ye, á won kuwo̱p'e ayong á tú ku kuus be atak.

¹⁴Nizen aYeso tá wuruk kaye̱e̱r kukpara ashi'me, a di rigwo̱m ánerawe ame, ne a fok kuro̱ riye̱ ba iyong a sak áya a ta nye atser kaye̱e̱r ba baꞌ, tá te atser.

¹⁵Kawheshirim tá fa nye, álimazhiri wu be̱ nufu á tá fe̱ ye, “Aze nye katse, izen m bo̱ karo̱. Won ánerawe nong á ta tseng ni iwo̱p i ta se bubarak nong á ta se shan naya.”

¹⁶aYeso fe̱ be ba ye, “Sang ma ba tseng baꞌ. Yin ku no̱o̱k yin ba ike̱ng ikak nong á ta ya.”

¹⁷Iyong alimazhiri'me fe̱ be wu ye, “Yir be yir agbang abiredi atoon be izos ifa aze tsek.”

¹⁸aYeso fe̱ be ba ye, “Ni no̱o̱k yin aze.”

¹⁹Ne aYeso fe̱ be ánerawe'me ye á ra sosok kaben natoon agam. A sok ágbang abiredi atoon ame be izos ifa'me, a tá sok rice naza a tá tonong riye̱ rikan wu be Adakunom ne a te̱se̱ng. Ne a no̱o̱k álimazhiri wu nong álimazhiri wu'me ta kasap ánerawe'me.

²⁰Ánerawe'me cice̱r ya ma á whas, ne álimazhiri'me bun á tusung ribir'e ife i tú ku tuk ma ishining iderse kuso̱ be afa.

²¹Áner afe a tá ya nye átek izungu itoon ze̱e̱r be ányining ne inoon.

²²Nama anong, aYeso sak álimazhiri wu tá no̱ kaye̱e̱r kukpara ashi nong á ta tar nunyi kudung'e nasho̱o̱n wu nong wu ta te ánerawe'me niren.

²³Nizen aYeso tú ku te ba niren. A se ngarak natoon kawhanang wu ze̱r nong a tá nye aduwa. Nizen kawheshirim tá fa nye, aYeso se azong wu ze̱r.

²⁴Amma kukpara ashi'me se natite ashi, agung ashi tú ku daam ba dide̱ng kamok kuwun tu se dide̱ng.

²⁵Nabas itso̱m inaas ife kadiding, aYeso ti wuruk niba. A tá tseng natoon ashi.

²⁶Nizen álimazhiri'me tú ku di a tá sen tseng natoon ashi, inyim tu ro̱ ba, ma á korok ikun, ne á fe̱ ye, “Ike̱ng'e nye itseng.”

²⁷aYeso wor a fe̱ be ba ye, “Na ka tsesek yin, mi'ong. Sang yin tu fok yin inyim baꞌ.”

²⁸Ayong aBitrus fe̱ be wu ye, “Atekasa, ke aner'e nye wan ne i fe̱ be nong mi tá be̱ nufuan natoon ashi'me.”

²⁹aYeso fe̱ be wu ye, “Be̱.” Ayong aBitrus wuruk kaye̱e̱r kukpara ashi'me a ta san kutseng natoon ashi ame a be nufe aYeso.

³⁰Amma nizen a tá fok kuwun'e tá fe̱se̱m a fok inyim, ne a san ku wei kaye̱e̱r ashi'me yong a tá kukun ye, “Atekasa, ni shesh!”

³¹aYeso wor a nabak kubo̱k zizirik a tú ku ko̱ro̱k. Ne a fe̱ be wu ye, “Wan afe kuno̱o̱k katsak wan ta gop baꞌ. Akye̱ sak riye̱ wan se gak e̱?”

³²Nizen iya á tá fa no̱ ba kaye̱e̱r kukpara ashi'me ne kuwun'e nyeseng.

³³Áya a ta se kaye̱e̱r kukpara ashi'me tú ya iben ne á fe̱ be wu ye, “Katsak'e, wan nye Igon Adakunom.”

³⁴Nizen á ta tar á be niben aGenesaret.

³⁵Áner kuwo̱p'e tá di aYeso á ren. Iyong á tsang á taas itak'e cei ni iwo̱p ibubarak'e. Ánerawe'me be̱s be áfe iro̱k nufu.

³⁶Ne á ku nye izong ye, a ra shim nong á ta ras kanu kukpiin wu tsek. Áya a tá ras cice̱r te atser.