Read izere aMatiyu 16 Bible Online

aMatiyu 16 - izere bible

aMatiyu 16

¹Áner aFarisi ne áfe aSadusi be̱ nufe aYeso nong a tú ku bo̱mo̱ng ye, a ra nye ike̱ng ikak ife azhing iya i tana tonong ye wu ne naza.

²aYeso fe̱ be ba ye, “Ke kawheshirim nye kaza seng ne yin fe̱ yin ye, kawheshirim, karo̱'me tà sas.

³Nadiding ne yin fe̱ yin ye, iza tà kpa katuur kamok yin ta di yin ane̱n ta tisik. Ke yin kyem i fe̱ yin itak natoon kuse kaza, amma yin kyem i fe̱ yin itak natoon ike̱re̱ i ta tseng kyo̱o̱rna baꞌ.

⁴Ámaan anerawe, áfe a ta won katsak áfe izam iyu shim a ta di itomong azhing, amma a ta ka nye ba'me baꞌ, ma ke ife aZhona.” Ayong aYeso dorok a tú ku won ba á ta tseng.

⁵Nizen ba ta tar agbang kudung ame álimazhiri tiburum abiredi ba.

⁶Ayong aYeso fe̱ be ba ye, “Nye yin tatan be ayisti áner aFarisi ne áfe aSadusi.”

⁷Ne á san ibo̱ro̱ng awan ba ye, “Ka kamok yir ta be yir abiredi baꞌ e̱?”

⁸aYeso tá ren ike̱ng ba ta sen ninye ibo̱ro̱ng natoon'e, yong a fe̱ be ba ye, “Yin áfe kuno̱o̱k katsak yin ta gop baꞌ, akye̱ sak yin sen fe̱ yin natoon abiredi e̱?

⁹Yin ren yin aꞌa? Yin ru yiring yin ágbang abiredi atoon ánerawe izungu itoon tá ya aꞌa? A ku tusung ribir'e iderse imang e̱?

¹⁰Ka izen ife mi tá no̱o̱k áner izungu inaas agbang abiredi kanataar a tá ya, iderse imang ne yin ku tusung yin ribir e̱?

¹¹Akye̱ sak yin ren yin ye, sang natoon abiredi ne mi sen nife̱ baꞌ e̱? Mi fe̱ ye, nye tatan be ayisti aner aFarisi ne áfe aSadusi.”

¹²Iyong álimazhiri'me ren ye sang aYeso ti fe̱ natoon ayisti a tin nye abiredi baꞌ. A ti fe̱ natoon kubo̱so̱p áner aFarisi ne kufe áner aSadusi.

¹³Nizen aYeso tá no̱ niben aKaisariya aFilipi, yong a rip álimazhiri wu ye, “Ánerawe fe̱ ye, mi, Igon Anerawe, mi nye angan e̱?”

¹⁴Iyong á fe̱ be wu ye, “Ákak fe̱ ye, aYohana aner abatisma; ákak fe̱ ye Iliya; ne ákak bun á fe̱ ye Irimiya; ka akak kaye̱e̱r aner kuzarap ayi.”

¹⁵aYeso tú ku rip ba ye, “To̱, yin ne̱? Yin fe̱ yin ye mi nye angan e̱?”

¹⁶Ayong aBitrus fe̱ be wu ye, “Wan ne i nye aKiristi, Igon Adakunom afe kuter.”

¹⁷aYeso fe̱ be wu ye, “aSiman igon aZhona, wan nye aner riye̱ rikan kamok sang anerawe ne a ta tonong iyu baꞌ, ma ke Ada mi afe a ta se kaye̱e̱r kaza ne a ta ka tonong.

¹⁸Kamok anong, mi fe̱ be wan ye, wan ne i nye aBitrus natoon kuta na ne mi tin no̱k ikilisiya mi, iya sang agap riku tana kyem a canang baꞌ.

¹⁹Mi tà ka no̱o̱k akarak kanukutu rigwo̱m kaza. Ike̱ng iya ne wan ros nazatse i ta se nurosom kaye̱e̱r kaza. Ike̱ng iya ne wan bisik nazatse i ta se nubisik kaye̱e̱r kaza.”

²⁰Ayong a kpam álimazhiri wu ye, sang á tu tak akak ye, wu ne a nye aKiristi'me baꞌ.

²¹Kum be izen iyong, aYeso san kufe̱ be álimazhiri wu kanang ye ma wu tseng na aUshalima nong a ta se so̱ iriri risam dide̱ng nibo̱k asho̱n be ágbang atsi ne áner kubo̱so̱p itsi ma a tà ku fe̱r. Nama inom itaar a tà ku dorok be kutser.

²²Ayong aBitrus tú ku yis nukim a tá fe̱ be wu ye, “Adakunom ra roon'e, Atekasa, ike̱ng kuri iyu tà ka se̱ baꞌ.”

²³Amma aYeso kirik a tá fe̱ be wu ye, “Kam be mi, Ishetan, wan sor ike̱ng mi tanin turuk kutak. Wan to̱ natoon ike̱re̱ iya Adakunom ta shim baꞌ, ma ife rinerawe.”

²⁴Ayong aYeso fe̱ be álimazhiri wu ye, “Ke akak shim a tin kuus ma a rawu rice wu ne a sok kukon ku kutigak wu ne ni kuus.

²⁵Koangan afe a ta shim a tà shesh kutser wu, a tin wei, aner aya a ti wei nutser wu kamok'i a ta se̱.

²⁶Akye̱ kuri ike̱ng itek ne anerawe ta se̱ ke wu se̱ kazatse na kusum, amma a ti wei nutser wu e̱? Ka akye̱ ne anerawe tà no̱o̱k nong a tin shishing be kutser wu e̱?

²⁷Kamok Igon Anerawe tà be̱ be kuyiik Ada wu ne kufe ámaleka nong a tà no̱o̱k koangan ishorong itomong wu.

²⁸Won ta ka tak yin katsak'e, ákak kaye̱e̱r yin aze ta tsang á kus baꞌ, ma á di Igon Anerawe ta saase kyo̱ndi Agwo̱m kaye̱e̱r kuyiik wu.”