Read izere aMatiyu 17 Bible Online

aMatiyu 17 - izere bible

aMatiyu 17

¹Nama inom igataar aYeso sok aBitrus, be aYakub, ne aYohana a tà nye aronyining aYakub, nong a tá tseng be ba natoon kawhanang kakak ka ta se garang dide̱ng.

²Iyong kanyisi wu shishing nasho̱o̱n ba. Kanyisi wu'me te kanang kyo̱ndi kunom ne ares wu kare̱p pes.

³Gbashak, ne aMusa be Iliya a tá nye áner kuzarap wor á ti wuruk ni ba ne á fe̱ kanu be aYeso ame.

⁴Ayong aBitrus fe̱ be aYeso ye, “Atekasa, i se gye̱r yir ta se yir aze. Ke wan shim, mi tà nye abur ataar aze, kuzining tà nye kufuan ne kuzining nye kufe aMusa ne kuzining nye kufe Iliya.”

⁵Kum ne a ru fe̱ kanu, kune̱n kukak ku ta se kanang be̱ ku tú kis ba ne kuto̱ kukak wuruk naza ye, “Ayu ne a nye Igon'i kaya mi ta shim. Mi fok kasas wu dide̱ng. Ku fok yin kuto.”

⁶Nizen iya álimazhiri'me tá fa fok anong, iyong inyim tú ro̱ ba ma á kpas ba kaben.

⁷Ayong aYeso be̱ nong a tú ku dorok ba, a tá fe̱ ye, “Dorok yin, sang tú fok yin inyim baꞌ.”

⁸Nizen á tá sok ace ba naza ne a di aYeso tsek, ko á di akak baba baꞌ.

⁹Nizen iya á tá sen tisik natoon kawhanang ame, aYeso tu ku kpam ba ye, “Sang yin tú tak yin akak ike̱ng iya yin tá di yin na baꞌ, ma ke a dorok Igon Anerawe nure̱k nizham.”

¹⁰Álimazhiri'me tú ku rip ye, “Akye̱ sak áner kubo̱so̱p Itsi fe̱ ye, ma Iliya san kube̱ ni ime̱se̱ng e̱?”

¹¹aYeso fe̱ be ba ye, “Katsak'e, Iliya tà be̱ ni ime̱se̱ng'e nong a tà be̱ nye koakye gye̱r.

¹²Amma mi fe̱ be yin ye, Iliya m be̱, ba tú ku ren baꞌ, ma á tú ku nye ike̱ng iya ba tá shim. Anong ne Igon Anerawe tà so̱ risam nubo̱k ba gip.”

¹³Ayong álimazhiri ame ma ren ye, a sen ni fe̱ natoon aYohana aner abatisma.

¹⁴Nizen iya ba tú ku bun nufe rigwo̱m ánerawe ame, aner akak be̱ nufe aYeso a tá tigbok akuur kaben nasho̱o̱n wu.

¹⁵A tá fe̱ ye, “Atekasa, ro̱ riye̱ igon'i, kuro̱k ricirim kudaam, a se risam dide̱ng. Nizen ikak a man ne a kpa nuro̱ng ka na ashi ayi.

¹⁶Mi tseng be wu nufe álimazhiri wan, amma ko ba kyem á tú ku sak a tá te atser baꞌ.”

¹⁷Ayong aYeso fe̱ be wu ye, “Kaꞌ yin ánerawe izam na i tá shonong yin, yin be yin kuno̱o̱k katsak baꞌ. Ma ane̱ ne mi ta sor mak be yin e̱? Ma ane̱ ne mi ta naka mak tsesek be yin e̱? Be̱e̱n yin be acam'me aze.”

¹⁸Ayong aYeso zhe̱e̱r amaan kabik ame ne ka wuruk kaye̱e̱r igon ame. Ne igon ame wor ka te katser.

¹⁹Ayong álimazhiri'me be̱ nufe aYeso kyo̱o̱n nong á tú ku rip ye, “Akye̱ sak yir kyem i tun yir amaan kabik'e baꞌ e̱?”

²⁰aYeso fe̱ be ba ye, “Kamok kuno̱o̱k katsak yin gop baꞌ. Won ta ka tak yin katsak'e, ke a fa fe̱ ye kuno̱o̱k katsak yin se hiir kyo̱ndi ica amusta ke yin kyem i fe̱ yin be kawhanang na ye, ‘Dorok aze ta be aza,’ ka tà dorok. Ike̱ng ikak tà ka gaar yin kunye baꞌ.”

²¹[Amma ike̱ng kuri iyu ta kyem i wuruk baꞌ ma be aduwa ne azumi.]

²²Nizen iya á tá se karo̱ kazining na aGalili, aYeso fe̱ be álimazhiri wu ye, “A tà no̱o̱k Igon Anerawe nubo̱k ánerawe.

²³A tù ku fe̱r, katuk afe ataar a tù ku dorok be kutser.” Iyong álimazhiri wu nye riye̱ riwe dide̱ng.

²⁴Nizen iya aYeso be álimazhiri wu tá no̱ kaye̱e̱r aKapanum, áfe ku shashang itso̱m kamok karo̱ kuya Adakunom iben be̱ nufe aBitrus nong á tú ku rip ye, “Aner kubo̱so̱p yin karang yin itso̱m karo̱ kuya Adakunom iben a?”

²⁵aBitrus fe̱ be wu ye, “Ei, a karang.” Nizen iya aBitrus tá no̱ kaye̱e̱r kasa'me, aYeso fe̱ be wu ni ime̱se̱ng'e ye, “aBitrus, wan di ane̱ e̱? Ágwo̱m kazatse shashang itso̱m iben angan e̱? Á shashang nufe inoon ba ka nufe ákak ze̱e̱r e̱?”

²⁶aBitrus fe̱ be wu ye, “Nufe ákak.” Ayong aYeso fe̱ be wu ye, “Á wosong inoon ba.

²⁷Gip be anong, nong fan ánerawe bu beseng aye̱ be yir, tseng nudung ta se te agunung wan. Sok izos ife ime̱se̱ng'e wan ta yiir nong ta ngamang kanu'me, wan tà se̱ ica itso̱m kaye̱e̱r'e. Sok tá su ku karang mo ba itso̱m inaan be ifuan.”