Read izere aMatiyu 18 Bible Online

aMatiyu 18 - izere bible

aMatiyu 18

¹Nizen iyong, álimazhiri'me be̱ nufe aYeso nong á tú ku rip ye, “Angan nar yiik cice̱r kaye̱e̱r rigwo̱m kaza e̱?”

²Ayong aYeso yis igon kakak kahiir'e nong a tú ku sak a tá nyeseng natite ba.

³Ne a fe̱ be ba ye, “Won ta ka tak yin katsak'e, sang ke yin shishing yin kuse yin nong i tà te yin kyo̱ndi inoon nazhizhe̱k'e baꞌ, yin tà no̱ yin kaye̱e̱r rigwo̱m kaza baꞌ.

⁴Koangan afe a ta sok rice wu kyo̱ndi igon na, wu ne a nar yiik kaye̱e̱r rigwo̱m kaza.

⁵Koangan afa a ta shan igon kahiir'e kyo̱ndi kayu na kaye̱e̱r riyerek mi, mi ne ti shan.

⁶“Ke aner akak sak azining kaye̱e̱r azhizhe̱k'e na, aya a tá min no̱o̱k katsak natoon'i, ta nye rine̱n, i tu ku nar a tu ku roos agbang kuta ako̱ nong a tu ku barak kaye̱e̱r agbang kudung tsik.

⁷“Awo̱ be kazatse kamok ike̱re̱ i ta sak ánerawe ta nye rine̱n. Ike̱re̱'me tà be̱s dim, amma awo̱ be aner aya a tana sak akak ta nye rine̱n.

⁸Ke kubo̱k wan ka kutak wan tà sak wan ta nye rine̱n ne i te̱n nong ta barak. I ta ka nar wan tà se̱ kutser kufe izen izen dar kubo̱k ka kutak be wan tana no̱ nuro̱ng kufe izen izen be ibo̱k ifa ka be atak afa ayi.

⁹Ke rinyisi wan tà sak wan tà nye rine̱n, ne i tun ta barak. I ta ka nar wan ta se̱ kutser izen izen be rinyisi rizining be a tana ka barak kaye̱e̱r kuro̱ng kufe izen izen be anyisi afa.

¹⁰“Sak yin riye̱ sang yin tu zhe̱e̱sh yin azining kaye̱e̱r azhizhe̱k'e na baꞌ, kamok mi kun ka tak yin ye, ámaleka ba kaye̱e̱r kaza yiir iye̱re̱k kanyisi Ada mi a ta se kaye̱e̱r kaza.

¹¹[Kamok Igon Anerawe be̱ nong a ta shesh ike̱ng iya i tá wei.]

¹²“To̱, yin di yin ane̱ e̱? Ke aner akak be itsamang kuso̱k inyak ne izining wei. A ta won iso̱k katonbo̱k be katonbo̱k'e nong a ta tseng ni itse̱r izining i ta wei'e aꞌa?

¹³Won ta ka tak yin katsak'e, izen iya ne a se̱, a ta nye riye̱ rikan kamok izining'ong ne a nar iso̱k katonbo̱k be katonbo̱k'e i ta rusek.

¹⁴Anong ne Ada yin aya a ta se kaye̱e̱r kaza shim, azining kaye̱e̱r inoon nazhizhe̱k'e na ta wei baꞌ.

¹⁵“Ke aronyining wan ta ka nye rine̱n, ne wan tseng nufu awan yin afa nong ta su ku tak rine̱n wu. Ke a fok rife̱ wan, i nye ye, wan tu bun be aronyining wan niren.

¹⁶Amma ke a ta fok baꞌ, ne wan tseng be aner azining ka afa ayi, nong a ta sor asheda áner afa ka ataar ayi.

¹⁷Ke a gaar ku ka fok ba ne wan tak áfikuus; ke a bun a gaar rife̱ áfikuus'e gbak ne a ku sok kyo̱ndi afurin, aya a ta gaar kushishing kuse wu.

¹⁸“Won ta ka tak yin katsak'e, koakye ike̱ng ne yin roos yin aze nazatse i ta se nurosom kaye̱e̱r kaza. Koakye ike̱ng ne yin bisik yin nazatse i ta se nubisik kaye̱e̱r kaza.

¹⁹“Mi bun i fe̱ be yin gbak ye, ke áner áfa kaye̱e̱r yin áya kuto̱ro̱ng ba ta se kuzining rip ike̱ng ikak, Ada mi afe a ta se kaye̱e̱r kaza ta ka nye ba'me.

²⁰Kamok karo̱ afe áner afa ka ataar tu ku nyim kaye̱e̱r riyerek'i, mi se azong mak be ba.”

²¹Ayong aBitrus be̱ nufe aYeso a tú ku rip ye, “Atekasa, kutak kumang ne mi ta nye aronyining mi igaas e̱? Kutak kanataar a?”

²²aYeso fe̱ be wu ye, “Won ta ka tak, kutak kanataar tsek baꞌ, amma iso̱k kanataar be kanataar. [14]

²³“Kamok anong a kyem a maas rigwo̱m kaza be agwo̱m akak a tá shim ásam wu tu ku karang ike̱ng ife wu tú ku kuus ba.

²⁴Nizen iya a ta san kufa'me a tu be̱e̱n aner akak wu tú ku kuus itso̱m atalen izungu kuso̱k (10,000).

²⁵Kamok asam'me ta kyem a karang kuta a tu ku kuus'e baꞌ, yong atekasa'me fe̱ ye, a ra re̱p asam'me be abining wu ne inoon wu be ike̱re̱ wu cice̱r nong a tin karang kuta'me.

²⁶“Ayong asam'me kpa nasho̱o̱n atekasa wu ame a tá fe̱ be wu ye, ‘Mi ta ka nye izong. Te kuta riye̱, mi ta ka karang cice̱r ike̱ng wan tin kuus.’

²⁷Atekasa wu'me fok kuro̱ riye̱ wu, yong a tú won kuta'me ne a ku won a ta tseng.

²⁸“Amma nizen asam ame tá wuruk a sen tseng iyong a nyim be afudang wu asam akak wu tú ku kuus kuta itso̱m aDinari kuso̱k inyak. A tu ku yiir kpa ne a fe̱ be wu ye, ‘Ni karang kuta itso̱m'i.’

²⁹“Asam afudang wu ame kpa kaben nong a tá fe̱ be wu ye, ‘Mi ta ka nye izong. Te kuta riye̱, mi ta ka karang.’

³⁰“Amma asam ame rawu tanka, yong a tseng be wu nitso̱m ma nizen a tu ku karang kuta wu ame.

³¹Nizen iya ásam ákak tá di anong, riye̱ ba beseng dide̱ng yong á se tak agwo̱m ba ike̱re̱'me cei.

³²“Ayong atekasa ame yis asam ame kaye̱e̱r'e a tá fe̱ be wu ye, ‘Wan amaan asam, mi tá ka won kuta mi tá ka kuus cei kamok wan tin nye izong.

³³Aser, i se gye̱r wan ta ro̱ riye̱ afudang wan kyo̱ndi mi tá ro̱ riye̱ wan aꞌa?’

³⁴Riye̱ agwo̱m ba'me beseng dide̱ng yong a sak a tu ku te nitso̱m ma a karang kuta a tú ku kuus.

³⁵“Anong ne Ada mi a ta se kaye̱e̱r kaza ta nye be koangan afe a ta nye áfudang wu igaas be riye̱ rizining.”