Read izere aMatiyu 20 Bible Online

aMatiyu 20 - izere bible

aMatiyu 20

¹“Rigwo̱m kaza se kyo̱ndi atekasa akak a tá wuruk nadiding bop, nong a tá se sok ánerawe nong á tá su ku nye itomong riko̱.

²Á tin sak ye, wu ta karang koangan ba itso̱m kuwoso alebura ne a ku tomong ba riko̱ anap wu.

³“Nabas itso̱m katonbo̱k a wuruk, ne a di se̱ áner ákak á tan sosok kpe̱de̱ng dar ike̱ng kunye nanu karo̱ rizhik.

⁴Ayong a fe̱ be ba ye, ‘Yin gip tseng yin riko̱ mi nong tá sen nye yin itomong, mi tà ka karang yin gye̱r.’ Iyong á tseng ba.

⁵A tá bun a wuruk nunom nabas itso̱m itaar gbak, a bun a sok áfe itomong akak gbak.

⁶Nabas itso̱m itoon, a bun a wuruk ne a di áner ákak tan nyeseng kpe̱de̱ng dar ike̱ng kunye, iyong a fe̱ be ba ye, ‘Akye̱ sak yin woso yin dar ike̱ng kunye e̱?’

⁷“Á fe̱ ye, ‘Kamok sang akak ti no̱o̱k yir itomong baꞌ.’ “Ayong a fe̱ be ba ye, ‘Yin gip, tseng yin riko̱ mi.’

⁸“Kawheshirim tá fa nye ne atek riko̱'me fe̱ be aner a tin sak riye̱ riko̱'me ye, ‘Yis áfe a tin nye itomong nong i tú ku karang ba ishorong ba, san kukarang áfe a tá be̱ nama ne i ma karang áfe a tá be̱ ni ime̱se̱ng'e.’

⁹“Áfe a tá be̱ nabas itso̱m itoon, koangan ba shan itso̱m kuwoso.

¹⁰Iyong áfe a tá be̱ ni ime̱se̱ng sor ye a tú ku no̱o̱k ba ike̱ng i ta nar anong. Amma koangan ba se̱ itso̱m kuwoso gip.

¹¹Nizen á tá shan itso̱m'e, á fe̱ nyinye̱m be atek riko̱'me ye,

¹²‘Áya á tu ku sok ba nigang'e nye itomong nizen cie̱k tsek, amma wan tú ku karang ba tite̱re̱ be yir áya i tá nye yir itomong kuwoso ne kunom ni ya yir.’

¹³“Atek riko̱'me fe̱ be azining kaye̱e̱r ba ye, ‘Di, are̱, mi tá mo̱o̱r baꞌ. Wan fe̱ ye wan tin nye itomong nuwoso aꞌa?

¹⁴Shan itso̱m wan ta tseng. Ke mi shim riye̱ mi, mi ta karang aner mi tú ku sok nigang'e itso̱m tite̱re̱ be ike̱ng mi tá ka karang, iyong nye riye̱.

¹⁵Aser, mi ta kyem i nye be itso̱m mi kyo̱ndi mi ta shim aꞌa? Ka wan be rishishim kamok mi ta se washak e̱?’

¹⁶“Be anong,” aYeso fe̱ ye, “Áfe igang'e tà te áfe ime̱se̱ng'e ne áfe ime̱se̱ng'e tà te áfe igang'e.”

¹⁷Nizen iya aYeso tá sen tseng na aUshalima. A yis álimazhiri wu kuso̱k be afa'me nukim a tá fe̱ be ba ye,

¹⁸“Yir sen ngarak yir i be yir na aUshalima naro̱ a tana sok Igon Anerawe a ta re̱p ágbang atsi ne áner kubo̱so̱p itsi ne á ku to̱ amok riku.

¹⁹Ne á ku sok á ta no̱o̱k áner aya sang á ta nye áner aYahuda baꞌ, nong á ta nye be wu kye̱re̱, ne á ku whereng ne á ku tigak. Katuk afe ataar a tà dorok be kutser.”

²⁰Ayong ango̱ inoon aZabedi be̱ nufe aYeso ame be inoon wu ne a tigbok akuur kaben a tú ku rip ike̱ng ikak.

²¹aYeso tú ku rip ye, “Akye̱ ne wan tse̱r e̱?” Ne a fe̱ ye, “Mi shim inoon'i na, nafa na ta sor nubo̱k riya wan, azining nubo̱k riya ne akak nubo̱k rimen kaye̱e̱r rigwo̱m wan.”

²²Amma aYeso fe̱ be ba ye, “Yin ren yin ike̱ng yin ta tse̱r yin baꞌ. Yin ta kyem i so̱ yin na ako̱p mi tanin so̱ a?” Ba tú ku shim'e ye, “Yir ta kyem yir.”

²³Ayong aYeso fe̱ be ba ye, “Yin ta so̱ yin gye̱r, amma kusor nubo̱k riya ka nubo̱k rimen, i nye karo̱ mi tana no̱o̱k akak baꞌ. Ada mi ne a nye karo̱ kayong kamok áya wu tá tsang a kasa.”

²⁴Nizen iya ribir álimazhiri kuso̱k'e tá fok itak'e, aye̱ ba beseng be áner afa'me.

²⁵aYeso tu yis ba naro̱ kazining a tá fe̱ be ba ye, “Yin ren yin ye, áko̱k kasho̱o̱n áner aya sang a ta nye áner aYahuda baꞌ tin nye rigwo̱m natoon ánerawe ba, ne agbang áko̱k kasho̱o̱n ba min nye rigwo̱m natoon ribir ako̱k kasho̱o̱n'e.

²⁶I se anong be yin baꞌ. Aya a ta shim a ta te agbang'e kaye̱e̱r yin ma a te asam yin cice̱r ingya.

²⁷Aner aya a ta shim a ta te afe ime̱se̱ng'e, i nye ye ma a te asam yin dim.

²⁸Anong ne Igon Anerawe be̱ nong a tu ku nye itomong baꞌ, amma nong a ta nye anerawe'me, ne a no̱o̱k kutser wu kamok kashesh ánerawe whe̱re̱.”

²⁹Nizen aYeso be álimazhiri wu ta sen won kuwo̱p aZheriko, ánerawe whe̱re̱ tú ku kuus.

³⁰Ákpato̱o̱n afa tu se nusosok nanu iren. Nizen á tá fok ye, aYeso ne a sen gor, yong á ta kuto̱ naza ye, “Igon aDauda, ro̱ riye̱ yir.”

³¹Rigwo̱m anerawe'me tú zhe̱e̱r ba ye á ra tigbik, amma ákpato̱o̱n ame bun á ti barang kuta kuto̱ naza ye, “Igon aDauda, ro̱ riye̱ yir.”

³²Ayong aYeso nyeseng a tú ku yis ba ne a ku rip ba ye, “Akye̱ ne yin shim yin mi tá ka nye yin'e e̱?”

³³Ne á fe̱ be wu ye, “Atekasa, yir shim ta di yir karo̱.”

³⁴aYeso fok kuro̱ riye̱ ba, yong a ra anyisi ba. Nizen izining, anyisi ba wor á karak á di karo̱ ne á kuus aYeso'me.