Read izere aMatiyu 23 Bible Online

aMatiyu 23 - izere bible

aMatiyu 23

¹Nizen álimazhiri aYeso be ánerawe whe̱re̱ tá nyim, iyong aYeso fe̱ be ba ye,

²“Áner á ta bo̱so̱p ánerawe Itsi ne áner aFarisi ne á tu ku no̱o̱k ba iren kubo̱so̱p ánerawe Itsi aMusa.

³Kamok anong, kuus yin ike̱re̱ iya ba ta sen ka bo̱so̱p yin'e, be iya á ta ka taas yin cei. Amma sang tu nye yin kyo̱ndi ba baꞌ, kamok ba nye ike̱re̱ iya ba tá bo̱so̱p ánerawe'me baꞌ.

⁴Ba rosom ánerawe acer aya a ta gaar aya sang a tana kyem acer baꞌ, amma ba be rice ba ta kyem á cer ka á tin sak kubo̱k ba nong á ta zuur baꞌ.

⁵“Ike̱re̱ ba ta nye se nong ánerawe ta di tsek; Á tos alau be rife̱ Adakunom nong á tá rosom na nati ba, ne akpiin ba ras aso̱p ma kaben. [15]

⁶Á shim kusosok kanang ni naro̱ kunye riye̱ rikan ne a sosok na agarang kaye̱e̱r atu aduwa.

⁷Á shim ánerawe tú ku nye ba ashou kyo̱ndi ágbang aner ni naro̱ rizhik ne a ku yis ba ye, ‘Áner kubo̱so̱p.’

⁸“Amma yin, sang a ta ka yis yin ye, ‘Áner kubo̱so̱p’ baꞌ, kamok aner kubo̱so̱p yin se azining tsek. Yin nye yin áner be áronyining.

⁹Sang yin tu yis yin akak ye, ‘Ada’ kaye̱e̱r kazatse baꞌ, kamok yin be yin Ada azining tsek aya a ta se kaye̱e̱r kaza.

¹⁰Sang a ta ka yis yin ye, ‘Áko̱k kasho̱o̱n’ baꞌ, kamok yin be yin ako̱k kasho̱o̱n azining tsek, wu ne a nye aKiristi'me.

¹¹Aner aya a ta nye ayiik kaye̱e̱r yin ne a nar'e, a tà te asam yin.

¹²Koangan afe a ta sok rice naza, a tà te be wu fe̱re̱. Amma aner aya ne a ta mees rice wu a tù ku tiyiik.

¹³“Awo̱ be yin áner kubo̱so̱p ánerawe Itsi ne áner aFarisi, yin ákardak áner. Yin te̱ne̱ng yin ánerawe iren kuno̱ kaye̱e̱r rigwo̱m kaza amma yin, yin no̱ yin baꞌ, yin won yin áfe a ta shim kuno̱ á ta no̱ baꞌ.

¹⁴[Awo̱ be yin áner kubo̱so̱p ánerawe Itsi ne áner aFarisi, yin ákardak áner. Yin mo̱o̱r yin ákumung ne i nye yin aduwa aso̱p afe abo̱o̱s. Kamok anong, a tà ka to̱ yin amok aya a ta nar afe koangan.]

¹⁵“Awo̱ be yin áner kubo̱so̱p ánerawe Itsi ne áner aFarisi, yin ákardak áner! Yin tseng i gorok yin iwo̱p ze̱r ze̱r ne i tá sak yin agbang isho̱ng ni itse̱r aner azining aya a tana kuus iren yin. Ke i tu se̱ yin ne yin te yin be wu kyo̱ndi a ta nar yin kunye rine̱n.

¹⁶“Awo̱ be yin ákpato̱o̱n, áya a ta kok ánerawe kuse̱. Yin fe̱ yin ye, ‘Koangan ne a shu be agbang kutu kuya Adakunom iben, i daam baꞌ. Amma aner aya ne a shu be izinariya iya i ta se kaye̱e̱r agbang kutu kuya Adakunom iben'e, kushu'me tù ku ya.’

¹⁷Yin azizik áner, ákpato̱o̱n akak! Anyaka nar ayiik e̱, izinariya ka agbang kutu kuya Adakunom iben kaya ka ta sak izinariya ta sor zhe̱l e̱?

¹⁸Yin bun i fe̱ yin ye, ‘Ke akak shu be karo̱ a ta no̱k nong a tin nye asidaka, i daam baꞌ, amma ke akak shu be ike̱ng iya a ta be̱e̱n'e nong a tin nye asidaka, kushu'me tù ku kuus.’

¹⁹Yin ákpato̱o̱n ákak! Inyaka nar e̱, ike̱ng iya a ta be̱e̱n'e ka karo̱ a ta nye kamok asidaka kaya ka ta sak asidaka'me ta te zhe̱l e̱?

²⁰Kamok anong, aner a ta shu be karo̱ a ta no̱k nong a tin nye asidaka, a shu kamok karo̱'me ne koakye i ta se natoon karo̱'me.

²¹Koangan ne a shu be agbang kutu kuya Adakunom iben, a shu kamok karo̱'me ne koakye i ta se kaye̱e̱r'e.

²²Koangan ne a shu be kaza, a shu be itsik rigwo̱m Adakunom ne aya a ta se nusonong natoon itsik rigwo̱m'e.

²³“Awo̱ be yin áner kubo̱so̱p ánerawe Itsi ne aner aFarisi, yin ákardak áner, yin nyesek yin izining kaye̱e̱r koakye ike̱ng kusok kaye̱e̱r afumung aya a tana sak naya tana ta. Amma yin won yin Itsi i ta nye igbang'e, kyo̱ndi katsak be kuro̱ riye̱ ne kunye ike̱ng i ta se gye̱r. I se gye̱r ta kuus ike̱re̱'me cei, sang tu won yin ikak baꞌ.

²⁴Yin ákpato̱o̱n, áfe ku kok ánerawe kuse̱. Yin turung yin azhizhi á ta no̱ kaye̱e̱r naya yin, amma ne i ma ya yin be arakumi kaye̱e̱r'e.

²⁵“Awo̱ be yin áner i ta bo̱so̱p ánerawe'me Itsi ne áner aFarisi, yin ákardak áner, yin kusu yin ares kuya naya ne kufe kuso̱ ashi nama'me tsek, amma kaye̱e̱r'e nye ike̱re̱ rigup be kushim rice kuse.

²⁶Yin áner aFarisi ákpato̱o̱n ákak! Kusu yin kaye̱e̱r kures yin tin yas yin ne i niso̱ yin ashi, nong kama'me ta forop gip.

²⁷“Awo̱ be yin áner i ta bo̱so̱p yin ánerawe Itsi ne áner aFarisi, yin ákardak áner. Yin se yin kyo̱ndi kure̱k kuya a tin te kuto̱p kukan natoon'e nong ku ta sas amma kaye̱e̱r'e nye ikup anerawe be ike̱re̱ i tan bus.

²⁸Anong ne yin se yin, nasho̱o̱n ánerawe, yin se yin kyo̱ndi áner átek nasho̱o̱n Adakunom, amma kaye̱e̱r aye̱ yin, yin nye yin akardak'e be amaan kuse.

²⁹“Awo̱ be yin áner i ta bo̱so̱p yin ánerawe Itsi ne áner aFarisi, yin ákardak áner! Yin no̱k yin are̱k áner kuzarap ne i zem yin are̱k áner aya a ta nye kusor kutek nasho̱o̱n Adakunom.

³⁰Ne i fe̱ yin ye, ‘Ke yir fa ku se yir nizen átukop yir, ke yir gung yir rice be áfe a tá fe̱s áner kuzarap baꞌ.’

³¹Kamok anong yin bun i tonong yin be ace yin ye yin nye yin afe iri áner a tá fe̱s áner kuzarap.

³²To̱, gang yin amaan itomong átukop yin ta tsang a san'e.

³³“Yin íwhen, naban afomong, yin ta nye yin ane̱ ta whe̱r yin amok kasa kuro̱ng e̱?

³⁴Kamok anong, mi sen ka tom yin be áner kuzarap ne áner áfe kukyem be áner á tana ka bo̱so̱p yin'e. Yin tà fe̱s yin ákak ba ne i tigak yin ákak. Yin tà whereng yin ákak ba kaye̱e̱r atu aduwa ne i ku ro yin ba ma ni iwo̱p ze̱r ze̱r.

³⁵Kamok anong, natoon ace yin ne a tà tse̱r naso̱k aner aya a ta se zhe̱l nasho̱o̱n Adakunom cei, áfe yin tú ku fe̱s yin ba kaye̱e̱r kazatse kum be aHabila aner azhe̱l'e nasho̱o̱n Adakunom ma nizen aZakariya igon aBerikiya, aya yin tá fe̱r yin natite agbang kutu kuya Adakunom iben be karo̱ kunye asidaka.

³⁶Katsak'e ne mi ta ka tak yin, cice̱r ike̱re̱ na ta se̱ áner izam na.

³⁷“Ka! Yin aner aUshalima, áfe a tá fe̱s áner kuzarap Adakunom ne áya a ta barak áya a tu ku toos ba nufe yin be ata, kutak kumang ne mi shim ke i ta tusung yin karo̱ kazining kyo̱ndi anyining inyon ta tusung inoon wu, ne yin gaar yin e̱?

³⁸Di yin, a ma ka won yin kasa yin kakoor dar aner akak.

³⁹Kamok anong, katsak'e ne mi ta ka tak yin, yin tà bin di yin baꞌ, ma katuk kaya ne yin fe̱ yin ye, ‘Aner riye̱ rikan ne a nye aner aya a tá be̱ kaye̱e̱r riyerek Agwo̱m Ágwo̱m.’ ”