Read izere aMatiyu 26 Bible Online

aMatiyu 26 - izere bible

aMatiyu 26

¹aYeso ta fa gang kufe̱ ike̱re̱ na cice̱r, ne a fe̱ be álimazhiri wu ye,

²“Yin ren yin izen kunye riye̱ rikan aPasova a tu ku won inom ifa ne a nye nizen iyong ne a ta no̱o̱k Igon Anerawe nong a ta tigak.”

³Iyong ágbang átsi ne ásho̱n nyim cice̱r na azuri ako̱k kasho̱o̱n agbang atsi a tú ku yis ye aKayafas,

⁴ne á nye ibo̱ro̱ng kuyiir aYeso be ritseng nong á ta fe̱r.

⁵Amma á fe̱ ye, “Sang i ta se nizen riye̱ rikan aPasova'me baꞌ fan ánerawe bu dorok be riwo̱ng.”

⁶To̱, nizen aYeso ta se na aBetani, kaye̱e̱r kasa aSaminu a tá nye akparo̱ng'e.

⁷Abining akak be̱ nufu be kudu name iko̱o̱n itek, name'me nye nafe itso̱m dide̱ng. Nizen aYeso ta se naro̱ kuya naya, abining'e be̱ a tú ku korok name rice.

⁸Álimazhiri wu tá fa di anong, yong á nye riye̱ kubeseng ma á fe̱ ye, “Akye̱ sak a tana beseng itso̱m ana e̱?

⁹A fa re̱p name na ke a ti se̱ itso̱m dide̱ng a tana no̱o̱k áfe rizor.”

¹⁰aYeso tá ren kuto̱ro̱ng ba, yong a fe̱ ye, “Akye̱ sak yin daam yin abining na e̱? A ti nye ike̱ng itek.

¹¹Áfe rizor se mak be yin ye̱r ye̱r, amma mi ta se be yin koakye izen baꞌ.

¹²Name na wu tin korok'e nuro̱m, a sen nye kanye̱k kune̱r'i.

¹³Katsak'e ne mi ta ka tak yin, koake̱ ne a tana taas Rife̱ Ritek na kaye̱e̱r kazatse, ma a yiring be abining na ne ike̱ng wu tin nye'me.”

¹⁴Ayong azining kaye̱e̱r kuso̱k be afa ame aya a tú ku yis ye, aYahuza Iskariyot tseng nufe ágbang atsi.

¹⁵A ta se fe̱ be ba ye, “Yin tin no̱o̱k yin akye̱, ke mi ta no̱o̱k yin aYeso'me e̱?” Iyong á tu no̱o̱k íca itso̱m a ta nye be azurfa iso̱k itaar.

¹⁶Kum nizen iyong ne aYahuza san ku tse̱r iren a tana no̱o̱k aYeso.

¹⁷To̱, katuk kafe ime̱se̱ng'e nizen riye̱ rikan kuya abiredi dar ayisti, álimazhiri aYeso be̱ nufu nong á tú ku rip ye, “Ake̱ ne wan shim tá ka nye yir kanye̱k naya aPasova'me [17] e̱?”

¹⁸Ne aYeso fe̱ be ba ye, “Tseng yin kaye̱e̱r kuwo̱p, yin ta se̱ yin aner akak, fe̱ yin be wu ye aner kubo̱so̱p fe̱ ye izen wu m be̱ bubarak. Wu shim a ta ya naya aPasova'me wu mak be álimazhiri wu kari wan.”

¹⁹Iyong álimazhiri'me nye kyo̱ndi aYeso tá tsang a fe̱ be ba, á se nye kanye̱k naya aPasova'me.

²⁰Kawheshirim tá fa nye, yong aYeso se sonong mak be álimazhiri wu kuso̱k be afa nong á ta ya naya'me.

²¹Nizen á tá sen ya naya'me, aYeso fe̱ be ba ye, “Katsak ne mi ta ka tak yin, azining kaye̱e̱r yin tin sok a ta no̱o̱k.”

²²Iyong álimazhiri'me no̱ kaye̱e̱r kudaam dide̱ng, á san ku naka risim ye, “Ka mi, atekasa a?”

²³aYeso fe̱ be ba ye, “Aya a ta sen yas kaye̱e̱r kures kuzining mak be mi ne a tin re̱p.

²⁴Igon Anerawe tà ku kyo̱ndi a tá zibir kaye̱e̱r kufumung kuzhe̱l'e, amma awo̱ be aner aya a tana re̱p Igon Anerawe. Aner na, i tú ku nar ke a fa ku kutes baꞌ.”

²⁵Ayong aYahuza, aya a tana re̱p aYeso'me fe̱ ye, “Aner Kubo̱so̱p, ka wan di ye aner'e nye mi e̱?” aYeso fe̱ be wu ye, “Wan gip, wan fe̱ be rice wan.”

²⁶A ta se be kuya naya'me, yong aYeso sok abiredi, a tin tonong riye̱ rikan be Adakunom ne a te̱se̱ng a tá fe̱ ye, “Inga ya yin, iyu nye kuro̱m'i.”

²⁷Ne a sok ashi anap, nama a tá tonong riye̱ rikan be Adakunom, a tú ku no̱o̱k ba, ne a fe̱ ye, “Inga so̱ yin, cice̱r yin.

²⁸Iyu ne i nye naso̱k'i, nafe kushu kufas na, aya a tana nyosong kamok ánerawe whe̱re̱ nong a tin re̱ng rine̱n ba.

²⁹Won ta ka tak yin, mi ta ba so̱ ashi anap na baꞌ, ma katuk afe mi tana so̱ akak afas mak be yin kaye̱e̱r rigwo̱m Ada mi.”

³⁰aYeso be álimazhiri wu tá fa bom abom ne á wuruk á ta se ngarak natoon Kawhanang Nafar.

³¹Ayong aYeso fe̱ be ba ye, “Natuk na, yin ta teng yin tin won yin. Kamok i se ni izibir ye, “ ‘Mi tà fe̱r áfek itsamang'e ne itsamang'e te shaam.’

³²“Amma nizen a tanin dorok nure̱k, mi tà ka tsang yin na aGalili.”

³³Ayong aBitrus fe̱ be wu ye, “Ko ba teng cice̱r, mi tà teng baꞌ.”

³⁴aYeso fe̱ be wu ye, “Katsak'e mi ta ka tak, natuk na, atso̱n tà tsang a te̱p baꞌ, wan tà fe̱ ye wan ti ren baꞌ, kutak kutaar.”

³⁵aBitrus fe̱ ye, “Ko a tin fe̱r mak be wan, mi tà fe̱ ye, mi won dar i ka ren baꞌ.” Anong ne ribir álimazhiri'me cice̱r fe̱ gip.

³⁶Ayong aYeso tseng be álimazhiri wu naro̱ kakak a tá yis ye aGetsemani, ne a fe̱ be ba ye, “Sonong yin aze nong mi ta tseng aza ta se nye aduwa.”

³⁷Ne a sok aBitrus be inoon aZabedi nafa mak be wu. Ne a san kudaam kaye̱e̱r riye̱ wu ne a nye riye̱ riwe.

³⁸Ayong a fe̱ be ba ye, “Riye̱ riwe ri tase kaye̱e̱r riye̱ mi sak ma mi fok ye, mi tà ku. Sor yin aze ne i tor yin be mi.”

³⁹Nizen aYeso tá tseng nasho̱o̱n cie̱k, ne a tigbok akuur a ta te akace a ta nye aduwa ye, “Ada, ke i ta se gye̱r, ne wan sok ako̱p risam na rice mi, amma sang ike̱ng iya mi ta shim baꞌ, iya wan ta shim.”

⁴⁰Ayong a bun a tú ku bun nufe álimazhiri wu ne a ku se̱ ba nida, ne a fe̱ be aBitrus ye, “Akye̱ sak yin ta sor yin ne i tor yin be mi nizen cie̱k baꞌ e̱?

⁴¹Sor yin ne i tor yin ne i nye yin aduwa fan i bu kpas yin kaye̱e̱r kubo̱mo̱ng. Kabik shim amma kuro̱m'e se gbe̱re̱k.”

⁴²Ayong a bun a tú ku bun i nye aduwa'me afe afa ne a fe̱ ye, “Ada, ke risam na ta kyem ri tin gor baꞌ, to̱, ne wan nye ike̱ng iya wan ta shim.”

⁴³aYeso tá fa bun a be̱, a bun a tu ku se̱ ba nida kamok anyisi ba se zi.

⁴⁴Ayong aYeso bun a tú won ba nong a ta tseng ninye aduwa kutak kufe ataar, ne a fe̱ ike̱ng iya wu tá fe̱ ni ime̱se̱ng'e.

⁴⁵Ne a ku bun nufe álimazhiri wu, ne a fe̱ be ba ye, “Yin rusek yin nida i sen song yin a? Di yin izen'e n nye a tana no̱o̱k áfe rine̱n Igon Anerawe.

⁴⁶Dorok yin nong tá tseng yir. Aner a tanin re̱p na an be̱.”

⁴⁷Kum ne aYeso ru fe̱ kanu, aYahuza azining kaye̱e̱r alimazhiri kuso̱k be afa ame be̱ be rigwo̱m ánerawe whe̱re̱ be ítsor ne ishe̱n. Ágbang atsi ne áko̱k kasho̱o̱n ba ne á tu ku tom ba.

⁴⁸Aner a tú ku re̱p'e tsang a ni sak be ba ye, “Aner aya mi tú kunung, wu ne a nye aner'e, ku yiir yin.”

⁴⁹Be kube̱ aYahuza ne wor a wesek cop nufe aYeso a tá fe̱ ye, “Dazha, Aner Kubo̱so̱p,” ne a ku kunung.

⁵⁰aYeso fe̱ be wu ye, “Are̱, nye ike̱ng wan tá be̱ kunye'me.” Iyong ánerawe be̱ barak á tá yiir aYeso.

⁵¹Ike̱ng'e tá te anong, azining kaye̱e̱r áfe a ta se mak be aYeso wor a tun itsor a tin te̱me̱ng kuto asam agbang atsi akak ma a te̱n kuto'me.

⁵²Ayong aYeso fe̱ ye, “Kute itsor wan kaye̱e̱r kubas'e, kamok koangan afe a ta tun itsor na afudang be itsor ne a tu ku fe̱r mo.

⁵³Yin di yin ye mi ta kyem i fe̱ be Ada mi nong a tin se̱ mo aꞌa? Ne a wor a tom ámaleka wu na ágwo̱m kuso̱k be afa.

⁵⁴To̱, a ta nye ane̱ a ta shining ike̱ng kufumung rife̱ Adakunom tá fe̱ ye, a ta nye dim e̱?”

⁵⁵Nizen iyong aYeso fe̱ be rigwo̱m ánerawe'me ye, “Mi nye akpatang yin ta be̱ yin be ishe̱n ne ítsor nong tin yiir yin e̱? Koakye kunom mi sor kaye̱e̱r agbang kutu kuya Adakunom iben ne i bo̱so̱p ánerawe'me, yin ti yiir yin baꞌ.

⁵⁶Amma ike̱re̱ na se anong cice̱r, nong a ta shining ike̱re̱ áner kuzarap Adakunom tá fe̱.” Iyong álimazhiri'me cice̱r teng á ta won aYeso.

⁵⁷Iyong áya a tá yiir aYeso'me tseng be wu nufe aKayafas, agbang atsi naro̱ áner kubo̱so̱p Itsi be ásho̱n tá mu ku nyim.

⁵⁸Amma aBitrus tsang a ku kukuus nama gugo̱k, ma nubang kasa agbang atsi'me. A no̱ a tá se sonong mak be áfe a tá tor karo̱'me nong a ta di ike̱ng iya a tana nye.

⁵⁹Ágbang átsi'me ne áfe amok'e cice̱r tse̱r iren iya a ta kyem a se̱ aYeso be rine̱n nong á tu ku fe̱r.

⁶⁰Ko a ra se̱ baꞌ, gip be anong, whe̱re̱ ti bo̱s naborok natoon wu. Ni igang'e áner afa wuruk nasho̱o̱n.

⁶¹Á tá fe̱ ye, “Aner na fe̱ ye wu ta kyem a yirik agbang kutu kuya Adakunom iben ne a bun a no̱k kaye̱e̱r inom itaar.”

⁶²Ayong agbang atsi'me dorok, a nyeseng, a tá fe̱ be aYeso ye, “Wan be ike̱ng i tana fe̱ aꞌa? Ike̱ng ánerawe na ta fe̱ natoon wan na ane̱ e̱?”

⁶³Amma aYeso te gbik. Ayong agbang atsi ame bun a fe̱ be wu ye, “Kaye̱e̱r riyerek Adakunom afe kutser, ni tak yir katsak'e, ka wan ne i nye aKiristi'e, Igon Adakunom.”

⁶⁴aYeso fe̱ be wu ye, “Ei, i se kyo̱ndi wan tá fe̱'ong. Amma mi fe̱ be yin ye, nasho̱o̱n yin tà di yin Igon Anerawe nusonong nubo̱k riya Atek kukyem, ne i ku di yin a ta saase kaye̱e̱r ane̱n.”

⁶⁵Ayong agbang atsi'me sarak ares wu be riye̱ kubeseng, ne a fe̱ ye, “A zhe̱e̱sh Adakunom! Yir bun i tse̱r yir akye̱ gbak e̱? Yin fok yin a ta zhe̱e̱sh Adakunom.

⁶⁶Yin di yin ane̱ e̱?” Ánerawe'me fe̱ ye, “A kyem a tú ku fe̱r.”

⁶⁷Ayong á tú tang ace̱ nanyisi ne a ku tu ne ákak ku tsosok.

⁶⁸Ne á fe̱ be wu ye, “Nye kuzarap, aKiristi, angan ne a ta rus e̱?”

⁶⁹Nizen iyong aBitrus se nusonong nubang kasa'me ne kanamang kakak ka tá nye asam agbang atsi'me be̱ nufu nong a tá fe̱ ye, “Wan gip, wan se mak be aYeso aner aGalili na.”

⁷⁰aBitrus ton'e nasho̱o̱n ba cice̱r ye, “Mi ren ike̱ng yin ta sen nife̱ yin baꞌ.”

⁷¹A tá fa wuruk nanu kubang'e ne kanamang kakak bun ka ku di ne ka fe̱ be ánerawe'me ye, “Aner na se mak be aYeso afu Nazaret.”

⁷²aBitrus bun a ton'e ma a shu ye, “Mi wor i ren aner na baꞌ.”

⁷³A bun a sor cie̱k ne áfe a ta se nunyeseng azong bun a fe̱ be aBitrus ye, “Katsak, wan nye akak kaye̱e̱r ba irem wan tonong anong.”

⁷⁴Ayong aBitrus bun a ton'e ne a ya kushu ye, “Mi ren aner na baꞌ.” Kum nizen iyong ne atso̱n wor a kpaan kute̱p.

⁷⁵Ne aBitrus ma yiring be rife̱ aYeso tá tsang a fe̱ be wu ye, “Atso̱n ta tsang a te̱p baꞌ, wan ta fe̱ ye, ‘Wan ti ren baꞌ,’ kutak kutaar.” Ayong a wuruk nufang a ta se ya kanak.