Read izere aMatiyu 28 Bible Online

aMatiyu 28 - izere bible

aMatiyu 28

¹Nama kunom Asabar, nadiding bop katuk ime̱se̱ng'e, aMarya aMagadaliya ne aMarya afe afa'me tseng nong á ta se di kure̱k'e.

²Iyong kaben wor ka zuur kamok amaleka Adakunom akak ne naza nong á tá be̱ tomong kuta'me ne á ni sonong natoon'e.

³Ne a sam kyo̱ndi akanang, ne ares wu kare̱p pes kyo̱ndi kufe̱n.

⁴Áfe a tá tor kure̱k'e fok inyim dide̱ng ma á koor, ne a kpas kyo̱ndi a kus.

⁵Amaleka'me fe̱ be anyining'e ye, “Sang yin tu fok yin inyim baꞌ. Mi ren yin sen tse̱r yin aYeso, aya a tú ku tigak.

⁶A kuse baꞌ. An dorok kyo̱ndi wu tá fe̱. Be̱ ta di yin karo̱ a tú ku sak ko.

⁷Tseng yin gbasak ta se tak yin álimazhiri wu ye, ‘An dorok nure̱k, a ta ka tsang yin na aGalili. Yin tu ku se̱ yin azong.’ ike̱ng mi ta shim ta ka tak yin'ong.”

⁸Iyong ányining ame wor á won kure̱k'e gbashak nong á ta be nufe álimazhiri ame be inyim amma be riye̱ rikan. Á tseng á teng ba nong á se tak álimazhiri'me.

⁹Ayong aYeso be rice wu wor nyim be ba, ne a fe̱ be ba ye, “Dazha yin.” Ne ányining'e be̱ bubarak be wu, ne á kpa natak wu nong á tu ku ya iben.

¹⁰Ne aYeso fe̱ be ba ye, “Sang yin tu fok yin inyim baꞌ. Tseng yin tà se tak yin ároneng ye á ra tseng na aGalili. Ba tin di azong.”

¹¹Ányining'e ta rusek niren, yong ákak kaye̱e̱r áfe kutor kure̱k'e tseng kaye̱e̱r agbang kuwo̱p'e nong á ta se tak ágbang atsi ike̱ng iya i ta nye cei.

¹²Nama ágbang atsi'me tá nyim be ásho̱n, ne á nye ibo̱ro̱ng nong á ta no̱o̱k ásozha'me itso̱m whe̱re̱.

¹³Á ta fe̱ be ba ye, “Fe̱ yin ye, ‘Álimazhiri wu ne á be̱ natuk á ta be̱ á sok kukom'e nizen iya yir ta se yir be ida.’

¹⁴Ke itak'e no̱ nato aBilatus, yir tu ku tak yir, nong yin ta so̱ yin risam baꞌ.”

¹⁵Iyong ásozha'me shan itso̱m'e ne á nye ike̱ng á tá fe̱ be ba. Itak na tsang tseng koake̱ niben áner aYahuda ma kyo̱o̱rna.

¹⁶To̱, álimazhiri kuso̱k be azining'e tseng na aGalili, natoon kawhanang naro̱ aYeso tá tsang a fe̱ be ba ye á ra tseng.

¹⁷Nizen á tú ku di, á kpas kaben á tu ku ya iben, amma aye̱ ákak ba se gak.

¹⁸Ayong aYeso be̱ bubarak be ba, a tá fe̱ ye, “A min no̱o̱k kukyem kaye̱e̱r kaza be kaye̱e̱r kazatse cice̱r.

¹⁹Kamok anong, tseng yin kaye̱e̱r kazatse cice̱r ta se sak yin ánerawe ta te álimazhiri mi, ne i ku nye yin ba abatisma kaye̱e̱r riyerek Ada, ne kaye̱e̱r riyerek Igon'e, ne kaye̱e̱r riyerek Kabik Kazhe̱l'e.

²⁰Ne i ku bo̱so̱p yin ba iren á tana kuus koakye mi tá ka tak yin. Yiring yin ye mi se mak be yin koakye izen ma ni igang izen.”