Read izere aMatiyu 3 Bible Online

aMatiyu 3 - izere bible

aMatiyu 3

¹Nizen iyong aYohana aner abatisma [5] be̱ a san kutaas rife̱ Adakunom katse ni iben aYahuda.

²Ne a fe̱ ye, “Shishing yin kuse yin, kamok rigwo̱m kaza [6] m be̱ bubarak.”

³Ayu ne a nye aya Ishaya aner kuzarap tá fe̱ itak wu ye, “Kuto̱ aner akak yis kaye̱e̱r katse ye, ‘Nye yin Agwo̱m Ágwo̱m iren, ku nye yin iren'e cop.’ ”

⁴Ares aYohana'me tá tes a nye be nakuyo̱ng arakumi, ne a rosom kudun kukpa nutin wu. Naya wu nye kubep be ashi ritong.

⁵Ánerawe aUshalima be áfe íwo̱p aYahuda cice̱r áfe a tá se nikyim Isho̱ng aUrdun ame cice̱r be̱s nufu.

⁶Á be̱s ne á taas rine̱n ba ne a ku nye ba abatisma ni Isho̱ng aUrdun ame.

⁷Nizen wu tá di áner aFarisi be áner aSadusi whe̱re̱ tá be̱s naro̱ wu tá se be kunye abatisma'me, a fe̱ be ba ye, “Yin naban áfomong, angan tá tak yin ye, i ru ku teng yin amok Adakunom a tà saase e̱?

⁸Nye yin itomong i tana tonong ye yin n shishing yin kuse yin.

⁹Sang yin tu wo̱k yin ace yin be kuto̱ro̱ng ye, ‘Ibrahim nye ada yir’ baꞌ. Won ta ka tak yin, Adakunom ta kyem a sok ata na nong a tin nye Ibrahim inoon.

¹⁰Kanu kate̱m se ritin kakon'e, koakye kakon ka ta tes kutes kutek baꞌ, a tà te̱me̱ng a ta te nuro̱ng.

¹¹“Mi ta nye yin abatisma be ashi nong i ta tonong ye yin n shishing yin kuse yin. Amma aner a tana be̱ nama mi ti nar be kukyem, aya mi tana kyem i ra akpatak wu gum baꞌ. A tà ka nye yin abatisma be Kabik Kazhe̱l'e ne kuro̱ng.

¹²Kube wu se nubo̱k wu. A tà tas áwhe̱'me ne a korok iwe̱ng'e kaye̱e̱r ingme̱ ne a shosh awhe̱'me be kuro̱ng kuya sang ku tana ku baꞌ.”

¹³Nizen iyong aYeso dorok na aGalili a ta be ni Isho̱ng aUrdun nong aYohana tá su ku nye abatisma.

¹⁴aYohana shim a tú ku roon'e, iyong a fe̱ ye, “Gye̱r ke mi be̱ nufuan nong wan tin nye abatisma, ne wan bun i be̱ nunaan ingya a?”

¹⁵Amma aYeso fe̱ be wu ye, “I se gye̱r ta nye yir anong; kamok be anong ne a tá shining yir ike̱ng iya Adakunom ta shim.” Ayong aYohana tú ku shim'me.

¹⁶Kum a tá fa nye aYeso abatisma ame ne a wuruk kaye̱e̱r ashi'me, ne kaza wor ka karak ne a di Kabik Adakunom kyo̱ndi abo̱p ti tiik ni wu.

¹⁷Ne kuto̱ kukak wuruk naza ye, “Wan ne inye Igon'i kaya mi ta shim. Mi fok kusas wu dide̱ng.”