Read izere aMatiyu 4 Bible Online

aMatiyu 4 - izere bible

aMatiyu 4

¹Iyong Kabik Kazhe̱l tseng be aYeso kaye̱e̱r katse ne Ishetan su ku bo̱mo̱ng.

²Nama aYeso tá nye azumi kuko̱s iso̱k inaas, katuk be kunom iyong izong tú ku ro̱.

³Ishetan be̱ a tá fe̱ be wu ye, “Ke wan ne i nye Igon Adakunom, to̱, fe̱ be ata na nong á ta te abiredi.”

⁴Ayong aYeso fe̱ be wu ye, “Ise ni izibir ye: ‘Sang anerawe ta sor be naya tsek baꞌ, amma be koakye kuri rife̱ ri ta wuruk nanu Adakunom.’ ”

⁵Ne Ishetan ame tseng be wu kaye̱e̱r kuwo̱p aUshalima kuzhe̱l'e ne a ku sak a ta nyeseng naro̱ ka ta se ring ring natoon agbang kutu kuya Adakunom iben.

⁶Ne a fe̱ be aYeso'me ye, “Ke wan ne i nye Igon Adakunom, to̱, furuk ma kaben. Kamok ise ni izibir ye: “ ‘A tà fe̱ be ámaleka wu be agbang kuto̱ nong á tà ka te̱ne̱ng, ne á ka tor be ibo̱k, fan wan bu rus kutak nuta.’ ”

⁷Ayong aYeso fe̱ be wu ye, “Ise ni izibir gip ye: ‘Sang wan tu bo̱mo̱ng Agwo̱m Ágwo̱m wan Adakunom baꞌ.’ ”

⁸Ne Ishetan ame bun a tseng be wu natoon rifan ri ta se garang dide̱ng gbak, nong a tú ku tosong rigwo̱m kazatse ne kuyiik'e cice̱r.

⁹Ne a fe̱ be aYeso'me ye, “Ike̱re̱ na cice̱r mi tà ka no̱o̱k, ke wan tà kpa kaben nong i tin ya iben.”

¹⁰aYeso fe̱ be wu ye, “Kam be mi Ishetan! Kamok ise ni izibir ye, ‘Agwo̱m Ágwo̱m wan Adakunom ne wan tù ku ya iben ne i ku nye itomong wu ze̱r tsek.’ ”

¹¹Iyong Ishetan tú ku won. Ámaleka be̱ nong a tin sak riye̱ na aYeso ame.

¹²Nizen aYeso tá fok ye an te aYohana ni itso̱m, iyong a tú ku bun ni iben aGalili.

¹³A won aNazaret nong a tá be na aKapanum be kusor, ku tase nanu kudung, ni igak kaben aZebulun ne aNaptali,

¹⁴nong a tá shining ike̱ng iya Ishaya tá fe̱, ye:

¹⁵“Kaben aZebulun ne kaben aNaptali, yin i tá se yin nabas agbang kudung, a ta tar Isho̱ng aUrdun. Ne kaben aGalili nabas aya sang a tá nye áner aYahuda baꞌ.

¹⁶Áfe a ta sor na awhi an di agbang akanang; áfe a ta sor na nawu riku akanang min wuruk ni ba.”

¹⁷Kum be izen iyong aYeso san awazi, ye; “Shishing yin kuse yin kamok rigwo̱m kaza m be̱ bubarak.”

¹⁸Nizen aYeso tá se be kutseng nukim Kudung aGalili, iyong a di aner be aronyining, aSiman a tú ku yis ye aBitrus ne aronyining wu Adarawus. Á sen te agunung ba kaye̱e̱r kudung, kamok ba nye áfe kuyising izos.

¹⁹Ne aYeso fe̱ be ba ye, “Be̱, ni kuus yin, mi tà ka sak yin tin be̱s yin be ánerawe.”

²⁰Gbashak, á wor á won agunung ba ame, nong á ta kuus aYeso.

²¹aYeso tá fa ya kasho̱o̱n be kutseng ne a di aner be aronyining, aYakub igon aZabedi ne aronyining wu aYohana. Á se kaye̱e̱r kukpara ashi be ada ba aZabedi'me, á ta se be kunye kanye̱k agunung ba, ne aYeso ku yis ba,

²²ne a wor a won kukpara ashi ame be ada ba nong á ta kuus aYeso.

²³aYeso gorok kaben aGalili cice̱r ne a bo̱so̱p ánerawe'me kaye̱e̱r atu aduwa ba, ne a ku taas ba Rife̱ Ritek natoon rigwo̱m kaza. Ne a sak áfe iro̱k iriri me tá te atser.

²⁴Anong, itak wu tseng cei ma ni iben aSuriya ne á ku be̱s be áfe iro̱k ze̱r ze̱r cice̱r ne áfe á ta se risam dide̱ng, ne áfe amaan nabik be áfe kuro̱k kucicirim ne áfe a tá we̱ abas azining. A tú sak ba á tá te atser.

²⁵Rigwo̱m ánerawe whe̱re̱ nes na aGalili ne kaben ka ta be iwo̱p kuso̱k be afa ne áfe aUshalima be áfe iben aYahuda ne áfe a ta tar Isho̱ng aUrdun cice̱r be̱s nufu.