Read izere aMatiyu 5 Bible Online

aMatiyu 5 - izere bible

aMatiyu 5

¹aYeso tá fa di rigwo̱m ánerawe whe̱re̱ tá nyim, iyong a ngarak natoon kawhanang kakak nong a tá sonong. Álimazhiri wu tseng nufu,

²ayong a san ku kabo̱so̱p ba'me ye:

³“Áner riye̱ rikan ne á nye aner aya a ta ren kuraar ba kaye̱e̱r kabik, kamok rigwo̱m kaza nye rifuba.

⁴Áner riye̱ rikan ne á nye aner aya a ta se kaye̱e̱r riye̱ riwe, kamok Adakunom tù ku tsesek ba.

⁵Áner riye̱ rikan ne á nye aner aya a ta mees rice ba, kamok ba ne á tà ya kazatse.

⁶Áner riye̱ rikan ne á nye aner aya a ta be ifeng ne á shim kunye ike̱re̱ iya i ta se gye̱r nasho̱o̱n Adakunom, Adakunom tu ku no̱o̱k ba ike̱re̱ ife ba tà shim'e.

⁷Áner riye̱ rikan ne á nye aner aya a ta be kuro̱ riye̱ kamok Adakunom tà ro̱ riye̱ ba gip.

⁸Áner riye̱ rikan ne á nye aner aya aye̱ ba ta se zhe̱l, kamok ba ne a tà di Adakunom.

⁹Áner riye̱ rikan ne á nye aner aya a ta shim kugung rice, kamok a tù ku yis ba ye inoon Adakunom.

¹⁰Áner riye̱ rikan ne á nye aner aya a tu ku tabak ba kamok ba nye ike̱re̱ iya i ta se gye̱r nasho̱o̱n Adakunom, rigwo̱m kaza nye rifu ba.

¹¹“Áner riye̱ rikan ne á nye áner aya ánerawe ta ka kas yin, ne á ka no̱o̱k yin risam, ne á ti bo̱s abo̱o̱s natoon yin, kamok mi.

¹²Nye yin adide̱ngde̱ng be riye̱ rikan kamok agbang ishorong yin se naza, kamok anong ne á tabak áner kuzarap aya a tá be̱s nasho̱o̱n yin.

¹³“Yin ne i nye yin ito̱k kazatse. Ke ito̱k kam be kurereng wu, a ta nye ne ane̱ nong i ta bun i rereng e̱? A ta bin nye ike̱ng ikak baꞌ, ma ke a ta nyosong, ne ánerawe she̱sh.

¹⁴“Yin ne i nye yin akanang kazatse, kuwo̱p kuya a tá no̱k na agarang ku ta buruk baꞌ.

¹⁵A te kuro̱ng na apitila, ne a bun a whe̱e̱n baꞌ. A sak na agarang nong koangan a tana no̱ ta di akanang'e.

¹⁶Kamok anong, won akanang yin tu ya kanang nasho̱o̱n ánerawe, nong ke á di kunye yin kutek ne á tà kerek Ada yin a ta se kaye̱e̱r kaza.

¹⁷“Sang yin tu di yin ye mi be̱ nong ta be birik ike̱ng iya Itsi aMusa ta fe̱ be rife̱ áner kuzarap agbugbang'e ta fe̱ baꞌ, Mi be̱ nong ta birik baꞌ, amma nong ta shining rife̱ ba'me.

¹⁸Katsak'e, ne mi ta ka tak yin, kaza be kaben tà gang, ko kaban ike̱ng ikak ihiir'e kaye̱e̱r afumung na ta wei baꞌ, ma koakye a ta fe̱ shining.

¹⁹Koangan ne a won ike̱ng ikak ihiir'e kaye̱e̱r Itsi na nong a ta bo̱so̱p ánerawe'me anong, a tù ku yis ye, kaba hiir'e kaye̱e̱r rigwo̱m kaza, amma aner aya ne a ta kuus ike̱re̱'me cei ne a bo̱so̱p ánerawe'me anong, a tù ku yis ye, agbang aner kaye̱e̱r rigwo̱m kaza.

²⁰Won ta ka tak yin, sang ke kunye yin kutek nar kufe áner kubo̱so̱p Itsi be áner aFarisi baꞌ, To̱, yin tà no̱ yin kaye̱e̱r rigwo̱m kaza baꞌ ko cie̱k.

²¹“Yin fok yin a tá fe̱ be ánerawe agbugbang ye, 'Sang tu fe̱r akak baꞌ, aner aya ne a fe̱r akak, a tú ku to̱ amok!

²²Amma mi fe̱ be yin kyo̱o̱rna'me ye, aner aya ne riye̱ wu beseng be aronyining wu, a tú ku to̱ amok. Koangan ne a fe̱ be aronyining wu ye a nye ‘Azizik'e’ a tà tseng be wu nasho̱o̱n áko̱k kasho̱o̱n. Koangan ne a yis afudang ye, ‘Afunam akak,’ a kyem ke a no̱ kaye̱e̱r kasa kuro̱ng.

²³“Kamok anong, ke wan sen no̱o̱k abeko wan nasho̱o̱n abagadi'me, wan ra yiring ye aronyining wan be ike̱ng ikak be wan,

²⁴To̱, ne wan sak abeko wan'ong azong nizham, nong ta be nufe aronyining wan'e, sen sak yin nizham, ne i ma be̱ no̱o̱k abeko'me.

²⁵“Ke akak sen tseng be wan naro̱ amok, nye zizirik nong tin sak yin be wu ni iren nizham ta ra no̱ yin nutu amok'e. Ke anong baꞌ a ta tseng be wan naro̱ amok'e ne aner amok'e ka won nubo̱k áfe itomong wu, kashim ne a ka te ni itso̱m.

²⁶Katsak'e, ne mi ta tak, wan ta kyem i wuruk baꞌ, ma ke wan karang kutiming'e cei nizham.

²⁷“Yin fok yin a tá fe̱ ye, ‘Sang tu nye rikuna baꞌ.’

²⁸Amma kyo̱o̱rna'me, mi ta tak yin ye, koangan ne a di aner abining a shim kaye̱e̱r riye̱ wu ye ke wu men be wu, a nye rikuna be wu kaye̱e̱r riye̱ wu.

²⁹Ke rinyisi abas kubo̱k riya wan tà sak nong tà nye rine̱n, tun nong ta barak! I tà nar wan ti wei ribir kuro̱m wan be kuro̱m wan cice̱r tana no̱ kaye̱e̱r kasa kuro̱ng.

³⁰Ke kubo̱k riya wan tà sak wan tà nye rine̱n, tun nong ta barak. I tà nar wan ti wei ribir kuro̱m wan be kuro̱m wan cice̱r tana no̱ kaye̱e̱r kasa kuro̱ng.

³¹“A bun a fe̱ ye, ‘Koangan ne a tà kam be abining wu, a ru ku no̱o̱k kufumung kukam kuwe̱ne̱ng dim.’

³²Amma kyo̱o̱rna'me, ike̱ng iya mi ta sen fe̱ be yin se ye, ke aner akak kam be abining wu ye, sang ke ise ye abining'e nye rikuna baꞌ, to̱, i te kyo̱ndi wu ne a tu te kaye̱e̱r rikuna'me ingya. Aner aya ne a sok abining'e, a nye rikuna.

³³“Anong gbak, yin fok yin a fe̱ be átukop yir ye, ‘Sang tu shu natoon abo̱o̱s baꞌ, amma shining kuno̱o̱k kuto̱ wan tá nye be Agwo̱m Ágwo̱m.’

³⁴Amma ike̱ng iya mi ta fe̱ yin se ye, Sang tu shu yin baꞌ ko cie̱k, ko be kaza, kamok kaza nye karo̱ itsik rigwo̱m Adakunom.

³⁵Sang tu shu ko be kaben baꞌ, kamok kaben nye ike̱ng kusaas atak Adakunom, ko be aUshalima kamok azong ne a nye kuwo̱p Agbang Agwo̱m.

³⁶Sang tu shu be rice wan baꞌ, kamok wan ta kyem i sak kakuyong kazining ta te kakan ka kawe baꞌ.

³⁷Ike̱ng iya yin tana fe̱ yin tsek nye, ‘Ei’ ka ‘Wayo’ ayi. Koakye i ta bun i nar anong ne nufe Amaan aner.

³⁸“Yin fok yin a tá fe̱ ye, ‘Rinyisi natoon rinyisi, rinyi natoon rinyi.’

³⁹Amma ike̱ng iya mi ta fe̱ be yin kyo̱o̱rna se ye, Sang tu rayin aner aya a tá ka nye yin anyas baꞌ. Ke aner akak ta rus nufok kukak, ne wan ku kirik kufe afa.

⁴⁰Ke aner akak tseng be wan naro̱ amok, a ti shan kukpiin wan, ne wan ku no̱o̱k ma be agbang kukpiin wan gip.

⁴¹Ke aner akak fe̱ ye ma wan ra su ku sak ni iren akilomita azining, ne wan tseng be wu akilomita afa.

⁴²Ke aner akak ta rip ike̱ng ikak, ku no̱o̱k. Ke aner akak be̱ kutse̱r iko̱p nufuan, sang tu won dar i ku no̱o̱k baꞌ.

⁴³“Yin fok yin a tá fe̱ ye, ‘Shim áferime̱ wan ne i di ámudo̱n wan kye̱re̱.’

⁴⁴Amma mi fe̱ be yin kyo̱o̱rna'me ye: Shim yin ámudo̱n yin, ne nye yin áfe á ta ka tabak yin aduwa.

⁴⁵Kamok be nong ne yin tà te yin inoon Ada yin afe a ta se kaye̱e̱r kaza. Wu no̱o̱k ámaan anerawe ne áner atek akanang kunom cice̱r, ne a nyesek iza natoon ánerawe wu áya a ta be kuse kutek be áya a ta nye amaan'e.

⁴⁶Kamok ke yin shim yin áya a ta ka shim yin tsek, ishorong akye̱ ne yin ta se̱ yin nufe Adakunom e̱? Anong ne áfe kushashang itso̱m iben nye gip.

⁴⁷Ke yin nye shou yin áferime̱ yin tsek, to̱, akye̱ ne yin nye yin ife ita nar ife ribir ánerawe e̱? Áfurin gip á nye anong.

⁴⁸Kamok anong, shining yin, kyo̱ndi Ada yin afe a ta se kaye̱e̱r kaza ta shining.