Read izere aMatiyu 7 Bible Online

aMatiyu 7 - izere bible

aMatiyu 7

¹“Sang tu to̱ yin akak amok baꞌ, fan a ba ka to̱ yin'e.

²Kamok amok kuri amok afe yin tá to̱ yin ánerawe'me, kuri ayong ne a tà ma ka to̱ yin'e gip. Kuri kures afe yin ti maas yin ánerawe'me, kuri kuyong ne a tà ma ka maas ko yin'e gip.

³“Akye̱ sak wan ye̱re̱k ikuko̱ i ta se rinyisi afudang wan ne i won agbirik kaye̱e̱r rinyisi rifuan e̱?

⁴Ane̱ ne wan ta fe̱ be afudang wan ye, ‘Won mi ta ka tun ikuko̱ rinyisi, nong wan gip wan ta be agbirik rinyisi wan e̱?’

⁵Wan akardak aner, tun agbirik a ta se kaye̱e̱r rinyisi wan nizham nong ta se̱ tà di ikuko̱ i ta se rinyisi afudang wan'e.

⁶“Sang tu no̱o̱k yin agabu ike̱ng iya i ta se zhe̱l baꞌ, sang tu barak yin álade ata yin áfe itso̱m baꞌ. Ke yin nye yin anong, á tà shesh ne i kirik i ta bu i tà ka marang yin.

⁷“Yiir irip yin'e, a tà no̱o̱k yin; yiir itse̱r yin'e, ta se̱ yin; yiir itsor yin kanukutu'me a tà ka karak yin'e.

⁸Kamok koangan afe a tá rip a tù ku no̱o̱k, koangan afe a tá tse̱r a ta se̱, koangan afe a tá tsor a tu ku karak'e.

⁹“Ka aner akak kuse kaye̱e̱r yin átek inoon, afe ke igon wu tu ku rip abiredi, ne wu ku no̱o̱k kuta e̱?

¹⁰Ka, ke igon'e tu ku rip izos ne wu ku no̱o̱k iwhen e̱?

¹¹Ke yin, i ta nye yin amaan'e, i ren i nyesek yin inoon yin ike̱re̱ itek, shita Ada afe ta se kaye̱e̱r kaza ta won dar a no̱o̱k aya a tu ku rip ike̱re̱ itek a?

¹²Kamok anong, koakye afe yin ta shim yin ánerawe tà ka nye yin'e, yin gip, ku nye yin ba'me. Kamok iyong ne inye kunik Itsi aMusa ne kubo̱so̱p áner kuzarap.

¹³“No̱ yin nanukutu kaya kata se whe̱, kamok kanukutu kaya kata be ni iwei se saa. Iren'e ro̱ kutseng baꞌ, áfe á ta no̱o̱s se dide̱ng.

¹⁴Amma kanukutu kafe kutser, kase hiir. Iren wu ro̱ kutseng. Áfe á ta kuus gop baꞌ.

¹⁵“Nye yin tatan be áner kuzarap áfe abo̱o̱s. Á be̱s nufe yin be kuse itsamang, amma katsak'e, á se kyo̱ndi ámaan ágabu katse.

¹⁶Yin tù ku ren yin ba be kuri itomong ba. Yin kun di yin ánerawe tan bo̱ kutes anap ritin ikiritsan a? Ka kutes atafo ritin aduruduk e̱?

¹⁷Anong ne ise, koakye ritin kakon katek tes kutes kutek, ne amaan kakon tes kutes kumaan'e.

¹⁸Kakon katek tà tes ámaan agba baꞌ, anong ne ámaan kakon tà tes agba atek baꞌ.

¹⁹Koakye kakon kaya sang ka ta tes agba atek baꞌ, a tà te̱me̱ng nong a ta barak nuro̱ng.

²⁰Kamok anong, yin tà ren yin áner kuzarap áfe abo̱o̱s na be itomong ba.

²¹“Sang koangan afe a tin yis ye, ‘Agwo̱m Ágwo̱m’ ne a tà no̱ kaye̱e̱r kaza baꞌ, ma ke aya a tá nye ike̱ng iya Ada mi aya a ta se kaye̱e̱r kaza ta shim.

²²Katuk kayong ánerawe whe̱re̱ tà fe̱ be mi ye, ‘Agwo̱m Ágwo̱m, yir nye yir awazi kaye̱e̱r riyerek wan aꞌa? Yir turung yir amaan nabik kaye̱e̱r riyerek wan aꞌa? Yir nye yin itomong azhing dide̱ng kaye̱e̱r riyerek wan aꞌa?’

²³Ne mi ma fe̱ be ba ye, ‘Mi kun ka ren yin baꞌ. Dorok yin nasho̱o̱n mi. Kam yin be mi yin áfe amaan kunye.’

²⁴“Kamok anong, koangan afe a ta fok rife̱ mi na, a ti nye itomong, a ta se kyo̱ndi aner rino̱k aya a ta be ritseng, aya a tá no̱k kasa wu natoon agudong.

²⁵Nizen iya ne iza tá kpa, isho̱ng shishing ne kuwun be̱ be agap, gip be anong kasa'me kpa baꞌ, kamok a tá no̱k kasa'me natoon agudong.

²⁶Koangan afe a fok rife̱ mi na, a ti nye itomong baꞌ, a se kyo̱ndi aner rino̱k aya a tá no̱k kasa wu natoon rize̱k.

²⁷Izen iya ne iza tá kpa, isho̱ng shishing ne kuwun be̱ be agap, ku ta fa fe̱e̱p kasa'me ne ka wor kayirik, kayirik amaan kuyirik.”

²⁸Nizen aYeso tá gang kufe̱ anong, iyong rigwo̱m ánerawe ame te zhing be kubo̱so̱p wu,

²⁹kamok aYeso tú ku bo̱so̱p ba'me kyo̱ndi aner a ta be kukyem, sang kyo̱ndi áner kubo̱so̱p itsi ba baꞌ.