Read izere aMatiyu 9 Bible Online

aMatiyu 9 - izere bible

aMatiyu 9

¹Ayong aYeso no̱ kaye̱e̱r kukpara ashi nong a tú ku bun nuwo̱p wu.

²Áner akak tu ku be̱e̱n aner akak kuro̱m tá we̱ abas azining ni ike̱ng kameneng. Nizen iya aYeso tá di kuno̱o̱k katsak ba, yong a fe̱ be aner kuro̱k'e ye, “Igon'i, tu daam baꞌ, a ma ka re̱ng rine̱n wan.”

³Be kufok anong áner kubo̱so̱p itsi ákak fe̱ kaye̱e̱r aye̱ ba ye, “Aner na zhe̱e̱sh Adakunom.”

⁴aYeso tá ren kuto̱ro̱ng ba, iyong a fe̱ be ba ye, “Akye̱ sak yin nye yin amaan kuto̱ro̱ng anong kaye̱e̱r aye̱ yin e̱?

⁵Inyaka ro̱ ne i nar e̱? A ta fe̱ be aner ye, ‘A ma ka re̱ng rine̱n wan,’ ka ‘Dorok ta tseng’ e̱?

⁶Amma mi shim yin ta ren yin ye, Igon Anerawe be kukyem a tanin re̱ng rine̱n kaye̱e̱r kazatse,” iyong a fe̱ be aner aya a tá we̱ abas azining ame ye, “Dorok tá sok ike̱re̱ kameneng wan ta be kari.”

⁷Ayong aner ame dorok, a tá be kari.

⁸Nizen iya ánerawe ame tá di anong, inyim tú ro̱ ba iyong á kerek Adakunom aya a tá no̱o̱k ánerawe kukyem kuri kuyong.

⁹aYeso tá ya kasho̱o̱n be kutseng ne a di afe kushashang itso̱m iben akak a tú ku yis ye aMatiyu, a se nusonong naro̱ itomong wu. aYeso fe̱ be wu ye, “Ni kuus,” iyong a dorok nong a tú ku kuus.

¹⁰Nizen aYeso ta se be iya naya nasa aMatiyu'me, áfe kushashang itso̱m iben whe̱re̱ ne áfe rine̱n be̱s ne á ya mak be wu ne alimazhiri wu.

¹¹Áner aFarisi akak tá di anong iyong a rip álimazhiri'me ye, “Akye̱ sak áner kubo̱so̱p yin yas be áfe kushashang itsom iben ne áfe rine̱n e̱?”

¹²aYeso tá fa fok anong ne a fe̱ ye, “Aya a ta nye atser tse̱r abok baꞌ, afe iro̱k tse̱r.

¹³Tseng yin se tse̱r yin ike̱ng iya rife̱ Adakunom na tin fe̱ natoon'e: ‘Mi nar kushim ku tonong kuro̱ riye̱ be tana nye asidaka.’ Kamok mi be̱ ta yis aya a ta di ye ba se gye̱r nasho̱o̱n Adakunom baꞌ, mi be̱ ta yis áfe rine̱n.”

¹⁴Ayong álimazhiri aYohana be̱ nong á ta rip aYeso ye, “Akye̱ sak yir be áner aFarisi man ne i nye yir azumi, amma álimazhiri wan nye baꞌ e̱?”

¹⁵aYeso fe̱ be ba ye, “Áferime̱ aner aya a ta sok abining afas ta nye riye̱ riwe kum ne ba rusek be aner aya a tá nye kuwe̱ne̱ng'e a? Izen saase ife á tana sok aner a tana ku rosom kuwe̱ne̱ng'e nasho̱o̱n ba, nizen iyong ne ba ta nye azumi.

¹⁶“Ko akak ta basak kures be itan'e ifas iya i ta furuk baꞌ, kamok itan'e ta bun i wuruk kaye̱e̱r kures'e ne ribong'e nibarang.

¹⁷A korok ashi anap afas kaye̱e̱r ariding kukpa kuzen baꞌ, ke a nye anong ariding'e tà sarak ne ashi anap'e [8] nyosong. Ariding'e ta beseng. A korok ashi anap afas na ariding kukpa kufas, be anong ne cice̱r tà sor gye̱r.”

¹⁸aYeso tá ru fe̱ anong, ako̱k kasho̱o̱n kutu aduwa akak be̱, a tá be̱ tiguum nasho̱o̱n aYeso ne a fe̱ be wu ye, “Angas'i ku kyo̱o̱rna'me. Be̱ tin sak kubo̱k ni wu nong a tà te atser.”

¹⁹aYeso dorok mak be álimazhiri wu nong a ta tseng.

²⁰Nama anong, abining akak, naso̱k tá teng aye̱ kuso̱k be afa be̱ nabas kama aYeso nong a tá ra kanu kukpiin aYeso'me.

²¹Abining ame to̱ riye̱ wu ye, “Ke mi ra kukpiin wu tsek, mi tà te atser.”

²²aYeso tá fa kirik a tú ku di, yong a fe̱ be wu ye, “Sang wan tu daam baꞌ, angas, kuno̱o̱k katsak wan n sak wan n te atser.” Ne abining'e wor a te atser nizen iyong.

²³Nizen aYeso tá no̱ nasa ako̱k kasho̱o̱n ame, a di áfe kute̱p asharuwa ne ánerawe be riwo̱ng.

²⁴Ne a fe̱ be ba ye, “Tseng yin, kanamang'e n ku baꞌ. A se be ida.” Ayong á tu mas.

²⁵Nama a tá tun rigwo̱m ame nufang, ne a no̱ kaye̱e̱r kutu'me, a tá sok kubo̱k kanamang'e, ne ka dorok.

²⁶Itak na tseng koake̱ kaye̱e̱r kaben'e.

²⁷aYeso tá fa won azong, iyong ákpato̱o̱n afa san ku kukuus ne á tang kuto̱ ne á ku yis ye, “Igon aDauda, ro̱ riye̱ yir!”

²⁸Nizen aYeso tá no̱ kaye̱e̱r kasa kakak, ákpato̱o̱n afa ame be̱ nufu, yong a tú ku rip ba ye, “Yin ti no̱o̱k yin katsak ye, mi ta kyem i ka sak yin ta te yin atser a?” Ayong ba fe̱ ye, “Ei, Atekasa!”

²⁹Ayong aYeso ra anyisi ba ne a fe̱ ye, “Won i tu se anong, kyo̱ndi yin ti no̱o̱k yin katsak.”

³⁰Anyisi ba wor a karak. aYeso tu kpam ba ye, “Sang á tu tak akak baꞌ.”

³¹Amma á ban a wuruk nong a tá tsang á taas itak kaye̱e̱r kaben'e cice̱r ingya.

³²Nizen ba ta sen wuruk, áner akak be̱e̱n aner akak a tá be amaan nabik nufe aYeso, i tú ku roon kufe̱ kanu.

³³A ta fa tun amaan nabik'e, aner a tá tsang a nye agbanu ame fe̱ kanu. Ánerawe whe̱re̱ te zhing ne á fe̱ ye, “Yir kun di yir ike̱ng ikak ana niben Isarela baꞌ.”

³⁴Amma áner aFarisi fe̱ ye, “Be kukyem agwo̱m ítseng'e ne a ti turung nabik'e.”

³⁵Nama anong aYeso tsang tseng na agbang iwo̱p ne izhizhe̱k'e cice̱r, ne a nye awazi kaye̱e̱r atu aduwa ba. Ne a ku taas ba Rife̱ Ritek natoon rigwo̱m Adakunom ne a sak áfe iro̱k ze̱r ze̱r te atser.

³⁶Nizen aYeso tá di ánerawe whe̱re̱, a ro̱ riye̱ ba, kamok á se nudaam, á be akak a tana ka tobok ba baꞌ. Á se kyo̱ndi itsamang dar afek.

³⁷Ayong a fe̱ be álimazhiri wu ye, “Ishamang kuse dide̱ng, amma áfe itomong'e se hiir.

³⁸Kamok anong nye yin aduwa nong atek riko̱'me tin barang áfe a tana ku nye itomong ishamang'e.”