Read izere aMarkus 11 Bible Online

aMarkus 11 - izere bible

aMarkus 11

¹Nizen iya ba tá be̱ bubarak be aUshalima nuwo̱p aBatafazhi ne aBetani naro̱ a ta yis ye, kawhanang nafar, yong aYeso tom álimazhiri wu afa.

²A ta fe̱ be ba ye, “Tseng yin nabuwo̱p kya nasho̱o̱n, ke yin no̱ yin nuwo̱p'e yin tà di yin kaba azhaki kaya akak tá kun ni ngarak baꞌ, nurosom azong. Bisik yin ta be̱e̱n yin'e aze.

³Ke aner akak tà ka rip yin ye, ‘Kamok akye̱ yin nye yin anong e̱?’ Ne i ku tak yin ye, ‘Atekasa ne a tse̱r. A tà bun a be̱e̱n'e kyo̱o̱rna.’ ”

⁴Ayong ba tseng a se se̱ igon azhaki nufang kukim iren a tan roos nanu kutu. Nizen iya á tá sen bisik'e,

⁵aner akak a ta se nyeseng azong, tá ku rip ba ye, “Akye̱ ne yin sen nye yin e̱? I sen bisik yin igon azhaki'me a?”

⁶Ne ba fe̱ kyo̱ndi aYeso tá fe̱ be ba, yong áner'e tú ku won ba'me nong á tá tseng'e.

⁷Nizen iya ba tá be̱e̱n aYeso'me, a turung ares ba nong á tin tarak natoon azhaki'me. Ne aYeso ni ngarak natoon'e.

⁸Ánerawe whe̱re̱ tarak ares ba niren ne ákak bo̱o̱s afumung nong á tá saas niren'e.

⁹Áya afe a ta se nasho̱o̱n ne áya a tú ku kuus nama tsang á ta sak ye, “Nakerek nye nafe Adakunom!” “Aner riye̱ rikan nye aya a ta saase kaye̱e̱r riyerek Agwo̱m Ágwo̱m.”

¹⁰“Kube̱ rigwo̱m ada yir aDauda nye ike̱ng riye̱ rikan!” “Nakerek nye nafe Adakunom!”

¹¹aYeso tá no̱ na aUshalima, a se no̱ kaye̱e̱r agbang kutu kuya Adakunom iben, nong a tá ye̱re̱k koakye, kamok kunom tsang ku kpa, a wuruk a tá be na aBetani mak be álimazhiri wu kuso̱k be afa.

¹²Kayatson'e á tá won ba aBetani, ayong aYeso fok izong.

¹³A di atafo tan funung gugo̱k, a tseng nong a tá di ka wu ta se̱ agbang'e. Amma a tá tseng ritin'e a di awan afumung tsek, kamok i nye izen atafo tana be agbang baꞌ.

¹⁴Ayong aYeso fe̱ be ritin atafo'me ye, “Akak tà ba ya kutes wan baꞌ.” Ne álimazhiri wu fok ike̱ng iya wu tá fe̱.

¹⁵Be ku no̱ ba kaye̱e̱r aUshalima, aYeso no̱ kaye̱e̱r agbang kutu kuya Adakunom iben nong a tá kpaan iro áya a tá se be kure̱e̱s ike̱re̱ kaye̱e̱r'e. A gaas átebur áfe a ti shishing itso̱m ne itsik áfe a tá re̱e̱s abo̱p.

¹⁶Ne a bun a roon koangan ku gosok kaye̱e̱r kubang be ike̱re̱ kure̱e̱s.

¹⁷Ne a ku bo̱so̱p ba'me ye, “I se ni izibir ye, “ ‘A ta yis kasa mi ye, kasa aduwa ánerawe kazatse cice̱r.’ “Amma yin n sok yin nong i ta min nye yin karo̱ kune̱re̱ng ágbang akpatang.”

¹⁸Agbang átsi ne áner kubo̱so̱p Itsi tá fa fok anong ne kpaan kutse̱r iren iya a tana ku fe̱r. Ba fok inyim wu, kamok ánerawe'me cei tá te zhing be kubo̱so̱p wu.

¹⁹Karo̱ ta fa te kawheshirim ne aYeso be álimazhiri wu won kuwo̱p'e.

²⁰Nadiding bop, á ta se be gor ne á di ritin atafo ame tan koor ma na atsip'e.

²¹aBitrus yiring'e, yong a fe̱ be aYeso ye, “Di, Aner Kubo̱so̱p, ritin atafo wan tá fiming ame n koor.”

²²Ne aYeso fe̱ be ba ye, “Ni no̱o̱k yin katsak na Adakunom.

²³Katsak ne mi ta ka tak yin, koangan ne a fe̱ be rifan na ye, ‘Dorok nong ta se kpa kaye̱e̱r agbang kudung’ sang be agak riye̱ baꞌ, amma be riye̱ rizining ike̱ng iya wu ta fe̱ ye i ra nye, i tà nye.

²⁴Kamok anong, mi fe̱ be yin ye, koakye ne yin tà rip yin kaye̱e̱r aduwa, i ni no̱o̱k yin katsak ye yin n se̱ yin, i ta te ife yin.

²⁵Izen iya yin no̱ yin ninye aduwa, ke yin be yin ike̱ng ikak be akak kaye̱e̱r riye̱ yin, ku re̱ng yin'e, nong Ada yin afe a ta se kaye̱e̱r kaza tà ma ka re̱ng yin rine̱n yin gip.

²⁶Amma ke yin re̱ng yin ákak rine̱n ba baꞌ, Ada yir afe a ta se kaye̱e̱r kaza ta ma ka re̱ng yin rine̱n yin baꞌ.”

²⁷Nizen iya á tá bun a be̱ ba na aUshalima, aYeso se be kutsang kutseng kaye̱e̱r kubang agbang kutu kuya Adakunom iben, ne agbang átsi be áner kubo̱so̱p itsi ne áko̱k kasho̱o̱n be̱ nufe aYeso.

²⁸Ne á ku rip ye, “Be akye̱ kuri kukyem ne wan ti nye ike̱re̱ na e̱? Angan ta no̱o̱k iren kunye ike̱re̱ na e̱?”

²⁹aYeso fe̱ be ba ye, “Mi tà ka nye yin kurip kuzining tsek. Ni tak yin nong mi ta ma ka tak yin kuri kukyem mi tin nye itomong.

³⁰Ni tak yin, abatisma aYohana tá nye, a nye afe Adakunom ka afe anerawe e̱?”

³¹Ayong á nye ibo̱ro̱ng awan ba á tá fe̱ ye, “Ke yir fe̱ yir ye, ‘A nye afe Adakunom,’ a tin rip yir ye ‘Akye̱ sak yir ti no̱o̱k yir katsak ni wu baꞌ e̱?’

³²Amma ke yir fe̱ yir ye, ‘A nye afe anerawe.’ ” (Ba fok inyim anerawe, kamok koangan ren ye aYohana nye aner kuzarap.)

³³Ayong á fe̱ be aYeso ye, “Yir ren yir baꞌ.” Ayong aYeso fe̱ be ba ye, “To̱, mi tà ma ka tak yin ka be akye̱ kuri kukyem ne mi ti nye ike̱re̱ na baꞌ.”