Read izere aMarkus 12 Bible Online

aMarkus 12 - izere bible

aMarkus 12

¹Ayong aYeso san rife̱ be ba kaye̱e̱r kumaas ye, “Aner akak tuse a tá be riko̱ anap. A gorok ne a rum ribong nong a tin fi ashi'me, a nye karo̱ garang nong aner kutor riko̱'me tin sor. A ko̱bo̱k áner akak riko̱'me nong a ta be nutseng.

²Izen iya anap'e tá fa te, atek riko̱ ame tom asam wu akak ye a ra tseng nufe áner wu tú ku ko̱bo̱k ba riko̱ ame nong a tá su ku shan kanu kafu.

³Amma áner aya a tú ku no̱o̱k ba riko̱ ame yiir asam'me, a tú ku tsor, nong á ta bun á tú ro dar ike̱ng ikak nubo̱k.

⁴Ayong atek riko̱ ame bun a tom asam wu akak nufuba, á bun á tú ku tsor, ne á nye be asam'me kye̱re̱.

⁵Atek riko̱ ame bun a tom asam wu akak nufuba gbak, ayong á fe̱r asam'me ayong. Atek riko̱ ame tos ásam whe̱re̱, amma á bun a tsosok ákak ba, ne á fe̱s ákak.

⁶“Gip be anong, a tú won aner azining wu tana tom, aner'e nye igon'i, kaya mi ta shim. Ni igang'e, a tú tom nufuba ye, ‘Ei, á ta sok igon'i yiik.’

⁷“Amma áfe a tá ko̱bo̱k riko̱ ame nye ibo̱ro̱ng ye, ‘Ayuna ne a nye aya kutse wu, be̱ yin i ku fe̱r yir nong kutse'me tà te kufe yir.’

⁸Ayong á tú ku yiir nong á tú ku fe̱r, á ku barak nama riko̱'me.

⁹“aYeso tú ku ri ba ye, ‘To̱, akye̱ ne atek riko̱'me ta ma nye e̱?’ A ta tseng nong a ta se fe̱s áner wu tú ku ko̱bo̱k ba riko̱'me, ne a won riko̱'me nubo̱k áner ákak ze̱e̱r.

¹⁰Aser, yin kun fa yin afumung na a? Kamok i se kaye̱e̱r izibir ye; “ ‘Kuta kuya áfe rino̱k tá raba, ne kute itsik ribor kutu.

¹¹Agwo̱m Ágwo̱m ne a nye anong, i nye ike̱ng azhing nufe yir.’ ”

¹²Ayong á tse̱r iren kuyiir aYeso kamok ba ren ye, a ti nye kumaas'e natoon ba. Á ra fok inyim ánerawe'me, yong á tú won nong a tá tseng.

¹³Kamok anong, á bun á tom ba áner aFarisi ákak ne áner aHiridus nufe aYeso nong á su ku yiir natoon ike̱ng iya wu tá fe̱.

¹⁴Á tá be̱ nufu ne á fe̱ ye, “Aner kubo̱so̱p, yir ren yir ye, wan nye aner katsak. Ánerawe kyem a ka kirik baꞌ. Wan ye̱re̱k ánerawe kuri kuzining, amma wan bo̱so̱p iren Adakunom be katsak tsek. I se gye̱r yir ta karang yir aKaisar itso̱m iben aꞌa?

¹⁵I karang yir ka i won dar karang yir e̱?” Amma aYeso ren amaan kuto̱ ba, yong aYeso fe̱ be ba ye, “Akye̱ sak yin shim yin mi ta taam e̱? Ni be̱e̱n yin ica itso̱m'e ta di.”

¹⁶Ayong a tú be̱e̱n ica'me, ne a ku rip ba ye, “Nawu angan be riyerek angan na e̱?”

¹⁷Ayong aYeso fe̱ be ba ye, “No̱o̱k yin aKaisar ike̱ng iya i ta nye ife aKaisar, ne i no̱o̱k yin Adakunom ike̱ng iya i ta nye ife Adakunom.” Ayong á ta te ba zhing be rife̱ wu.

¹⁸Áner aYahuda ákak áya a tá se kaye̱e̱r kugung rice aSadusi be̱ nufe aYeso nong á tá fe̱ be wu ye sang kudorok ikom kuse baꞌ. Ayong á be̱ nufu be kurip ye,

¹⁹“Aner Kubo̱so̱p, aMusa ti zibir yir'e ye, ke aronyining aner ku a tá won abining dar igon, aronyining akak ta sok akumung'e, nong ase̱ a tú ku tes mo igon.

²⁰To̱, áner ákak tuse á tá nye áner be áronyining, ba kanataar. Aner afe ime̱se̱ng'e nye kuwe̱ne̱ng ne a ku dar kuse̱ igon.

²¹Afe afa'me sok akumung ame, amma a bun a ku dar kuse̱ igon. Anong ne i se be afe ataar'e.

²²Anong ne áner kanataar'e cei kus dar kuse̱ igon. Ni igang'e abining'e ku gip.

²³Nizen kudorok ikom, abining'e ta nye afe angan kaye̱e̱r áner kanataar'ong á tá tsang á nye kuwe̱ne̱ng be wu e̱?”

²⁴Ayong aYeso fe̱ be ba ye, “Kuto̱ro̱ng yin se gye̱r baꞌ, kamok yin ren yin ike̱ng iya rife̱ Adakunom ta fe̱ ka kukyem Adakunom baꞌ.

²⁵Nizen kudorok ikom, a tà ba nye kuwe̱ne̱ng ka a tà no̱o̱k akak nuwe̱ne̱ng baꞌ. A ta se kyo̱ndi ámaleka kaye̱e̱r kaza.

²⁶Kyo̱o̱rna natoon kudorok ikom, yin kun fa yin kaye̱e̱r Kufumung aMusa a? Itak natoon kabuci. Adakunom tà fe̱ be wu ye, ‘Mi ne i nye Adakunom afe Ibrahim ne i nye Adakunom Ishaku, ne i nye Adakunom aYakub.’

²⁷A nye Adakunom ikom baꞌ, amma Adakunom áfe a ta be atser. Yin taam yin dide̱ng.”

²⁸Aner kubo̱so̱p Itsi akak be̱ ne a fok a ta sen ya nanaan. A tá fok aYeso tá shiish gye̱r, yong a tú ku rip ye, “Kaye̱e̱r Itsi cei inyaka ne i nar e̱?”

²⁹aYeso fe̱ be wu ye, “Igbang'e nye iya i ta fe̱ ye, ‘Fok yin, áner Isarela, Agwo̱m Ágwo̱m, Adakunom yir se azining.

³⁰Kamok anong shim Agwo̱m Ágwo̱m Adakunom wan be riye̱ wan cei, be kutser wan cei, be kuto̱ro̱ng wan cei ne agap wan cei.’

³¹Ife ifa'me se ye; shim afegbak wan kyo̱ndi rice wan. Itsi ikak kuse i ta bun i nar iyong baꞌ.”

³²Ayong aner kubo̱so̱p Itsi ame fe̱ be aYeso ye, “Wan fe̱ gye̱r, Aner kubo̱so̱p, wan ta fe̱ ye Agwo̱m Ágwo̱m se azining, akak kuse ze̱e̱r be wu baꞌ.

³³A ra ku shim be riye̱ rizining cei, be kuto̱ro̱ng cei ne agap cei ne shim afegbak wan kyo̱ndi wan ta shim rice wan, i se yiik ne i nar asidaka be kunyesek ike̱ng.”

³⁴aYeso tá fok a ta fe̱ be kukyem, yong a fe̱ be wu ye, “Wan se tsik be rigwo̱m Adakunom baꞌ.” Nama anong akak ba ra ba kyem á tu ku rip ike̱ng ikak baba baꞌ.

³⁵aYeso ta se be kubo̱so̱p kaye̱e̱r kubang agbang kutu kuya Adakunom iben, ne a rip ye “Kamok akye̱ afe kubo̱so̱p Itsi fe̱ ye, aKiristi nye Igon aDauda e̱?

³⁶Kabik Kazhe̱l'e ne ka sak aDauda ta fe̱ ye, “ ‘Agwo̱m Ágwo̱m fe̱ be Agwo̱m Ágwo̱m mi ye, “Sonong nubo̱k riya mi, ma mi sak ámudo̱n wan ta kpa kaben.” ’

³⁷“aDauda be rice wu tú ku yis ye, ‘Agwo̱m Ágwo̱m.’ To̱, ne a bun a nye ane̱ a ta nye igon wu e̱?”

³⁸Nizen aYeso ta se be kubo̱so̱p a fe̱ ye, “Sak yin riye̱ be áner kubo̱so̱p Itsi, á ta shim kutsang tseng be agbang akpiin. Á shim á ta ka nye ba ashou ninaro̱ rizhik.

³⁹Ne á kasa naro̱ natek natu aduwa ne ninaro̱ kunye riye̱ rikan kyo̱ndi ágbang áner.

⁴⁰Ne a mo̱o̱r ike̱re̱ ákumung ne a nye aduwa aso̱p nong á ta tonong kuren ike̱ng, áner ayong ne Adakunom tà ka to̱ ba amaan amok.”

⁴¹aYeso sonong bubarak be karo̱ a tú ku saas abeko kaye̱e̱r kutu a tu ku ya Adakunom iben. Ne a ye̱re̱k rigwo̱m anerawe ta saas itso̱m ba kaye̱e̱r kures abeko'me. Árum akak whe̱re̱ korok itso̱m cip.

⁴²Amma akumung akak a tá be rizor be̱ nong a tá be̱ sak ica itso̱m izhizhe̱k'e ifa.

⁴³Ayong aYeso yis álimazhiri wu nong a tá fe̱ be ba ye, “Katsak, ne mi ta ka tak yin, ike̱ng ife akumung na ta sak nar ife ribir ánerawe cice̱r kaye̱e̱r kures na.

⁴⁴Ba no̱o̱k kaye̱e̱r kurum ba cice̱r, amma wu no̱o̱k kaye̱e̱r rizor wu, ike̱ng iya wu tin sor cei.”