Read izere aMarkus 16 Bible Online

aMarkus 16 - izere bible

aMarkus 16

¹Kunom Asabar tá fa gor, aMarya aMagadaliya, be aMarya anyining aYusufu ne aSalomi, shan ike̱re̱ iko̱o̱n itek, nong á tá sen kon natoon kukom aYeso.

²Bop nadiding katuk ime̱se̱ng'e na asate, kum ne kunom rusek ku ta ra wuruk ne ba shan iren nong á tá be nure̱k'e.

³Á tá se ba niren ne á fe̱ ba ye, “Angan tà sen tomong yir kuta kuya ku ta se nanu kure̱k e̱?”

⁴Amma á tá fa tseng ba azong naro̱'me ne á sok anyisi naza ne á di an tomong kugbang kuta ame nanu kure̱k'e.

⁵Á tá fa no̱ kaye̱e̱r kure̱k'e, ne á di acam akak a tan te ares akan nusonong nabas kubo̱k riya, ne azhing tu yiir ba.

⁶Ayong a fe̱ be ba ye, “Sang tu te yin zhing baꞌ, yin tse̱r yin aYeso afu aNazaret aya a tú ku tigak aꞌa? An dorok! A kuse aze na baꞌ. Di yin karo̱ a tú ku mees.

⁷Amma tseng yin, ta se tak yin álimazhiri wu be aBitrus ye, ‘A ta ka tseng ba na aGalili. Azong ne ba tú ku di kyo̱ndi a tá fe̱ be ba.’ ”

⁸Ányining ame wuruk be itsi, án te titak ma á tsang tiim. Á fe̱ ike̱ng ikak be akak baꞌ, kamok inyim tú ku ro̱ ba. [

⁹Nizen iya aYeso tá dorok nure̱k nadiding bop katuk ime̱se̱ng'e na asate, a san i tonong rice wu nufe aMarya aMagadaliya, aya aYeso'me tú ku turung ítseng kanataar ame.

¹⁰Ayong aMarya'me tseng nong á tá tak áner aya a tá tsang a se mak be aYeso'me ne áya a tá ta se be riye̱ riwe ne kanak.

¹¹Amma ba tá fa fok ye, aYeso'me ru nye atser, ye wu tú ku di, ba ti no̱o̱k katsak baꞌ.

¹²Nama anong aYeso ti wuruk na álimazhiri ákak ba afa nizen iya á tá se be kutsang kutseng, a wuruk kuri kuwuruk kukak ze̱e̱r nong a tá se nyim be ba.

¹³Álimazhiri afa ame tú bun nong á tá se tak ribir afudang ba, amma ko áfudang ba'me bun á ti no̱o̱k katsak baꞌ.

¹⁴Nama aYeso tin wuruk na álimazhiri wu kuso̱k be azining nizen á ta sen ya naya. A tú zhe̱e̱r ba, kamok ku won dar kuno̱o̱k katsak ba ne kushonong ba á tá gaar ku nino̱o̱k katsak rife̱ áya a tú ku di nama wu tá dorok baꞌ.

¹⁵A fe̱ be ba ye, “Tseng yin koake̱ kaye̱e̱r kazatse, se taas yin ánerawe cice̱r Rife̱ Ritek'e.

¹⁶Aner aya ne a ti no̱o̱k katsak, a tu ku nye abatisma a ta se̱ kashesh. Amma aner aya ne a gaar ku ni no̱o̱k katsak, a tù ku to̱ amok.

¹⁷Áya a tin no̱o̱k katsak ni mi tà nye ike̱re̱ na: Kaye̱e̱r riyerek'i, á tà turung ámaan nabik ne á fe̱ kanu kaye̱e̱r irem ifas.

¹⁸Á tà yising íwhen be ibo̱k ba. Ke á so̱ amaan nado̱m, na tú ku nye ba ike̱ng ikak baꞌ. Á tin saas ibo̱k ba natoon áya a ta nye atser baꞌ, ne á tà te atser.”

¹⁹Nama aYeso tá fe̱ anong be ba, a tú sok a tá tseng'e kaye̱e̱r kaza nong a ta se sonong nubo̱k riya Adakunom.

²⁰Álimazhiri wu ame tseng nong á ta se taas Rife̱ Ritek koake̱. Agwo̱m Ágwo̱m ti nye itomong be ba dide̱ng. A tonong ye rife̱ ba be katsak be ike̱re̱ azhing iya ba tá nye mak be rife̱'me.]