Read izere aLuka 15 Bible Online

aLuka 15 - izere bible

aLuka 15

¹Katuk kakak, áfe ku shashang itso̱m iben ne “áfe rine̱n” naka tusung nong á ta foos aYeso.

²Áner aFarisi be áfe kubo̱so̱p Itsi kpaan anyinye̱m ye, “Aner na nye rime̱ be áfe rine̱n, ne a yas mak be ba.”

³Ayong aYeso tú tak ba kumaas na ye,

⁴“Ke akak yin fa be ítsamang kuso̱k inyak, izining ra titei, a ta won iso̱k katonbo̱k be katonbo̱k'e niwe̱ng nong a ta se tse̱r iya i tá titei'ong ma a se̱ aꞌa?

⁵Izen iya ne a se̱, a tà nye riye̱ rikan, a tà fanang nape̱me̱ng.

⁶A tseng'e kari a tà se yis áferime̱ wu be áfe abubarak be wu naro̱ kazining ne a fe̱ ye, ‘Ni se̱ mo yin riye̱ rikan, mi n se̱ itsamang'i iya i tá titei ame.’

⁷Mi ta ka tak yin, anong ne i se kaye̱e̱r kaza, a tà nye riye̱ rikan kamok afe rine̱n azining a tá shishing kuse wu, ne a nar áner iso̱k katonbo̱k be katonbo̱k á ta nye azhe̱l'e áya a tan tsang á shishing kuse ba.”

⁸“Ke abining akak be íca itso̱m kuso̱k, izining ra wei, aser a tin te kuro̱ng na apitila nong a ta re̱ng kaye̱e̱r kasa'me ne a ni te iso̱r ni itse̱r'e aꞌa?

⁹Izen iya ne a se̱ a tà yis áferime̱ wu be áfe abubarak be wu cice̱r nong a ta fe̱ be ba ye, ‘Ni se̱ mo yin riye̱ rikan, mi n se̱ itso̱m'i i ta wei ame.’

¹⁰Anong ne i ta se gip, mi ta tak yin, ámaleka Adakunom tà nye riye̱ rikan ke afe rine̱n azining shishing kuse wu nong a ta shan Adakunom.”

¹¹aYeso ya kasho̱o̱n be rife̱ ye, “Aner akak tuse a tá be inoon nafa.

¹²Igon kawusong'e fe̱ be atek ye, ‘Ada, ni no̱o̱k kutse kunaan.’ Ayong atek ba'me tú kasap ba ike̱re̱ wu tá be.

¹³“Nama inom cie̱k, igon kawusong'e tusung ike̱re̱ wu cei, nong a tá be niben ikak tsik, azong ne a se fe̱r be itso̱m wu ame kpe̱de̱ng.

¹⁴Nama a tá fe̱r koakye wu tá be, ne amaan izong no̱ niben'e cei, a ma no̱ nudaam makong.

¹⁵Ayong a tseng nong a ta se tse̱r itomong nubo̱k aner akak. Aner'e tú no̱o̱k itomong kufek álade.

¹⁶A shim ke a ya amaan naya álade'me, amma a tú no̱o̱k ko cie̱k baꞌ.

¹⁷“Nizen kuto̱ro̱ng wu tú ku bun ne a fe̱ ye, ‘Áner á ta nye itomong nasa ada mi se̱s naya whe̱r, ne á ya ma a nyeen'e, ne mi na aze izong sen i ni fe̱r.

¹⁸Mi tà dorok nong ta tseng ta se fe̱ be ada mi ye, Ada, mi n nye Adakunom rine̱n ne i ka nye'me.

¹⁹Mi ba kyem a tin yis ye igon wan baba baꞌ. Ni sok ta te asam wan akak.’

²⁰Ayong a dorok a tú ku bun nufe atek ame. “Kum ne a rusek tsik niren ne atek ame ku di, ne a fok kuro̱ riye̱ wu dide̱ng yong a teng a ta be nufe ariwu ame a tá su ku kunung.

²¹“Ne ariwu ame fe̱ be wu ye, ‘Ada, mi n nye Adakunom rine̱n ne i ka nye'me gip. Mi ba kyem a tin yis ye igon wan baba baꞌ.’

²²“Amma atek ame yis ásam wu nong a tá fe̱ be ba ye, ‘Be̱ yin be kukpiin kutek gbashak nong tu ku te yin'e. Ku te yin kanarang naban kubo̱k ne i ku te yin akpatak natak.

²³Be̱e̱n yin be amung aya a tan no̱ nong ta tse̱e̱r yin. I nye yir riye̱ rikan.

²⁴Kamok igon'i name tsang a ku, kyo̱o̱rna a nye atser, a tsang a titei, a mu ku se̱.’ Iyong á san riye̱ rikan'e.

²⁵“Nizen iyong igon kako'me se riko̱, a tá fa be̱ bubarak be kasa, ne a fok abom be nato.

²⁶Ayong a yis asam'me akak nong a tú ku rip ike̱ng á tá sen nye'me.

²⁷Ne asam'me fe̱ be wu ye, ‘Aronyining wan m be̱, yong ada wan tse̱e̱r agbang amung, kamok a tu ku bun caang.’

²⁸“Riye̱ igon kako'me beseng, ma a gaar kuno̱ kari. Ayong atek wuruk a ta su ku nye akusuk.

²⁹Amma igon'e fe̱ be atek'e ye, ‘Ada, di aye̱ na cei mi kun yiir ka nye itomong, mi kun ka shonong baꞌ. Gip be anong wan kun ni no̱o̱k kaban ibon nong tin nye riye̱ rikan be áferime̱ mi baꞌ.

³⁰Amma igon wan na, afe a tá se wei be kurum wan nufe inyak ágwo̱m tá fa be̱ kari, wan tú ku tse̱e̱r kugbang kumung.’

³¹“Atek'e fe̱ be igon wu'me ye, ‘Igon'i, wan se mak be mi ye̱r ye̱r, koakye mi ta be, i nye ifuan.

³²I se gye̱r ta nye yir riye̱ rikan ne i fok yir kusas'e kamok aronyining wan na tsang a ku, a bun a be̱ be kutser, a tsang a titei, a mu ku se̱.’ ”