Read izere aLuka 17 Bible Online

aLuka 17 - izere bible

aLuka 17

¹aYeso fe̱ be álimazhiri wu ye, “Ike̱re̱ i tana sak ánerawe tana nye rine̱n tà be̱ dim. Awo̱ be aner aya a tana sak akak tana nye rine̱n.

²I ta nar ke a tu rosom kuta ako̱ nuto̱ nong a tu ku barak kaye̱e̱r agbang kudung be a tana sak azining kaye̱e̱r ázhizhe̱k'e na tana nye rine̱n.

³Kamok anong sak yin riye̱. “Ke aronyining wan ta nye rine̱n ne i ku tak, ke a shishing kuse wu, ne i ku re̱ng'e.

⁴Ke a tá nye rine̱n kutak kanataar kunom kuzining, a ra bun a be̱ kutak kanataar ne a fe̱ be wan ye, ‘Mi n nye rine̱n, ni re̱ng'e,’ ne i ku re̱ng'e.”

⁵Ámanzo fe̱ be Agwo̱m Ágwo̱m'me ye, “Ni barang mo yir kuno̱o̱k katsak.”

⁶Iyong Agwo̱m Ágwo̱m'me fe̱ be ba ye, “Yin fa be yin kuno̱o̱k katsak hiir kyo̱ndi ica naya a ta yis ye amusta, ke yin fe̱ yin be agbang kakon na ye, ‘Wuruk be atsip wan nong ta se nyeseng kaye̱e̱r agbang kudung,’ ka ta kuus ike̱ng iya yin tá fe̱ yin.”

⁷“A fa fe̱ ye akak kaye̱e̱r yin be asam, a tu ku kap ka a tu fek ítsamang ayi. Izen iya ne asam'me ne katse a be̱, atekasa'me tà fe̱ be wu ye, ‘Te gbashak ta be̱, ya naya aꞌa?’

⁸Ko cie̱k, sang a ta fe̱ ingya ye, ‘Nye kanye̱k nong tin nye naya katuk, nong mi ta ya ne i so̱ nizham. Nama mi ya, i so̱ ne wan ma ya’ aꞌa?

⁹A tà tonong asam'me riye̱ rikan kamok a tá nye ike̱ng ife a tá fe̱ be wu ye a ra nye aꞌa?

¹⁰Anong ne yin gip, ke yin nye yin koakye a tá fe̱ be yin ye i ra nye yin, yin tà fe̱ yin ye, ‘Yir nye yir áduk ásam tsek. Yir nye yir itomong a tá fe̱ ye, i ra nye yir tsek.’ ”

¹¹Nizen aYeso tá se niren, a be na aUshalima. A tseng nagbak iben aSamariya be aGalili.

¹²A tá fa tseng a tá no̱ nuwo̱p kukak ne ákparo̱ng ákak kuso̱k nyim be wu. Á nyeseng gugo̱k

¹³nong a tú ku yis be agap ye, “Atekasa aYeso, ro̱ riye̱ yir!”

¹⁴Nizen aYeso tú ku di ba, a fe̱ be ba ye, “Tseng yin ta se tonong yin rice yin nufe átsi ye yin n te yin atser.” Á tá se be kutseng ne á te atser niren.

¹⁵Nizen akak kaye̱e̱r ba tá fa di wu n te atser yong a tú bun, a tá ta kuto̱ ne a kerek Adakunom.

¹⁶A se kpa kaben nasho̱o̱n aYeso nong a tá tonong riye̱ rikan wu. Aner'e nye aner aSamariya.

¹⁷Ayong aYeso tú rip ye, “Áner kuso̱k ne a tú ku sak ba á tá te atser aꞌa? Ribir katonbo̱k'e se ake̱ e̱?

¹⁸Ákak kyem á tú bun á tá be̱ á kerek Adakunom baꞌ, ma aner atsen na tsek a?”

¹⁹Ayong aYeso fe̱ be wu ye, “Dorok ta tseng, kuno̱o̱k katsak wan sak wan te atser.”

²⁰Katuk kakak áner aFarisi ákak rip aYeso izen ife rigwo̱m Adakunom tana be̱, ne aYeso fe̱ ye, “Kube̱ rigwo̱m Adakunom nye ike̱ng ife a tana kyem a di be anyisi baꞌ.

²¹Ka ánerawe tà fe̱ ye, ‘Riyuna’ ka ‘Rikya’ baꞌ, kamok rigwo̱m Adakunom'me se kaye̱e̱r yin.”

²²aYeso fe̱ be álimazhiri wu ye, “Izen saase a tana ka te yin ke i di yin kunom kuzining kaye̱e̱r inom Igon anerawe, ko yin ra di yin baꞌ.

²³Ánerawe tà fe̱ be yin ye, ‘Riyuna’ ka ‘Riya, aza!’ ayi. Sang tu kuus yin rife̱ ba baꞌ.

²⁴Kamok katuk kube̱ Igon ánerawe tà se kanang kyo̱ndi akanang a ta samang koakye naza.

²⁵Ni ime̱se̱ng'e, a tà so̱ risam dide̱ng nizham ne ánerawe izam na ku rawu.

²⁶“Kyo̱ndi i tá se nizen aNuhu, anong ne i tà se nizen Igon Anerawe tana bun a be̱ gip.

²⁷Ánerawe tá sen ya ne á so̱, ne á nye iwe̱ne̱ng ne á nyesek ángas ba niwe̱ne̱ng ma izen iya aNuhu tá no̱ kaye̱e̱r agbang kukpara ashi. Ashi'me be̱ a tá fe̱s ribir ánerawe'me cei.

²⁸“Anong ne i se nizen aLot gip. Ánerawe tá sen ya ne á so̱, ne á shashang ike̱re̱ ne á re̱e̱s, ne á tuus ne á no̱k rino̱k.

²⁹Amma katuk aLot tá dorok na aSodom, Adakunom ti barak kuro̱ng ne iruur'e natoon ba nong a tá kus cei.

³⁰“Anong ne i tà se gip, nizen iya Igon Ánerawe tana tonong rice wu.

³¹Katuk kayong, aner aya ne a ta se natoon kutu be ike̱re̱ wu kaye̱e̱r'e, a tà ku tiik nong a tà ko̱k ike̱re̱ wu baꞌ. Anong ne aya a tá se riko̱ gip a tu ku bun kari nikum a tà se sok ike̱ng ikak baꞌ.

³²Yiring yin be abining aLot.

³³Aner aya a ta shim a tà shesh kutser wu, a tin wei, aya ne a ti wei nutser wu a tà se̱ kashesh.

³⁴Mi ta ka tak yin, katuk'ong aner afa tà se nameneng na agadu, a ta sok azining ne a ku won azining.

³⁵Ányining afa tà se be ako̱, a tà sok azining ne a ku won azining.

³⁶Áner afa ta se riko̱, á tà sok azining ne á ku won azining.”

³⁷Iyong álimazhiri aYeso tú rip ye, “Ake̱ ne a tà nye anong e̱?” Ne aYeso fe̱ be ba ye, “Karo̱ kaya wan tu ku di Ázhanga naka tusung, to̱, kukom tu kuse azong.”