Read izere aLuka 2 Bible Online

aLuka 2 - izere bible

aLuka 2

¹Nizen iyong agbang agwo̱m a tú ku yis ye aKaisar Agusta no̱o̱k itsi ye a ra fa ánerawe niben aRom cice̱r.

²Iyu ne i nye ime̱se̱ng ifa ánerawe a tá nye nizen iya aKiriniyus tá nye agwo̱mna niben aSuriya.

³Koangan be nuwo̱p wu nong a tà su ku fa.

⁴Ayong aYusufu gip a dorok na aNazaret niben aGalili, a tá be niben aYahuda nuwo̱p aDauda, a ta yis ye aBetalami, kamok wu nye aner kasa aDauda.

⁵A tseng azong nong á tà su ku fa be aMarya, kanamang kusam wu ame, ne ka se be kafa.

⁶Nizen á tá se azong, izen kutes'e nye,

⁷yong a tes acam, igon ime̱se̱ng wu. A kunung be ítan ares nong a tá mees nukpara a tin korok itsamang naya, kamok ba se̱ kasa naro̱ átsen tú ku tisik baꞌ.

⁸Áfe kufek tuse á tá sor niwe̱ng bubarak azong ne á ye̱re̱k ítsamang ba natuk.

⁹Amaleka Adakunom ti wuruk niba ne akanang kuyiik Adakunom ku gorok ba ma inyim tú ro̱ ba dide̱ng.

¹⁰Amma amaleka'me fe̱ be ba ye, “Sang tu fok yin inyim baꞌ, mi ma ka be̱e̱n yin Rife̱ Ritek rife̱ riye̱ rikan dide̱ng, riya ri ta nye rife̱ ánerawe cice̱r.

¹¹Katuur a ma ka tes yin aner kashesh nuwo̱p aDauda, wu ne a nye aKiristi, [5] aya a ta nye Agwo̱m Ágwo̱m.

¹²Ike̱ng iya yin tana san i di yin nye, igon a tan kunung be ítan ares nameneng kaye̱e̱r kukpara a tin tes itsamang naya.”

¹³Nizen izining rigwo̱m ámaleka áfe a ta se kaye̱e̱r kaza wuruk nong á tá kerek Adakunom mak be amaleka ame ye,

¹⁴“Kuyiik nye kufe Adakunom aza kaye̱e̱r kaza, nazatse kameneng riye̱ kuse nufe áner áfe wu ta shim.”

¹⁵Nizen iya ámaleka'me tú ku won ba nong á tú ku bun naza, áfe kufek ame fe̱ ye, “I tseng yir na aBetalami nong ta se di yir ike̱ng Adakunom tá min tak yir na.”

¹⁶Iyong á tseng zizirik ne á se se̱ aMarya be aYusufu be igon ame an mees kaye̱e̱r kukpara a tin tes itsamang naya ame.

¹⁷Nizen áfek ame tá di igon'e yong á tsang á taas ike̱ng iya ba tá fok natoon igon'e.

¹⁸Ánerawe áya a tá fok itak cice̱r korok ibo̱k nafok ne á te zhing.

¹⁹aMarya sak ike̱re̱'me cei kaye̱e̱r riye̱ wu, ne a ni to̱ natoon'e.

²⁰Áfek ame tú bun ne á tsang á tiyiik Adakunom ne á ku kerek kamok ike̱re̱ ba tá fok ne á di cei, kyo̱ndi a tú ku tak ba.

²¹Nama inom ikara be kutes'e, izen a tana ku nye izhak tá fa nye, yong a tú ku te riyerek ye, aYeso, riyerek riya amaleka tá tsang a ku te'me kum ne an be kafa wu baꞌ.

²²Izen a tana ku kusu ba nama kutes tá nye, kyo̱ndi Itsi aMusa ta fe̱, yong aYusufu be aMarya tseng be aYeso na aUshalima nong a tà no̱o̱k nasho̱o̱n Agwo̱m Ágwo̱m.

²³Kyo̱ndi i tá se kaye̱e̱r izibir Itsi Agwo̱m Ágwo̱m ye, “Koakye igon kamitek'e kafe ime̱se̱ng'e tà sor Kazhe̱l'e kafe Agwo̱m Ágwo̱m.”

²⁴Ne á nye asidaka ábo̱p afa ka ízip ifa ayi kyo̱ndi Itsi Agwo̱m Ágwo̱m tá fe̱ ye á ra nye.

²⁵To̱, aner akak tuse na aUshalima a tú ku yis ye aSiman, afe a tá se gye̱r nasho̱o̱n Adakunom, ne a nye Adakunom itomong. A se be kutor afe a tana be̱ a tsesek Isarela. Kabik Kazhe̱l'e se mak be wu.

²⁶Kabik Kazhe̱l'e tsang ka ku tonong ye sang wu tá tsang a ku baꞌ, ma a di aKiristi'me, aya Agwo̱m Ágwo̱m tá kasa.

²⁷Kabik'e tú ku ra riye̱, yong a no̱ nubang agbang kutu kuya Adakunom iben, izen iya atek igon'e tá be̱ be igon ba aYeso ame, nong a tú ku nye ike̱ng iya Itsi ba tá fe̱.

²⁸Ayong aSiman tú shan a tú ku kunung, ne a kerek Adakunom ne a fe̱ ye,

²⁹“Agbang Agwo̱m Ágwo̱m, kyo̱ndi wan tá tsang i fe̱, kyo̱o̱rna won asam wan tu tseng caang.

³⁰Kamok mi n di kashesh wan be anyisi mi,

³¹Kaya wan tá nye kanye̱k'e nanyisi ánerawe cei.

³²A ta nye akanang afe a tana tonong áner aya sang a ta nye áner aYahuda baꞌ, katsak, ne a be̱e̱n ánerawe wan Isarela kuyiik.”

³³Atek igon be anyining'e te zhing be ike̱ng iya a tá fe̱ natoon igon'e.

³⁴Ne aSiman ku te ba kuce̱ a tá fe̱ be aMarya anyining igon'e ye, “Adakunom tsang a sak igon na tà sak ánerawe Isarela akak tu ku bun kama, ne a sak ákak ta ya kasho̱o̱n. A tà sor ike̱ng ánerawe tanin fe̱ imaan'e natoon wu,

³⁵nong a se̱ a tà te̱s kuto̱ro̱ng ánerawe whe̱r, ne ike̱ng'e tà ya riye̱ dide̱ng gip.”

³⁶Abining akak a tá nye kuzarap tuse azong gip, riyerek wu nye aHanatu angas aPanuwel irem Ashiru. A tsang a kop dide̱ng, a te aye̱ kanataar be amitek wu

³⁷ne amitek'e ku. A sor akumung ma aye̱ iso̱k ikara be anaas, a kam be agbang kutu kuya Adakunom iben ze̱e̱r baꞌ. A yiir ya Adakunom iben katuk be kunom ne a nye azumi be aduwa.

³⁸A be̱ nufuba nizen iyong, a tá kerek Adakunom, ne a fe̱ rife̱ natoon igon'e nufe áya a tá sor ne á tor á tà di aya a tana sheshek aUshalima.

³⁹Nizen aYusufu be aMarya tá fa gang i nye ike̱re̱ Itsi Adakunom tá shim cei, á tú bun na aGalili á tá be nuwo̱p ba na aNazaret.

⁴⁰Igon'e rasak ne ka kpa agap a tú shining be kukyem ne ritek Adakunom se mak be wu.

⁴¹Koakye riye̱ átek aYeso tseng na aUshalima kamok riye̱ rikan izen aPasova. [6]

⁴²Nizen aYeso tá se aye̱ kuso̱k be afa, atek wu tseng be wu naro̱ riye̱ rikan kyo̱ndi igo̱o̱n ba tá fe̱.

⁴³Nama á tá gang riye̱ rikan'e, átek aYeso'me tá sen kubun kari, aYeso tu fan na aUshalima, ba ren baꞌ.

⁴⁴Á sor ye a se mak be ba, ma á woso kutseng ne á san i ku tse̱r kaye̱e̱r áfe iri be áferime̱ ba.

⁴⁵Á tá fa ku di baꞌ, ne á kubun na aUshalima nong á tá su ku tse̱r.

⁴⁶Nama inom itaar á tú se̱ kaye̱e̱r agbang kutu kuya Adakunom iben nusonong natite áner kubo̱so̱p, ne a ka foos ba ne a ku risim ba.

⁴⁷Koangan afe á tú ku fok, te zhing kamok kuren ike̱ng wu be kuri kushiish wu tá shiish.

⁴⁸Atek wu tá fa ku di ne a te zhing, ne ango̱ wu fe̱ be wu ye, “Igon'i, akye̱ sak wan ti nye yir'e ana e̱? Yir be ada wan i kun daam yir be ku ka tse̱r yir makiyi.”

⁴⁹Ayong a tú ku rip ba ye, “Akye̱ sak yin tsang i ni tse̱r yin e̱? Yin ren yin ye gye̱r ke mi se nasa Ada mi aꞌa?”

⁵⁰Amma ba ren ike̱ng wu tin fe̱ natoon'e baꞌ.

⁵¹Ayong a tseng na aNazaret mak be ba ne a kuus ike̱ng iya ba tá fe̱. Ango̱ wu saas ike̱re̱'me kaye̱e̱r riye̱ wu cei.

⁵²Ayong aYeso ti barang kurasak ne kukyem, ne a kpa kati kaseng nasho̱o̱n ánerawe ne Adakunom.