Read izere aLuka 20 Bible Online

aLuka 20 - izere bible

aLuka 20

¹Katuk kakak nizen aYeso tá sen bo̱so̱p ánerawe'me nubang agbang kutu kuya Adakunom iben, ne a ku taas ba Rife̱ Ritek Adakunom, ágbang átsi be áfe kubo̱so̱p Itsi mak be áko̱k kasho̱o̱n be̱s nufu.

²Á fe̱ be wu ye, “Ni tak yir, be akye̱ kuri kukyem ne wan ti nye ike̱re̱ na e̱? Angan ta no̱o̱k iren nong ta nye ike̱re̱ na e̱?”

³Ayong aYeso fe̱ be ba ye, “Won tà ka rip yin ike̱ng ikak. Ni tak yin,

⁴aBatisma aYohana tá nye, a nye afe Adakunom ka afe anerawe e̱?”

⁵Iyong á nye ibo̱ro̱ng awan ba á tá fe̱ ye, “Ke yir fe̱ yir ye, ‘A nye afe Adakunom,’ a tin rip yir ye ‘Akye̱ sak yir ti no̱o̱k yir katsak ni wu baꞌ e̱?’

⁶Ke yir fe̱ yir ye, ‘A nye afe anerawe,’ ánerawe cice̱r tin barak yir be ata, kamok ba shim ye aYohana nye aner kuzarap Adakunom.”

⁷Iyong á fe̱ be aYeso ye, “Yir ren yir baꞌ.”

⁸Ayong aYeso fe̱ be ba ye, “To̱, mi tà ma ka tak yin ka be akye̱ kuri kukyem ne mi ti nye ike̱re̱ na baꞌ.”

⁹Ayong aYeso ya kasho̱o̱n be kutaas ánerawe kumaas na ye, “Aner akak tuse a tá be riko̱ anap. A no̱o̱k áner ákak aro'me nong a tá be naro̱ kakak, a sor azong dide̱ng.

¹⁰Izen anap'e tá fa te, a tom asam wu akak ye a ra tseng nufe áner wu tú ku no̱o̱k ba aro riko̱'me nong a tà su ku shan kanu kafu. Aner á tú ku no̱o̱k ba aro riko̱'me tsor asam'me, ne á ku ro nong a tú ku bun kari dar ike̱ng ikak.

¹¹Ayong atek riko̱'me bun a tom asam wu akak nufuba. Áner á tú ku no̱o̱k ba aro riko̱'me bun á tsor asam'me dide̱ng. Ne a nye kye̱re̱ be wu ne á ku ro, a tú bun kari dar ike̱ng ikak.

¹²Gip be anong a bun a tom asam afe ataar gbak, ne á bun á tu tsor ma á tu man ne á ku barak nama riko̱'me.

¹³“Atek riko̱'me bun a fe̱ ye, ‘Mi tà nye ane̱ e̱? Mi tà tom igon riye̱ mi, kashim á tu ku fok.’

¹⁴“Amma áfe a ta sok aro riko̱ ame tá fa ku di, ne á fe̱ ye, ‘Ayu ne a nye aya kutse wu, i ku fe̱r yir nong kutse'me ta te kufe yir.’

¹⁵Iyong á tú barak nama riko̱'me nong á tú ku fe̱r. “To̱, akye̱ ne atek riko̱'me tà nye be ba e̱?”

¹⁶“A tà tseng nong a tà se fe̱s áner wu tú ku no̱o̱k ba aro riko̱'me, ne a won riko̱'me nubo̱k áner ákak ze̱e̱r.” Ánerawe'me tá fa fok anong ne á fe̱ ye, “Adakunom ra roon'e!”

¹⁷aYeso ti sak anyisi niba, ne a ku rip ba ye, “To̱, akye̱ ne yin to̱ yin natoon izibir yin tá fa yin ye, “ ‘Kuta kuya áfe rino̱k tá raba, ne kute itsik ribor kutu a?’

¹⁸“Koangan ne a tikpa natoon kuta'ong, a tà te ikpis'e ze̱r ze̱r, amma aner aya kuta'me tikpa natoon wu, ku tú ku me̱re̱sh.”

¹⁹Áfe kubo̱so̱p Itsi be ágbang átsi tse̱r iren, á tana wor á yiir aYeso, kamok ba ren ye a ti nye kumaas'ong natoon ba, á ra fok inyim ánerawe'me.

²⁰Á ta se be kutseng niren, yong á tom ákak be ritse̱ng nong á tà se di ike̱ng aYeso'me tá sen nye'me. Á shim ke aYeso taam nong á tà se̱ á tu ku yiir nong á tu ku sok á tà no̱o̱k rigwo̱m.

²¹Áner á tú ku tom ba ame fe̱ be aYeso ye, “Aner Kubo̱so̱p, yir ren yir ye wan fe̱ ne i bo̱so̱p ánerawe katsak, wan tonong kushim rice baꞌ, ne i bo̱so̱p ánerawe iren Adakunom kaye̱e̱r katsak.

²²Iyong i se gye̱r yir ta karang yir aKaisar itso̱m iben aꞌa?”

²³aYeso tá ren ritse̱ng ba yong a fe̱ be ba ye,

²⁴“Ni tonong yin ica itso̱m'e ta di. Nawu be riyerek angan ne na se natoon'e e̱?”

²⁵Iyong á fe̱ ye, “Nafe aKaisar.” Ne aYeso fe̱ be ba ye, “To̱, no̱o̱k yin aKaisar ike̱ng i ta nye ife aKaisar, ne i no̱o̱k yin Adakunom ike̱ng i ta nye ife Adakunom.”

²⁶Á kyem á se̱ ike̱ng á tana ku yiir mo be rife̱ wu a tá fe̱ azong nasho̱o̱n ánerawe baꞌ, yong á te zhing be rife̱ wu ne á tigbik.

²⁷Áner aYahuda ákak áya a tá se kaye̱e̱r kugung rice aSadusi [17] be̱ nufe aYeso nong á tá fe̱ be wu ye sang kudorok ikom kuse baꞌ. Iyong á be̱ nufu be kurip ye,

²⁸“Aner Kubo̱so̱p, aMusa ti zibir yir'e ye, ke anerawe ku a tá won abining dar inoon, aronyining ra sok akumung'e, nong ase̱ a tu ku tes mo inoon.

²⁹To̱, áner ákak tuse a tá nye aner be áronyining ba kanataar. Afe ime̱se̱ng'e nye kuwe̱ne̱ng, a ku dar kuse̱ igon.

³⁰Aronyining afe afa sok akumung'e, a bun a ku dar ku nise̱ igon gip.

³¹Ne afe ataar bun a sok akumung'e, anong ne a bun a ku gip dar igon. Anong ne áner kanataar'e kus cei dar kuse̱ inoon.

³²Ni igang'e abining'e ku gip.

³³To̱, ayong nizen kudorok ikom, abining'e tà nye afe angan kaye̱e̱r áner kanataar'ong á tá tsang á nye kuwe̱ne̱ng be wu e̱?”

³⁴Ayong aYeso fe̱ be ba ye, “Áner izam na ne á nye iwe̱ne̱ng ne á nyesek inoon ba niwe̱ne̱ng.

³⁵Amma áfe Adakunom ta di ye á kyem kuno̱ naza nizen kudorok ikom, a ta ba nye iwe̱ne̱ng ka a ta no̱o̱k akak nuwe̱ne̱ng baꞌ.

³⁶Á tà ba kus baba baꞌ, kamok ba ma te kyo̱ndi ámaleka. Ba nye inoon Adakunom makong, kamok ba tá dorok nure̱k be kutser.

³⁷Amma kaye̱e̱r rife̱ Adakunom natoon kuro̱ng tá ya kuci, aMusa tonong ye áfe a tá kus tà dorok be kutser, kamok wu yis Adakunom ye, Adakunom afe Ibrahim ne Adakunom Ishaku, ne Adakunom aYakub.

³⁸Iyu tonong ye A nye Adakunom ikom baꞌ, amma Adakunom áfe a ta nye atser.”

³⁹Áner kubo̱so̱p Itsi ákak ti sak ye, “Wan i ren i shim gye̱r, Aner Kubo̱so̱p.”

⁴⁰Nama anong akak ba ra ba kyem á tu rip ike̱ng ikak baꞌ.

⁴¹Ne aYeso ku rip ba ye, “Akye̱ sak á ta fe̱ ye aKiristi nye Igon aDauda e̱?

⁴²aDauda be rice wu gip a fe̱ kaye̱e̱r Kufumung aZabura ye, “ ‘Agwo̱m Ágwo̱m fe̱ be Agwo̱m Ágwo̱m mi ye, “Sonong nubo̱k riya mi,

⁴³Ma mi sak ámudo̱n wan tà ka kpa kaben.” ’

⁴⁴“aDauda tú yis ye, ‘Agwo̱m Ágwo̱m.’ To̱, ne a bun a nye ane̱ a tà nye igon wu e̱?”

⁴⁵Áfe á tá sen foos aYeso'me fok, a tá fe̱ be álimazhiri wu ye,

⁴⁶“Sak yin riye̱ be áner kubo̱so̱p Itsi, á ta shim kutsang tseng be agbang akpiin, ne á shim á tu ku nye ba ashou ninaro̱ rizhik. Ne á kasa naro̱ kusosok natek natu aduwa áner aYahuda ne ninaro̱ nayiik'e naro̱ kunye riye̱ rikan kyo̱ndi ágbang áner.

⁴⁷Á mo̱o̱r ákumung, ne a nye aduwa aso̱p nong ánerawe tà di. Áner kuri ayong, amok ba tà be agap ne a nar.”