Read izere aLuka 22 Bible Online

aLuka 22 - izere bible

aLuka 22

¹To̱, izen kunye riye̱ rikan abiredi aya sang a ta be ayisti baꞌ, aya a ta yis ye aPasova tá be̱ bubarak,

²Áko̱k kasho̱o̱n be ágbang átsi ne áfe kubo̱so̱p Itsi sen tse̱r iren á tana fe̱r aYeso, amma á tu teng ánerawe.

³Iyong Ishetan no̱ kaye̱e̱r riye̱ aYahuza, aya a tú ku yis ye Iskariyot, a tá nye azining kaye̱e̱r álimazhiri kuso̱k be afa.

⁴Ayong aYahuza'me tseng nufe ágbang atsi ne áko̱k kasho̱o̱n áfe a ta fek agbang kutu kuya Adakunom iben nong a tá bo̱ro̱ng be ba natoon iren iya wu tana no̱o̱k aYeso'e

⁵Á nye riye̱ rikan dide̱ng yong á ti sak ye á tu ku no̱o̱k itso̱m.

⁶aYahuza shim, yong a tse̱r iren a tana no̱o̱k aYeso nizen iya ánerawe tana ren baꞌ.

⁷To̱, kunom kunye riye̱ rikan kuya abiredi dar ayisti'me tá fa nye, izen a tana tse̱k itsamang kamok asidaka aPasova'me.

⁸aYeso tom aBitrus be aYohana, ne a fe̱ be ba ye, “Tseng yin ta se nye yin kanye̱k nong tà ya yir aPasova.”

⁹Iyong á rip aYeso ye, “Ake̱ ne wan shim ta se nye yir kanye̱k'e e̱?”

¹⁰aYeso fe̱ be ba ye, “Tseng yin kaye̱e̱r kuwo̱p, yin tà nyim yin be aner akak a tan cer kafeneng ashi. Ku kuus yin nasa kaya a tana ku no̱.

¹¹Fe̱ yin be atekasa'me ye, ‘Aner Kubo̱so̱p fe̱ ye i ra ka rip yir ye kutu átsen se ake̱ e̱? Karo̱ wu tana ku ya naya aPasova be alimazhiri wu.’

¹²A tà ka tonong yin agbang kutu kaza kuya a tan nye gye̱r, azong ne yin tà nye yin kanye̱k'e.”

¹³Á dorok á tá tseng á se se̱ ike̱re̱ kyo̱ndi aYeso ta tsang a ku tak ba. Iyong á nye kanye̱k naya aPasova ame azong.

¹⁴Izen'e tá fa nye, yong aYeso be ámanzo wu ame sosok nong á tá ya naya.

¹⁵Ne aYeso fe̱ be ba ye, “Mi be ifeng kuya naya aPasova na mak be yin nizham mi tà ra so̱ risam.

¹⁶Mi shim ta ka tak yin ye, sang mi tà ba ya naya'me baꞌ, ma ike̱ng aPasova'me tà sor shining kaye̱e̱r rigwo̱m Adakunom.”

¹⁷Nizen aYeso tá sok ashi anap'e, ne a tonong Adakunom riye̱ rikan, ne a fe̱ be ba ye, “Inga, so̱ yin ne i gorok yin'e.

¹⁸Mi shim yin tu ren yin ye, mi tà ba so̱ ashi anap na baꞌ, ma rigwo̱m Adakunom be̱ nizham.”

¹⁹Ne a sok abiredi, a ta tonong Adakunom riye̱ rikan ne a te̱se̱ng a tú ku no̱o̱k ba, ne a fe̱ be ba ye, “Kuro̱m'i na, a ta no̱o̱k kamok yin, yiir nye yin ana nong tà yiring yin be mi.”

²⁰Anong gbak, nama á tá ya abiredi'me, a bun a sok ashi anap, a tá fe̱ ye, “Ashi anap na nye kushu kufas be naso̱k'i, naya mi tana nyosong kamok yin.

²¹Di yin, aya a tanin re̱p'e se aze naro̱ kuya naya na mak be mi.

²²Igon Anerawe tà ku kyo̱ndi Adakunom ta min sak, awo̱ tsek be aner aya a tana ku re̱p.”

²³Iyong álimazhiri'me kpaan i na ka risim ye ka angan kaye̱e̱r ba ne a tà nye anong e̱.

²⁴Á kpaan nanan awan ba ka angan ne a ta sor ayiik'e ne a nar e̱?

²⁵Ayong aYeso fe̱ be ba ye, “Ágwo̱m áner á ta nye áner aYahuda baꞌ, ti nye rigwo̱m na áner ba be agap, ne áko̱k kasho̱o̱n ba ku yis ba ye áfertseng koangan.”

²⁶Sang tu nye yin anong baꞌ. Afe a ta nye ayiik'e kaye̱e̱r yin ra se kyo̱ndi igon kahiir'e. Ne afe a tin nye rigwo̱m na ánerawe ra se kyo̱ndi asam.

²⁷Angan ne a nye a yiik'e e̱? Afe a ta sonong ne a ya, ka afe a ta sonong ne a ku nyesek naya e̱? Ko cie̱k, afe a ta sonong ne a ya baꞌ. Kamok mi se kaye̱e̱r yin nong ta ka nye yin itomong.

²⁸Yin ne i nye yin áner aya i tan tsesek yin mak be mi kaye̱e̱r kubo̱mo̱ng'i.

²⁹Mi tà ka no̱o̱k yin rigwo̱m kyo̱ndi Ada mi tin no̱o̱k.

³⁰Nong ase̱ ta ya ne i so̱ yin mak be mi kaye̱e̱r rigwo̱m'i, tá sosok yin ni ítsik rigwo̱m ne i to̱ yin nazu Isarela kuso̱k be afa amok.

³¹aYeso fe̱ ye, “aSiman, aSiman, Ishetan n se̱ iren nong a ta ka bo̱mo̱ng yin cei, kyo̱ndi a ta tas alikama.

³²Amma mi ma ka nye aduwa, fan wan bu won kuno̱o̱k katsak wan. Nizen iya wan tu bun nunaan ne i tsesek áfudang wan.”

³³aSiman fe̱ ye, “Atekasa, mi n nye kanye̱k ta tseng nitso̱m mak be wan ke i tá ku, ne i ku mak be wan.”

³⁴Ayong aYeso fe̱ be wu ye, “Won ta ka tak, aBitrus, nizham atso̱n tà ra te̱p katuur, wan tà ton'e kutak kutaar ye sang wan ti ren baꞌ.”

³⁵Ayong aYeso fe̱ be ba ye, “Izen iya mi tá ka tom yin dar itso̱m dar ishika ne akpatak, yin dun yin ike̱ng ikak a?” Iyong álimazhiri'me fe̱ ye, “Wayo, i dun yir ike̱ng ikak baꞌ.”

³⁶Ayong a fe̱ be ba ye, “Amma kyo̱o̱rna ke yin be yin itso̱m kaye̱e̱r ishika ne i sok yin ke yin be yin ishika ne i sok yin gip. Aner aya ne a be awe̱n itsor baꞌ, a ra re̱p kukpiin wu nong a tin shan.

³⁷I se ni izibir kaye̱e̱r Kufumung rife̱ Adakunom ye, ‘A tu ku fa mak be áfe rine̱n.’ Mi ta ka tak yin ye iyu tin shining natoon'i dim. Ei, ike̱re̱ a tá zibir natoon'i m be̱ barak i ta shining.”

³⁸Iyong álimazhiri wu fe̱ be wu ye, “Atekasa, áwe̱n ítsor ifa na.” Ayong aYeso fe̱ ye, “Iyong kyem.”

³⁹aYeso wuruk a tá be nawhanang nafar kyo̱ndi a tá n me̱, ne a nye, ne álimazhiri wu ku kuus.

⁴⁰Nizen á tá tseng naro̱'me, ne aYeso fe̱ be ba ye, “Nye yin aduwa fan i bu kpas yin kaye̱e̱r kubo̱mo̱ng.”

⁴¹Ayong aYeso naka ko̱ro̱k, a tú ku won ba azong, a ta se tigbok akuur, a tá nye aduwa ye,

⁴²“Ada, ke wan shim ne i ni sok risam na, amma sang i tu nye kushim'i baꞌ, ike̱ng iya wan ta shim.”

⁴³Ayong amaleka ne naza nong a tú ku tsesek.

⁴⁴A tá se kaye̱e̱r kudaam dide̱ng, yong a ti barang kunye aduwa. Kutsin wuruk kyo̱ndi naso̱k ku tá teng ne ku kpas kaben.

⁴⁵Nizen iya a tá dorok na aduwa'me, a tú ku bun nufe álimazhiri wu, a su ku se̱ ba nida kamok riye̱ riwe.

⁴⁶Ayong aYeso tú rip ba ye, “Akye̱ sak yin se yin be ida e̱? Dorok yin ta nye yin aduwa fan i bu kpas yin nubo̱mo̱ng.”

⁴⁷Kum ne aYeso ru fe̱ kanu rigwo̱m ánerawe be̱, ne aner a tú ku yis ye aYahuza, a tá nye azining kaye̱e̱r álimazhiri kuso̱k be afa ame tú ko̱k ba kuse̱. A nyeseng bubarak be aYeso nong a tú ku kunung.

⁴⁸aYeso fe̱ be wu ye, “aYahuza, be kukunung ne wan tin no̱o̱k Igon Anerawe a?”

⁴⁹Nizen áfe a tá se mak be aYeso'me tá fa di anong, ne á fe̱ ye, “Agwo̱m Ágwo̱m, i ninye yir itomong be ítsor yir ame a?”

⁵⁰Ne azining kaye̱e̱r álimazhiri'me wor a te̱me̱ng kuto asam agbang atsi akak kufe kubo̱k riya ma a te̱n.

⁵¹Amma aYeso fe̱ be wu ye, “I kyem anong.” Ne aYeso ni sak kubo̱k nuto aner ame, ne a sak ku ta te kutser.

⁵²Ayong aYeso fe̱ be ágbang átsi'me ne áritek áfe kufek kutu kuya Adakunom iben ne áko̱k kasho̱o̱n á tan be̱ nong a tu ku yiir ye, “Mi nye akpatang, yin tá be̱ yin be ishe̱n ne áwe̱n itsor a?

⁵³Mi se be yin ye̱r ye̱r kaye̱e̱r agbang kutu kuya Adakunom iben, yin ti sak yin kubo̱k natoon'i baꞌ, amma izen ife yin na, izen amaan aner tin nye rigwo̱m nawhi.”

⁵⁴Iyong á yiir aYeso'me, á tá tseng'e nasa agbang atsi. aBitrus tsang a ku kuus ba gugo̱k.

⁵⁵Á tá fa kas kuro̱ng kaye̱e̱r kari'me nong á tá gorok ni fok'e. aBitrus be̱ a ta sonong mak be ba.

⁵⁶Kanamang kakak ka ta nye itomong azong tá fa ku di nusonong na akanang kuro̱ng'e, yong ka ti sak anyisi ni wu ka ta fe̱ ye, “Aner na se mak be aYeso.”

⁵⁷Amma aBitrus ton'e, a tá fe̱ ye, “Ago, ka mi tu ren baꞌ.”

⁵⁸A fa sor cie̱k ne aner akak ze̱r bun a ku di, ne a fe̱ ye, “Wan gip wan nye akak kaye̱e̱r ba.” Ayong aBitrus fe̱ ye, “Agya, mi nye akak ba baꞌ.”

⁵⁹Nama awa azining aner akak bun a yiir'e kar kar ye, “Katsak'e, aner na se mak be wu, kamok a nye aner aGalili.”

⁶⁰Ne aBitrus bun a fe̱ ye, “Agya, mi ren ike̱ng wan tin fe̱ natoon'e baꞌ.” Kum ne a ru fe̱ kanu, ne atso̱n wor a te̱p.

⁶¹Ayong aYeso kirik a tá ye̱re̱k aBitrus, ne aBitrus yiring rife̱ riya aYeso tá fe̱ be wu ame, a tá fe̱ ye, “Nizham atso̱n tà a ra te̱p katuur, wan tin ton kutak kutaar.”

⁶²Ayong a wuruk nufang a ta se tos dide̱ng.

⁶³Iyong áfe a tá se be kutor aYeso kpaan i ku kok ko'me, ne á ku whereng.

⁶⁴Á tú whe̱e̱n anyisi ne á fe̱ be wu ye, “Ko̱ tak, angan ne a tá rus e̱?”

⁶⁵Ne á fe̱ be wu kye̱re̱.

⁶⁶Kadiding tá fa karak, ne áko̱k kasho̱o̱n ne ágbang átsi be áfe kubo̱so̱p Itsi cice̱r nyim nong á tá tseng be aYeso nasho̱o̱n ba.

⁶⁷Ne á rip aYeso ye, “Ni tak yir ka wan ne i nye aKiristi ame e̱?” Ayong aYeso fe̱ be ba ye, “Ke mi ta tak yin, yin tin no̱o̱k yin katsak baꞌ.

⁶⁸Ke mi ta nye yin kurip, yin sen ni shim yin'e baꞌ.

⁶⁹Kyo̱o̱rna, Igon Anerawe tà sonong nubo̱k riya Adakunom afe kukyem.”

⁷⁰Iyong cice̱r ba rip aYeso ye, “To̱, yong wan di ye wan nye Igon Adakunom a?” Ne aYeso fe̱ be ba ye, “I se anong kyo̱ndi yin ta fe̱ yin.”

⁷¹Iyong ba fe̱ ye, “To̱, yir bun i tse̱r yir akye̱ nufu e̱? Yir fok yir ike̱ng iya wu tá fe̱.”