Read izere aLuka 24 Bible Online

aLuka 24 - izere bible

aLuka 24

¹Bop nadiding katuk ime̱se̱ng'e na asate, ányining ame sok ike̱re̱ iko̱o̱n itek ame nong á tá tseng nure̱k'e.

²Á se se̱ an biring kuta ku ta se nanu kure̱k'e.

³Izen iya ba tá no̱, á se̱ kukom Agwo̱m Ágwo̱m yir aYeso baꞌ.

⁴Kum ne ba ru to̱ natoon'e, ne áner ákak ba afa be ares akan á tá gye̱se̱m ti wuruk nukim ba.

⁵Ányining'e te cing be ace kaben kamok inyim, ne áner ame fe̱ be ba ye, “Akye̱ sak yin tse̱r yin aner atser kaye̱e̱r áfe a tan kus e̱?

⁶A kuse baꞌ, an dorok. Yiring yin ike̱ng iya a tá ka tak yin, nizen a tá rusek be yin na aGalili.

⁷A tá fe̱ ye, ‘Ma a ta sok Igon Anerawe a ta no̱o̱k nubo̱k áfe rine̱n, a tu ku tigak, ne a bun a dorok nure̱k katuk ife ataar.’ ”

⁸Iyong ányining ame yiring'e be rife̱ aYeso tú ku tak ba.

⁹Nizen á tá ne nure̱k'e á be̱, á taas álimazhiri kuso̱k be azining be ribir ánerawe ike̱re̱'me cei.

¹⁰Ányining á tá tak ámanzo ike̱re̱'me nye aMarya abafe aMagadaliya be aZhuwana ne aMarya anyining aYakub be ákak á tá se mak be ba.

¹¹Ka á ti no̱o̱k katsak rife̱ ányining'e baꞌ, kamok rife̱'me tú sor ba kyo̱ndi iwhas.

¹²aBitrus dorok be itsi, a tá be nure̱k'e. A tá fa tiguum ne a di awan ares a tú ku kunung mo, yong a tú bun ne a tsang a to̱ ka akye̱ ne i nye e̱?

¹³Kunom kuyong'e áner afa kaye̱e̱r áya a tá kuus aYeso tseng á be nabuwo̱p kukak á ta yis ye Imawus. Atsik'e be aUshalima ta se kyo̱ndi akilomita kuso̱k be azining.

¹⁴Á sen tsang á fe̱ natoon ike̱re̱ i ta nye cei.

¹⁵Nizen ba tá sen tsang á fe̱ itak'e ne aYeso be rice wu be̱ a tú se̱ ba nong a tá tseng mak be ba.

¹⁶Amma a sak ba tú ren baba baꞌ.

¹⁷Ayong aYeso tú rip ba ye, “Akye̱ ne yin sen tsang i fe̱ yin ne i tseng yin e̱?” Iyong á nyeseng kyo̱o̱n á tá tsibik ányisi ba.

¹⁸Azining kaye̱e̱r ba riyerek wu ta nye aKiliyopas tú rip ye, “Wan ne i nye aner atsen na aUshalima tsek, i ta dun ike̱ng i tá nye azong kaye̱e̱r inom na a?”

¹⁹Ayong a tu rip ba ye, “Akye̱ kuri ike̱re̱ e̱?” Ne á fe̱ be wu ye, “Natoon aYeso aner aNazaret. A nye aner kuzarap Adakunom. A be kukyem ku ninye ike̱re̱ ne kufe̱ kanu nasho̱o̱n Adakunom ne ánerawe cice̱r.

²⁰Ágbang átsi be ágwo̱m yir tú sok á tá no̱o̱k nong ase̱ á tú ku te̱n amok riku, ne á ku tigak.

²¹Amma yir tsang i ni te yir riye̱ yir ye, wu ne a nye afe a tana shesh áner Isarela. To̱, di kunom kufe ataar be kunye ike̱re̱ na.

²²Gip be anong ányining ákak ba afa á tá se mak be yir bun á ti no̱o̱k yir azhing. Á ne nure̱k'e bop nadiding na,

²³á se se̱ kukom'e baꞌ. Á be̱ á ti tak yir ye ba di ámaleka afa á tá fe̱ be ba ye a nye atser.

²⁴Áfudang yir ákak tseng nure̱k'e, á se di'me kyo̱ndi ányining'e tá fe̱, amma á tú ku di baꞌ.”

²⁵Ne aYeso fe̱ be ba ye, “Yin áfunam ákak, akye̱ kuri aye̱ ne yin be yin i ta won dar i ni no̱o̱k yin katsak nike̱re̱ áner kuzarap Adakunom tá fe̱ e̱?

²⁶Aser, sang ma aKiristi so̱ risam ike̱re̱ na cice̱r, a ta ra se̱ kuyiik wu aꞌa?”

²⁷A san i ku taas ba ike̱re̱ i ta se kaye̱e̱r Afumung rife̱ Adakunom cei natoon rice wu, kum nizen aMusa ma nizen áfe kuzarap'e cei.

²⁸Á tá fa be̱ bubarak be kaban kuwo̱p kaya ba tu ku be, ne aYeso nye kyo̱ndi wu tà wesek nasho̱o̱n.

²⁹Á tú nye akusuk, ne á fe̱ be wu ye, “Kusuk, ko̱so̱ be yir kamok kunom n be̱ bubarak ku ta kpa.” Ayong a tseng mak be ba.

³⁰Nizen aYeso tá se be iya naya mak be ba, a sok abiredi, a tá tonong Adakunom riye̱ rikan, ne a te̱se̱ng ne a san ku nyesek ba.

³¹Iyong ányisi ba ma karak, á tu ren, ne á ni ti zhau niba.

³²Á naka risim ye, “Nizen iya a tá se be kufe̱ kanu be yir niren, ne a karak Áfumung rife̱ Adakunom, ma aye̱ yir shirim caang aꞌa?”

³³Áner afa'me wor á dorok gbashak nong á tá be na aUshalima. Azong ne á se se̱ ámanzo kuso̱k be azining ame be áfe a ta se be ba naka tusung.

³⁴Á sen fe̱ be ba ye, “I nye katsak! Agwo̱m Ágwo̱m n dorok ma an tonong rice wu nufe aSiman.”

³⁵Ne áner afa ame ku tak ba ike̱ng i tu ku se̱ ba niren, be kuri iren iya ba tá kyem á ren ye a nye aYeso nizen a tá te̱se̱ng abiredi.

³⁶Kum ne á ru fe̱ itak'e ne aYeso be rice wu wor a ti wuruk natite ba. A tá fe̱ be ba ye, “Kameneng riye̱ se mak be yin!”

³⁷Iyong á te febek be inyim, á sor ye ike̱ng iya ba ta di nye itseng.

³⁸Ayong aYeso fe̱ be ba ye, “Akye̱ sak yin daam yin e̱? Yin ti be yin agak riye̱ e̱?

³⁹Di yin ibo̱k'i be atak'i. Mi na be rice mi! Ni ra yin ta fok yin, itseng be kuro̱m be ikup kyo̱ndi yin ta di yin mi ta be baꞌ.”

⁴⁰A tá fa fe̱ anong, ne a ku tonong ba ibo̱k be atak wu.

⁴¹Gip be anong á ti no̱o̱k katsak baꞌ, kamok riye̱ rikan be azhing. Ayong a tú rip ba ye, “Yin be yin ike̱ng kuya aze aꞌa?”

⁴²Iyong á tú no̱o̱k izos a tan reer.

⁴³Ayong aYeso shan a tá ya, ne ba ye̱re̱k.

⁴⁴Ne a fe̱ be ba ye, “Ike̱ng mi ta ka tak yin'ong, kum ne mi rusek be yin, ye ma a shining koakye i ta se ni izibir natoon'i kaye̱e̱r Itsi aMusa tá zibir be afumung áner kuzarap Adakunom ne aZabura.”

⁴⁵Ayong a tú sak ba á ta ren ike̱ng afumung'e ta fe̱.

⁴⁶Ne a bun a fe̱ be ba ye, “Ike̱ng i ta se ni izibir na ye. aKiristi'me tà so̱ risam, a tà ku, ne a dorok nure̱k katuk afe ataar.

⁴⁷A ta taas ánerawe ninaro̱ ze̱r ze̱r itak natoon kushishing kuse be kure̱ng rine̱n kaye̱e̱r riyerek wu, A ta san'e na aUshalima.

⁴⁸Yin ne i di yin ike̱re̱ na, yin ne i ta tas yin ákak.

⁴⁹Mi tà ka tom yin ike̱ng Ada mi tá tsang a ni sak ye a tà ka no̱o̱k yin, amma sor yin kaye̱e̱r kuwo̱p na, ma a tà kis yin be kukyem kuya ku ta ne naza.”

⁵⁰Ayong aYeso tú ko̱k ba kasho̱o̱n nong á tá wuruk niren bubarak be aBetani, ne a sok ibo̱k naza a tú ku te ba kuce̱.

⁵¹Kum ne an gang ku ka te ba kuce̱'me baꞌ, nong a ta kam be ba. A tú sok a tá tseng'e kaye̱e̱r kaza.

⁵²Iyong á tu ya iben, ne á ku bun na aUshalima be riye̱ rikan dide̱ng.

⁵³Álimazhiri'me yiir sor kaye̱e̱r agbang kutu kuya Adakunom iben'e koakye izen, ne á kerek Adakunom.