Read izere aLuka 6 Bible Online

aLuka 6 - izere bible

aLuka 6

¹Katuk Asabar akak aYeso ku sen gor kaye̱e̱r riko̱ alikama, ne álimazhiri wu kpaan bo̱s ace alikama'me, ne á tirip be ibo̱k nong á tá ya ica'me.

²Ayong áner aFarisi ákak tú ku rip ye, “Akye̱ sak yin nye yin ike̱ng iya Itsi ta roon kunye'me katuk Asabar e̱?”

³Ayong aYeso fe̱ be ba ye, “Yiring yin ike̱ng iya aDauda tá nye nizen wu be ánerawe wu tá fok izong.

⁴A tá no̱ naro̱ a tú ku ya Adakunom iben, a tá sok abiredi azhe̱l'e, aya ta se gye̱r ke ba ya baꞌ, ma ke átsi tsek. A tá no̱o̱k áfudang kutseng wu gip.”

⁵Ne aYeso fe̱ be ba ye, “Igon Anerawe ne a ti nye rigwo̱m natoon Asabar.”

⁶Katuk Asabar akak gbak aYeso no̱ kaye̱e̱r kutu aduwa a ta se be kubo̱so̱p ánerawe'me. Aner akak tuse azong aya kubo̱k riya wu tá we̱.

⁷Áner aFarisi be áfe kubo̱so̱p Itsi se be kutse̱r iren a tana se̱ aYeso be rine̱n. Iyong á ti sak anyisi ni wu nong á tá di ka a tà sak akak ta te atser katuk Asabar'e.

⁸aYeso ren ike̱ng ba ta sen to̱'me yong a fe̱ be aner kubo̱k'e tá we̱ ame ye, “Dorok ta nyeseng nasho̱o̱n ánerawe.” Ayong aner ame dorok a tá nyeseng.

⁹aYeso fe̱ be ba ye, “Won mi ta ka rip yin. Akye̱ ne Itsi Adakunom fe̱ natoon Kunom Asabar e̱? I se gye̱r a ta nye ike̱ng itek ka a ta nye ike̱ng imaan'e e̱? I se gye̱r a ta shesh kutser ka a ta fe̱r e̱?”

¹⁰A kirik a tú ku ye̱re̱k ba cei, ne a fe̱ be aner ame ye, “Nabak kubo̱k wan.” A nabak kubo̱k'e, ne kubo̱k'e te kutser gye̱r.

¹¹Aye̱ ba beseng dide̱ng yong a kpaan ibo̱ro̱ng awan ba natoon ike̱ng iya a tana nye be aYeso.

¹²Katuk kakak, kaye̱e̱r inom iyong aYeso ngarak natoon kawhanang nong a tá nye aduwa. A ko̱so̱ i nye aduwa'me.

¹³Kadiding tá fa karak, ne a yis álimazhiri wu, a kasa kuso̱k be afa kaye̱e̱r ba nong á tá te ámanzo. A ye̱re̱k ba na:

¹⁴aSiman aya a tin te riyerek ye aBitrus, be aronyining wu Adarawus, ne aYakub be aYohana, ne aFilibus, be aBatalomi.

¹⁵Be aMatiyu, ne aToma, be aYakub igon aZabedi, ne aSiman aya a tú ku yis ye aner a tá be rifup kaben wu.

¹⁶Be aYahuda igon aYakub, ne aYahuza Iskariyot, aya a tá sok aYeso a tá no̱o̱k.

¹⁷aYeso tiik be ámanzo ame naro̱ ka ta se ne̱k. Rigwo̱m ánerawe tuse azong áya a tá nye alimazhiri wu, ne ánerawe aya a nes niben aYahuda be aUshalima ne áfe iben aTaya be aSidon.

¹⁸Á be̱s nong á tú ku foos, ne a ka sak ba nong á tà te atser. aYeso turung amaan nabik kaye̱e̱r áya a tá be.

¹⁹Koangan shim a tú ku ra kamok kukyem wuruk kaye̱e̱r wu, ne a ku sak ba nong á tá te atser cei.

²⁰Ayong aYeso kirik a tá ye̱re̱k álimazhiri wu ne a fe̱ ye, “Áner riye̱ rikan ne á nye yin áfe rizor kamok rigwo̱m Adakunom nye rife̱ yin.

²¹Áner riye̱ rikan ne á nye yin áfe izong ta ka ro̱ yin kyo̱o̱rna, kamok yin tà whas yin. Áner riye̱ rikan ne á nye yin i ta tos yin kyo̱o̱rna, kamok yin tà mas yin.

²²Áner riye̱ rikan ne á nye yin ánerawe tá ka di yin kye̱re̱, ne á kam be yin ne á ka kas yin, ne á ka ranyin kyo̱ndi ike̱ng imaan'e, kamok Igon Anerawe.

²³“Nye yin riye̱ rikan katuk'ong ne i to yin nato riye̱ rikan, kamok agbang ishorong yin se naza. Anong ne áda ba nye be áner kuzarap.

²⁴“Awo̱ be yin áfe i ta nye yin árum, kamok yin n se̱ yin ike̱ng i tana ka shirim yin aye̱.

²⁵Awo̱ be yin áfe i ta whas yin kyo̱o̱rna, kamok izong tà ka ro̱ yin. Awo̱ be yin áfe i ta mas yin kyo̱o̱rna, kamok yin tà nye yin riye̱ riwe ne i tos yin.

²⁶Awo̱ be yin áfe koangan tin fe̱ Rife̱ Ritek natoon yin, kamok anong ne áda ba nye be áner kuzarap afe abo̱o̱s.

²⁷“Kyo̱o̱rna, mi fe̱ be yin ye, yin áfe i tin foos yin ye i ra shim yin ámudo̱n yin ne i tonong yin áfe a ta ka ranyin yin ritek.

²⁸Fe̱ yin itek natoon áya a ta ka kas yin, ne i nye yin áfe a ta ka nyeen yin aduwa.

²⁹Ke aner akak ta rus nufok kukak, ne i ku kirik kufe afa'me gip, ke akak ti shan ike̱ng ku naka kis wan, tu ku roon kukpiin wan baꞌ.

³⁰Koangan ne a ta rip ike̱ng ikak, ku no̱o̱k. Ke aner akak sok ike̱ng iya i tá nye ifuan, tu fe̱ ye a ra bun a ka no̱o̱k baꞌ.

³¹Nye yin ánerawe ike̱ng iya yin ta shim yin ba ta ka nye yin'e.

³²“Ke yin shim yin awan áfe a ta ka shim yin tsek, ishorong akye̱ ne yin ta se̱ yin nufe Adakunom e̱? Ko áfe rine̱n gip á shim áfe a ta ka shim ba.

³³Ke yin nye yin áfe a ta ka nye yin kunye kutek tsek, akye̱ ne yin nye yin'ong e̱? Ko áfe rine̱n nye anong gip.

³⁴Ke yin nyesek yin áfe yin ta ka shim yin ba iko̱p, ne á bun á ka karang ko yin, akye̱ ne yin nye yin'ong e̱? Áfe rine̱n naka nyesek iko̱p gip, ne á shim á ta ka karang ko ba'me cei.

³⁵Shim yin ámudo̱n yin ingya, ku tonong yin ba ritek. Ku nyesek yin ba iko̱p dar ku ni te riye̱ ye á tà ka karang yin, nong ishorong yin tà se whe̱r, ne i te yin inoon Ada Adakunom ayiik'e, kamok wu se gye̱r be áfe a ta won dar á tonong riye̱ rikan ba, ne áya a ta nye imaan'e.

³⁶Be yin kuro̱ riye̱ kyo̱ndi Ada yin ta be kuro̱ riye̱.

³⁷“Sang tu to̱ yin akak amok baꞌ, fan a ba ka to̱ yin'e. Sang tu te̱n yin akak amok baꞌ, fan a ba ka te̱n yin'e. Re̱ng yin ákak rine̱n ba, nong a tà ma ka re̱ng yin rife̱ yin.

³⁸No̱o̱k yin nong yin gip a tà ma ka no̱o̱k yin whe̱re̱, kumaas kutek a ta ye̱se̱p ne a ze̱e̱r ma i nyos ne a ka ko̱ro̱k'e nibo̱k. Kuri kures kufe yin tin maas yin akak'e, kuri kuyong ne a tà ma ka maas ko yin'e.”

³⁹A bun a tú tak ba kumaas na ye, “Akpato̱o̱n ta kyem a ko̱k afudang ishe̱n a? Ke á nye anong, á tà kpas ba cice̱r kaye̱e̱r ribong aꞌa?

⁴⁰Aner a ta sen bo̱so̱p ike̱ng kun nar aner a tu ku bo̱so̱p'e baꞌ, amma koangan a tú ku bo̱so̱p'e gye̱r tà te kyo̱ndi aner a tú ku bo̱so̱p'e.

⁴¹“Akye̱ sak wan ye̱re̱k ikuko̱ i ta se rinyisi afudang wan ne i won agbirik rinyisi rifuan e̱?

⁴²Akye̱ sak wan tá fe̱ be afudang wan ye, ‘Won mi ta ka tun ikuko̱ rinyisi,’ nong wan be rice wan tà kyem i di kugbirik kuya ku ta se rinyisi wan baꞌ e̱? Wan, akardak aner, san ku tun ike̱ng i ta se rinyisi wan nizham ta ra kyem i di gye̱r ne i tun iya i ta se rinyisi afudang wan.

⁴³“Kakon katek tes kutes kumaan'e baꞌ, ka kakon kamaan'e tes kutes kutek baꞌ.

⁴⁴A ren koakye kakon be kutes wu. A se̱ kutes atafo ritin ikiritsan baꞌ, ka a se̱ kutes kakon katek na amaan ritin kakon baꞌ.

⁴⁵Aner atek fe̱ Rife̱ Ritek kamok kuto̱ro̱ng wu nye kutek, amma amaan aner fe̱ amaan rife̱ kamok kuto̱ro̱ng wu tá nye kumaan'e. Kamok ike̱ng iya i ta se kaye̱e̱r riye̱ ne i wuruk nanu.”

⁴⁶“Akye̱ sak yin ti yis yin ye, ‘Agwo̱m, Agwo̱m,’ ka i ra nye yin ike̱ng iya mi tá fe̱ baꞌ e̱?

⁴⁷Mi tà ka tonong yin kuri kuse aya afe a ta be̱ nunaan, ne a fok rife̱ mi, ne a ninye itomong.

⁴⁸A se kyo̱ndi aner aya a ta se be rino̱k. A rum karo̱ tsik nong a tin barak ribor'e natoon agudong. Ashi tá fa ta ne a carak kasa'me, a kyem a zuur baꞌ, kamok ribor'e ta se gye̱r.

⁴⁹Aner aya a ta fok rife̱ mi, sang a tin nye itomong baꞌ, a se kyo̱ndi aner aya a ta no̱k kasa dar ribor ritek, izen iya ashi ta, ne a carak kasa'me, ne kasa'me tà wor ka kpa ne ka yirik cei.”