Read izere aLuka 7 Bible Online

aLuka 7 - izere bible

aLuka 7

¹aYeso tá fa gang kufe̱ ike̱re̱'ong cei ne ánerawe foos, ne a be na aKapanum.

²Aritek ásozha akak tuse azong, afe asam wu tá nye atser baꞌ, an te kyo̱ndi a tá ku. Asam'me se yiik dide̱ng nufe atekasa wu.

³Aritek ásozha'me fok itak aYeso yong a tom áko̱k kasho̱o̱n áner aYahuda nufu nong á tá su ku nye izong ye a ra be̱ sak asam wu tá te atser.

⁴Á tá fa be̱ nufe aYeso, ne á ku nye akusuk ye, “I ta se gye̱r ke wan be̱ sak asam aner na ta te atser,

⁵kamok a shim áner yir, ma a min no̱k yir kutu aduwa.”

⁶Ayong aYeso tseng be ba. A se gugo̱k be kasa'me baꞌ, ne aritek ásozha'me tom áferime̱ wu nufe aYeso ye á ra se fe̱ be wu ye, “Atekasa, sang tu daam baꞌ, mi kyem ke wan be̱ nasa mi baꞌ.

⁷Ike̱ng i tá sak mi tá kyem i be̱ nufuan'ong baꞌ, fe̱re̱ng tsek asam'i tà te atser.

⁸Kamok mi gip, akak ti nye rigwo̱m ni mi ne mi min i nye rigwo̱m na ákak. Ke mi fe̱ be ayu ye, a ra tseng, ne a tseng, ne i fe̱ be akak ye, a ra be̱, ne a be̱. Ke mi fe̱ be asam mi ye, a ra nye iyu, ne a nye.”

⁹aYeso tá fa fok anong ne a te zhing, ne a kirik a tá fe̱ be rigwo̱m ánerawe a tú ku kuus ame ye, “Mi ta ka tak yin, mi kun di aner akak kaye̱e̱r áner Isarela afe a ta be kuno̱o̱k katsak be agap kyo̱ndi aner na baꞌ.”

¹⁰Áner a tá tsang á ku tom ba ame tu ku bun kari'me, ne á se se̱ asam'me n te atser.

¹¹Nama anong, aYeso be nuwo̱p kukak a tá yis ye aNayin ne álimazhiri wu be rigwo̱m ánerawe tseng mak be wu.

¹²A tá fa be̱ bubarak be kanu kuwo̱p'e, ne a nyim á sen wuruk be kukom acam akak, afe a ta se ze̱r na anyining wu. Anyining'e nye akumung. Ánerawe whe̱r á tá se nuwo̱p'e se mak be wu.

¹³Nizen aYeso tá fa ku di, ne a ro̱ riye̱ wu, yong a fe̱ be wu ye, “Sang tu tos baꞌ.”

¹⁴aYeso tseng bubarak nong a tá se ra akpate kukom ame, ne áfe a tá sok kukom'e nyeseng, ne a fe̱ ye, “Acam, dorok!”

¹⁵Ne acam a tá tsang a ku ame dorok a tá kpaan kufe̱ kanu, ne aYeso no̱o̱k anyining'e.

¹⁶Cice̱r ba inyim tú ro̱, yong á kerek Adakunom ye, “Aner kuzarap agbang'e m be̱ kaye̱e̱r yir,” ne á fe̱ ye, “Adakunom m be̱ nong a ta tobok ánerawe wu.”

¹⁷Itak'e tseng koake̱ niben aYahuda be iwo̱p ikak i ta se bubarak.

¹⁸Nizen iya álimazhiri aYohana tú ku taas ike̱re̱'me cei, yong a yis áner afa kaye̱e̱r ba

¹⁹nong a tú ku tom ba nufe aYeso ye, á ra su ku rip ye, “Wan ne a nye aya a tà fe̱ ye a tà be̱ ame ka ba ra tor akak ze̱e̱r e̱?”

²⁰Áner ame tá fa be̱ nufe aYeso, ne á fe̱ be wu ye, “aYohana aner abatisma min tom yir nufuan ye i ra be̱ ta ka rip yir ye, ‘Wan ne a nye aya a ta fe̱ ye a ta be̱ ame ka ba ra tor akak ze̱e̱r e̱?’ ”

²¹Nizen iyong aYeso sak áfe a tá nye atser baꞌ, be áfe iriri iro̱k whe̱re̱ tá te atser, ne a turung amaan nabik, ne a sak ákpato̱o̱n whe̱r tá di karo̱.

²²Ne a fe̱ be áner a tú ku tom ba ame ye, “Ku bun yin, ta su ku tak yin aYohana ike̱re̱ yin tá di yin ne i foos yin, akpato̱o̱n se̱ kudi karo̱, ne ákun tseng gye̱r, ákparo̱ng te atser, ágbato fok kuto, ikom dorok be kutser, ne a taas áfe rizor Rife̱ Ritek.

²³Aner riye̱ rikan ne a nye aner aya a tin be agak riye̱ natoon mi baꞌ.”

²⁴Nama átom aYohana ame tú ku bun, aYeso san kutaas ánerawe'me itak natoon aYohana ye, “Akye̱ ne yin se di yin katse e̱? Aner aya a ta se kyo̱ndi agam kuwun ta zim a?

²⁵Sang ke anong baꞌ, yin se di yin akye̱ e̱? Aner a tá te ares atek a? Wayo, áfe a tá tes ares itso̱m ne á fok kusas kusor sor nazuri rigwo̱m.

²⁶To̱, akye̱ ne yin se di yin e̱? Aner kuzarap a? Ei, mi ta tak yin a nar aner kuzarap.

²⁷Ayu ne a nye aya a tá zibir itak natoon wu ye, “ ‘Di, mi tà tom atom'i nasho̱o̱n wu aya a tana ka nye iren.’

²⁸“Mi ta ka tak yin, kaye̱e̱r kutes ányining, akak kuse a tá nar aYohana baꞌ, gip be anong, aya a ta nye igang'e kaye̱e̱r rigwo̱m Adakunom tu nar yiik.”

²⁹Cice̱r ánerawe'me be áfe ku shashang itso̱m iben gip tá fa fok rife̱ aYeso, ne á fe̱ ye iren Adakunom nye katsak kamok aYohana tsang á ku nye ba abatisma.

³⁰Áner aFarisi be áfe a tá ren Itsi dide̱ng raba kanye̱k Adakunom natoon ba, kamok sang aYohana tsang a ku nye ba abatisma baꞌ.

³¹“Be akye̱ ne mi tin maas ánerawe izam iyu e̱? Á se kyo̱ndi akye̱ e̱?

³²Á se kyo̱ndi inoon na tá yo̱ro̱k naro̱ rizhik, ne á fe̱ be áfudang ba ye, “ ‘Yir ta te̱p yin asharuwa, Yin to yin baꞌ, yir bom yir abom riyo̱m Yin tos yin baꞌ.’

³³“aYohana aner abatisma be̱ a yas ka a so̱ ashi anap baꞌ, yin fe̱ yin ye, ‘A be itseng.’

³⁴Igon Anerawe be̱, a ya ne a so̱, yong yin fe̱ yin ye, ‘A mak a yas, ne a nye rime̱ be áfe kushashang itso̱m iben ne “áfe rine̱n.” ’

³⁵A ren kukyem be ike̱ng iya ku ta nye.”

³⁶Aner aFarisi akak fe̱ be aYeso ye, á ra se ya naya kari wu, yong á tseng nasa aner'e nong a ta se yas.

³⁷Abining akak a tá sor kusor wu kaye̱e̱r rine̱n kaye̱e̱r kuwo̱p'e tá fa fok ye, aYeso sen yas nasa aner aFarisi'me, yong a be̱ be name iko̱o̱n itek nudu, a tá nye be ike̱ng ikak a ta yis ye alabasta.

³⁸A tá te cing na atak aYeso a tá tos, ne nanyisi wu ni kpas natak aYeso, ne a re̱ng nanyisi'me be nakuyo̱ng wu, a kunung atak aYeso'me nong a tin kon name iko̱o̱n itek ame.

³⁹Aner aFarisi afe a tá fe̱ ye a ra be̱ kari wu ame tá fa di anong, ne a to̱ riye̱ wu ye, “Ke a fa fe̱ ye aner na nye aner kuzarap Adakunom ke a ren aner a tú ku ras, ne a ren kuri kuse abining'e, ke a ren ye a nye aner rine̱n.”

⁴⁰Ayong aYeso fe̱ be wu ye, “aSiman, mi be ike̱ng ikak ta ka tak.” Ne a fe̱ ye, “Aner Kubo̱so̱p, Ni tak.”

⁴¹“Áner afa se ko̱bo̱k itso̱m nufe aner akak a ta nyesek iko̱p itso̱m. Akak ko̱bo̱k Itso̱m alebura ife riye̱ rizining be ribir ne akak ko̱bo̱k itso̱m iya alebura tana se̱ kaye̱e̱r kuko̱s iso̱k itoon.

⁴²Cice̱r ba'ong akak be itso̱m a tana ku karang baꞌ, yong a tú won ba'me. To̱, kyo̱o̱rna angan kaye̱e̱r ba ne a tu ku shim ne a nar e̱?”

⁴³Ayong aSiman fe̱ be aYeso ye, “Mi di ye afe a tú ku won itso̱m'e whe̱r ne a nar.” aYeso fe̱ ye, “Wan fe̱ gye̱r.”

⁴⁴aYeso kirik nabas afe abining ame, a tá fe̱ be aSiman ye, “Wan di abining na a? Mi be̱ kari wan, wan ti no̱o̱k ashi tanin kusu atak'i baꞌ, amma wu shu atak'i be nanyisi wu, a tá re̱ng be nakuyo̱ng wu.

⁴⁵Wan ti tonong kushim dide̱ng baꞌ, amma abining na, kum nizen iya mi tá be̱, a won kukur atak'i baꞌ.

⁴⁶Wan ti korok name rice baꞌ, amma wu ti ko̱n name iko̱o̱n itek natak.

⁴⁷Kamok anong mi ta ka tak ye, a mu ku re̱ng rine̱n wu ri ta se whe̱r kamok a tonong kushim dide̱ng. Amma afe a tú ku re̱ng rine̱n wu cie̱k, tonong kushim cie̱k mama tsek.”

⁴⁸aYeso fe̱ be abining ame ye, “A ma ka re̱ng rine̱n wan.”

⁴⁹Ribir ánerawe á tá se be kuyas be wu kpaan ku naka risim ye, “Angan na a ta re̱ng rine̱n gip kusum e̱?”

⁵⁰Ne aYeso fe̱ be abining'e ye, “Kuno̱o̱k katsak wan ma ka shesh, tseng caang.”