Read izere aLuka 8 Bible Online

aLuka 8 - izere bible

aLuka 8

¹Nama anong, aYeso tsang a tseng ni iwo̱p igbang'e be izhizhe̱k'e, ne a taas Rife̱ Ritek natoon rigwo̱m Adakunom, álimazhiri kuso̱k be afa ame se mak be wu.

²Ányining ákak gip á tú ku turung ba ámaan nabik, ne a ku sak ba á tá te atser. Ákak kaye̱e̱r'e nye, aMarya abafe aMagadaliya aya ítseng kanataar tá wuruk kaye̱e̱r wu,

³be aZhowana abining aKuza afe a tá nye itomong nasa aHiridus be aSuzana ne ákak whe̱r. Ányining na tu se̱s mo ba be ku ka nyesek ba ike̱re̱ dide̱ng kaye̱e̱r ike̱re̱ ba tá be.

⁴Nizen rigwo̱m ánerawe tá sen nyim, ákak nes ni iwo̱p ze̱r ze̱r nong á tá be̱s nufe aYeso. Ayong a tú tak ba kumaas na ye,

⁵“Aner ikap akak be ni nas izha naya. Nizen iya a tá se be kunas'e, íca'me ikak kpas niren ne á shesh, ne nanon tang.

⁶Íca'me íkak kpas nifang agudong, i tá fa tang ne i koor kamok sang karo̱'me tá be iben dide̱ng baꞌ.

⁷Íkak kpas kaye̱e̱r ikiritsan, ne ikiritsan'e rasak mak be ba, ne i ku te̱ne̱ng ba.

⁸Ne íca'me íkak i kpas niben itek, ne i rasak ne i te itek dide̱ng, i te ica inyak kuso̱k ma i nar ike̱ng iya a tá tuus.” aYeso tú ku tak ba anong, ne a ma fe̱ ye, “Aner afe a ta be ato kufok a ra fok.”

⁹Iyong álimazhiri wu tú rip ike̱ng ife kumaas'e ta sor.

¹⁰aYeso tú tak ba ye, “A ma ka no̱o̱k yin kukyem kuren ike̱re̱ rigwo̱m Adakunom i ta se nune̱re̱ng, amma be ákak mi ta fe̱ ne i ninye kumaas, nong a se̱ “ ‘Á ta ye̱re̱k gye̱r tatan, amma á tà ra di baꞌ. Á tà foos gye̱rtatan, á tà ra ren ike̱ng iya á tin fe̱ baꞌ.’

¹¹“Iyu ne i nye ike̱ng iya kumaas'e ta sor, íca naya'me nye rife̱ Adakunom.

¹²Ífe i tá kpas niren nye ánerawe aya á tá fok rife̱ Adakunom, ne Ishetan be̱ ne a kok rife̱'me kaye̱e̱r aye̱ ba, fan á bu no̱o̱k katsak nong á tà se̱ kashesh.

¹³Ífe i tá kpas nifang agudong se kyo̱ndi ánerawe áya a tá fok rife̱'me ne á shan be aye̱ akan, amma rife̱'me kpa agap naye̱ ba baꞌ. Á ti no̱o̱k katsak nizen cie̱k tsek, ke izen iya kubo̱mo̱ng be̱ ne á kpas.

¹⁴Íca'me iya i ta kpas kaye̱e̱r ikiritsan nye áner aya a ta fok rife̱ Adakunom, a ra ya kasho̱o̱n nusor'e baꞌ, kamok á ti daam be ike̱re̱ kazatse na, ne kutse̱r kurum ne kusor kutek.

¹⁵Íca ife i ta kpas niben itek nye áner aya a tá shan rife̱'me be riye̱ rizining, áfe a ta fok rife̱ Adakunom ne á ninye itomong ne á na ka tsesek ma ne á te ike̱ng itek.

¹⁶“A te kuro̱ng na apitila ne a bun a kis ka ne a sak ribong agadu baꞌ. A ta sak nagarang nong áfe a ta no̱o̱s tà di akanang'e.

¹⁷Ike̱ng ikak kuse i ta se nune̱re̱ng ife sang a tana won dar a ren baꞌ, ka ike̱ng ikak kuse nukis ife sang a tana won dar a te̱s na akanang baꞌ.

¹⁸Kamok anong, ni sak yin riye̱ be ike̱ng yin ta foos yin. Aner aya a ta be ike̱ng iya a tú ku barang mo, afe a ta be baꞌ kaban ike̱ng wu ta di ye wu be gip, a tin shan ni wu.”

¹⁹Ango̱ aYeso be áronyining wu tseng nong á tá fe̱ ku kanu be wu, á kyem á be̱ bubarak be wu baꞌ, kamok rigwo̱m ánerawe.

²⁰Ayong aner akak fe̱ be wu ye, “Ango̱ wan be áronyining wan se nufang á shim á ta fe̱ kanu be wan.”

²¹Ayong aYeso fe̱ be ba ye, “Ango̱ mi be áronyining'i nye áfe a ta fok rife̱ Adakunom ne á ninye itomong.”

²²Katuk kakak aYeso fe̱ be álimazhiri wu ye, “I tar yir kunyi kukya.” Iyong á no̱ kaye̱e̱r kukpara ashi, á tá tseng.

²³Á tá se be kutseng'e, ne ida sok aYeso. Kuwun dorok be agap na agbang kudung'e, ne ashi san kuno̱o̱s kaye̱e̱r kukpara'me, ma ba no̱ kaye̱e̱r kudaam dide̱ng.

²⁴Iyong álimazhiri tseng nong á tá su ku shiming ye, “Atekasa, Atekasa, yir sen wei yir!” Ne aYeso dorok, a tá tigba kuwun'e be agung ashi'me, ne kunyeseng ne karo̱ te win.

²⁵Ne aYeso rip álimazhiri wu ye, “Kuno̱o̱k katsak yin se ake̱ e̱?” Á te zhing, ne á na ka risim be inyim ye, “Angan na e̱? A ta fe̱ be kuwun be ashi ne á ku fok gip.”

²⁶aYeso be álimazhiri wu ya kasho̱o̱n be kutseng na agbang kudung aGalili kaye̱e̱r kukpara ashi'me nong á tá no̱ niben aGarasi i ta ye̱re̱k ife aGalili.

²⁷aYeso tá fa tiik nukim kudung'e, ne a nyim be aner kuwo̱p'e akak a tá be itseng. Aner na n baan be kuwon kasa, ne a sor ica'me naro̱ are̱k.

²⁸Nizen iya a tá di aYeso, a tá kuto̱ ne á kpa natak wu, a tá tasak dide̱ng ye, “aYeso, Igon Adakunom Agbang Agwo̱m Ágwo̱m, wan tse̱r akye̱ be mi e̱? Kusuk, tin no̱o̱k risam baꞌ.”

²⁹A fe̱ anong kamok aYeso tsang a fe̱ be ítseng'e ye, i ra wuruk kaye̱e̱r aner'e. Ítseng'e n me̱ ne i ku daam anong, ne á ku rosom be idun atso̱m nibo̱k be atak, ne á ku fek, gip be anong ne a te̱se̱ng, ne ítseng'e tseng be wu katse.

³⁰aYeso tú rip ye, “Riyerek wan nye angan e̱?” Ayong a fe̱ ye, “Whe̱re̱,” [13]kamok ítseng whe̱re̱ ne i no̱ kaye̱e̱r wu.

³¹Ayong a yiir kunye aYeso akusuk ye sang a tu fe̱ be ba ye á ra be kaye̱e̱r ribong riya sang ri ta be igak baꞌ.

³²Kukpara álade whe̱re̱ se be kuya azong nabas kawhanang, iyong ítseng'e nye aYeso akusuk ye a ru ku won ba á tà no̱ kaye̱e̱r álade'me. Ayong a tú won ba.

³³Ítseng'e tá fa wuruk kaye̱e̱r aner ame, ne i no̱ kaye̱e̱r álade, kukpara álade'me cei teng nong á tá be kaye̱e̱r kudung ame á tá se kus azong.

³⁴Áfe a tá sen ni sak riye̱ na álade'me tá fa di anong, ne á teng nong á tá se taas'e kaye̱e̱r kuwo̱p ne ni iwo̱p izhizhe̱k'e i ta se bubarak.

³⁵Iyong ánerawe wuruk nong á tá di ike̱ng iya i tá nye, á tá fa be̱ nufe aYeso, ne á di aner ítseng tan wuruk kaye̱e̱r wu ame nusonong natak aYeso. An te ares nong a tá mu ku bun gye̱r kyo̱ndi aner aya rice wu ta se rizining, yong inyim tú ro̱ ba.

³⁶Áfe a tá di taas ánerawe kuri iren iya i tá sak aner a tá be ítseng ame tá te atser.

³⁷Iyong áner iben aGarasi ame cei fe̱ be aYeso ye, a ra tseng a tu ku won ba, kamok inyim tú ro̱ ba dide̱ng. Ayong aYeso no̱ kaye̱e̱r kukpara ashi, a tá tseng.

³⁸Aner ítseng tá wuruk kaye̱e̱r wu ame nye aYeso izong ye wu ta tseng be wu, amma aYeso tú ro a tá fe̱ be wu ye,

³⁹“Ku bun kari, ta se tak ike̱ng iya Adakunom tá ma ka nye'me.” Ayong aner ame tseng a taas kuri ike̱ng iya aYeso tú ku nye'me kaye̱e̱r kuwo̱p'e cei.

⁴⁰Nizen aYeso tá bun a tú bun nunyi wu tú ku ne ame, rigwo̱m ánerawe á tá sen ku tor tú shan niren.

⁴¹Ne aner akak a tú ku yis ye, aZharus a tá nye ako̱k kasho̱o̱n kutu aduwa, wor a be̱ a tá kpa nasho̱o̱n aYeso, a tú ku nye akusuk ye a ra tseng kari wu

⁴²kamok igak angas kutes wu, a tá be aye̱ kuso̱k be afa an te kyo̱ndi a tà ku. aYeso tá se be kutseng wu yong ánerawe be̱s bubarak be wu ma á tú fi.

⁴³Abining akak tuse azong afe naso̱k tá taas aye̱ kuso̱k be afa, akak kyem a tú sak a tá te atser baꞌ.

⁴⁴A be̱ nabas kama aYeso nong a tá ra kanu kukpiin wu, ne naso̱k ame wor na nyeseng.

⁴⁵Ayong aYeso fe̱ ye, “Angan ti ra e̱?” Koangan fe̱ ye wu ren baꞌ, yong aBitrus fe̱ ye, “Atekasa, ánerawe nar agap ma á ta firik ne á na ka tosom.”

⁴⁶Ne aYeso fe̱ ye, “Aner akak min ra, kamok mi fok kukyem tá wuruk kaye̱e̱r'i.”

⁴⁷Abining'e tá di a ta won dar a ku ren baꞌ, yong a be̱ be ikap kutiim a tá kpa na atak wu. A tak ike̱ng i ta sak wu tú ku ra be kuri kutser kuya wu ta wor a se̱ nizen iyong nasho̱o̱n ánerawe'me cei.

⁴⁸Ayong aYeso fe̱ be wu ye, “Angas, kuno̱o̱k katsak wan sak wan n te atser. Tseng caang.”

⁴⁹Nizen aYeso tá ru fe̱ kanu, aner akak ne nasa aZharus, ako̱k kasho̱o̱n kutu aduwa, be̱ a tá be fe̱ ye, “Angas wan n ku, tu ba bun i daam aner kubo̱so̱p baꞌ.”

⁵⁰aYeso ta fa fok anong, ne a fe̱ be aZharus'e ye, “Sang tu fok inyim baꞌ, no̱o̱k katsak tsek, a ta te atser.”

⁵¹A tá fa no̱ numa aZharus ame, aYeso won aner akak tá no̱ mak be wu baꞌ, ma ke aBitrus be aYohana ne aYakub, be atek ne anyining igon'e tsek.

⁵²Ánerawe sen tang ikun, ne á nye riyo̱m kanamang'e. Ayong aYeso fe̱ be ba ye, “Sang tu tos yin baꞌ, an ku baꞌ, amma a se be ida tsek.”

⁵³Iyong á mas aYeso'me, á ta ren ye an ku.

⁵⁴Amma aYeso yiir aku'me nubo̱k a tá fe̱ ye, “Angas'i, dorok.”

⁵⁵Iyong isong wu tú bun, ne a wor a dorok, ne aYeso fe̱ be ba ye, á ru ku no̱o̱k ike̱ng ikak a ta ya.

⁵⁶Átek'e te zhing, ne aYeso fe̱ be ba ye, sang á tu tak akak ike̱ng iya i tá nye baꞌ.