Read izere aLuka 9 Bible Online

aLuka 9 - izere bible

aLuka 9

¹aYeso tá yis kuso̱k be afa ame, a tú no̱o̱k ba kukyem kuturung koakye kuri ítseng, kufe ku ni sak áfe iro̱k tana te atser.

²A tú ku tom ba nong a ta se taas itak rigwo̱m Adakunom, ne á sak áfe iro̱k ta te atser.

³A fe̱ be ba ye, “Sang tu sok yin ike̱ng ikak kamok kutseng yin'e baꞌ, ko ishe̱n, ka ishika, ka naya, ka itso̱m, ka tu be yin akpiin afa baꞌ.

⁴Koakye kasa ne yin no̱ yin ke á ta shan yin ne i sor yin azong ma izen iya yin tana won yin kuwo̱p'e.

⁵Karo̱ kaya ne á ta shan yin baꞌ, re̱ng yin iwur atak yin nizen iya yin tana won yin kuwo̱p'e, nong i tà sor asheda natoon ba.”

⁶Iyong á dorok á tsang á tseng ni iwo̱p izhizhe̱k'e, ne á taas Rife̱ Ritek'e, ne á sak ánerawe ta te atser koake̱ ne á no̱.

⁷To̱, aHiridus afe a tá nye agwo̱mna aGalili fok ike̱re̱ azhing aYeso tá tsang a nye cei. Ayong a daam kamok ákak fe̱ ye, aYeso nye aYohana aner abatisma aya a tá dorok nure̱k.

⁸Ákak fe̱ ye, a nye Iliya aner kuzarap Adakunom ne a bun an dorok. Ákak bun á fe̱ gbak ye a nye azining kaye̱e̱r aner kuzarap Adakunom agbugbang'e a tan ku, ne a bun an dorok.

⁹Ne aHiridus fe̱ ye, “Mi sak a tá te̱n rice aYohana ko̱. To̱, angan na ne mi foos ike̱re̱ natoon wu na e̱?” Ayong aHiridus'e shim ke a di aner'e.

¹⁰Nizen ámanzo ame tú ku bun, á tak aYeso ike̱re̱ ba tá nye cei. Ayong a naka ko̱ro̱k ba a tá tseng mak be ba nuwo̱p a ta yis ye aBatseda.

¹¹Ánerawe whe̱re̱ tá fa fok itak'e, yong á tú kuus. A tú nye ba adazha be kube̱. Ayong a tá ka tak ba rife̱ natoon rigwo̱m Adakunom, ne a sak áfe iro̱k tá te atser.

¹²Kuso̱k be afa ame be̱ nufu nawhe̱shirim á tá fe̱ ye, “Ka te ba niren nong á ta be ni iwo̱p iya i ta se bubarak nong á ta se tse̱r naya be naro̱ kuko̱s kamok yir se yir katse.”

¹³Ne aYeso fe̱ be ba ye, “Ku no̱o̱k yin ba ike̱ng ikak nong á ta ya.” Iyong á fe̱ ye, “Yir be yir ike̱ng ikak dide̱ng baꞌ, ma ke ágbang abiredi atoon be izos ifa tsek, ma ke ta su ku shan yir ba naya.”

¹⁴Atek áfe a ta se azong be̱ barak áner izungu itoon. Ayong aYeso fe̱ be álimazhiri wu'me ye, “Ku sak yin ba nong á ta sosok nagwo̱m iso̱k itutoon.”

¹⁵Alimazhiri'me nye anong, yong koangan sonong kaben.

¹⁶aYeso sok ágbang abiredi atoon be ízos ifa ame. Ne a sok rice naza a tá tonong Adakunom riye̱ rikan. A te̱se̱ng abiredi be ízos ame, a ta no̱o̱k álimazhiri wu nong á tá saas ánerawe'me.

¹⁷Cice̱r ba ya ma á whas, ne álimazhiri'me tusung ribir íkpis'e cip ni íderse kuso̱k be ifa.

¹⁸Katuk kakak aYeso tá se be kunye aduwa wu ze̱r, yong álimazhiri wu be̱ á tú se̱. Ne aYeso tú rip ba ye, “Ánerawe fe̱ ye mi nye angan e̱?”

¹⁹Iyong álimazhiri'me fe̱ ye, “Ákak fe̱ ye wan nye aYohana aner abatisma, ne ákak fe̱ ye wan nye Iliya, ne ákak bun á fe̱ ye wan nye akak kaye̱e̱r áner kuzarap Adakunom ágbugbang'e, ne a bun an dorok be kutser.”

²⁰Ayong aYeso tú rip ba ye, “To̱, yin ne e̱? Yin di yin ye, mi nye angan e̱?” Ayong aBitrus fe̱ ye, “Wan ne i nye aKiristi afe Adakunom tá tom.”

²¹aYeso tú kpam ba ye sang á tú tak akak baꞌ.

²²Ayong aYeso fe̱ be ba ye, “Igon Anerawe tà so̱ iriri risam, ne áko̱k kasho̱o̱n be ágbang átsi ne áner kubo̱so̱p Itsi ku rawu, a tu ku fe̱r ne a bun a dorok katuk afe ataar be kutser.”

²³Ayong aYeso fe̱ be ba cice̱r ye, “Koangan afe a ta shim a tin kuus, a ra rawu rice wu nong a ta sok kukon a tana ku tigak mo koakye kunom nong a tin kuus.

²⁴Koangan afe a ta shim a ta shesh kutser wu, a tin wei. Afe a tin wei nutser wu kamok'i, a tà shesh kutser wu.

²⁵Akye̱ kuri ike̱ng itek ne anerawe ta se̱, ke a se̱ kazatse na cei, ne a rin wei nutser wu e̱?

²⁶Koangan afe a ta fok isum mi be rife̱ mi, Igon Anerawe ta fok isum wu nizen iya wu tana be̱ kaye̱e̱r kuyiik wu be kuyiik Ada wu ne kufe ámaleka azhe̱l'e.

²⁷Katsak'e ne mi ta ka tak yin, ákak áfe a ta se aze tà tsang á kus baꞌ, ma á di rigwo̱m Adakunom nizham.”

²⁸Nama inom ikara aYeso tá fe̱ rife̱'ong, yong a sok aBitrus be aYohana ne aYakub mak be wu, á tá tseng natoon kawhanang nong á tá se nye aduwa azong.

²⁹Nizen aYeso tá se be aduwa'me kanyisi wu shishing, ne ares wu te akan pes ma a gye̱se̱m.

³⁰Ayong áner ákak ba afa ti wuruk ni wu be kuyiik, áner'e nye aMusa be Iliya,

³¹ne á fe̱ be aYeso itak riku wu a tana kam be kazatse, izen'e tan be̱ bubarak i ta shining na aUshalima.

³²Ida yising aBitrus be áfudang wu, á tá fa te kparak, ne á di kuyiik aYeso be áner afa ame nunyeseng be wu.

³³Nizen áner ame tá se be i kam be aYeso, yong aBitrus fe̱ be aYeso ye, “Atekasa, i se gye̱r yir ta se yir aze, i nye yir abur ataar, kuzining tà nye kufuan, ne kuzining nye kufe aMusa, ne kuzining nye kufe Iliya.” A ren ike̱ng iya wu ta fe̱ baꞌ.

³⁴Nizen iya a tú ru fe̱ kanu, kune̱n wuruk ku tú ku kis ba, ne inyim ka ro̱ ba.

³⁵Ne kuto̱ kukak wuruk kaye̱e̱r kune̱n'e ye, “Ayu ne a nye igon'i, mi tan kasa. Ku fok yin kuto.”

³⁶Nama kuto̱'me tá te yu, ne á di aYeso wu ze̱r. Álimazhiri'me sak ike̱re̱'ong kaye̱e̱r aye̱ ba, á tak akak ike̱ng ikak natoon'e nizen iyong baꞌ.

³⁷Kayatson'e, á tá fa tiik natoon kawhanang'e, ánerawe whe̱re̱ be̱s nong á nyim be wu.

³⁸Aner akak kaye̱e̱r ánerawe'me fe̱ be wu ye, “Aner Kubo̱so̱p, mi ta nye izong, ye kusuk be̱ ta di igon'i kamok wu ze̱r tsek ne a nye igon'i.

³⁹Amaan kabik tu daam ma a tang kukun, ne i ku barak kaben ne a tiim ma a turung ace̱ fuk fuk nanu, i wor i tu won baꞌ, ne i nye kyo̱ndi i tu ku fe̱r.

⁴⁰Mi nye álimazhiri wan akusuk ye á ru ku tun'e, á ra kyem á tun baꞌ.”

⁴¹Ayong aYeso fe̱ ye, “Kaꞌ. Yin ánerawe izam na, I ta shonong ne i won dar i no̱o̱k yin katsak, mi ta sor ma ane̱ nong tana ka tsesek be yin e̱? Be̱e̱n igon wan'e aze.”

⁴²Nizen igon'e tá saase, amaan kabik'e tú barak kaben ne a tiim, iyong aYeso tigba amaan kabik'e ne a sak igon'e tá te katser ne a no̱o̱k atek'e.

⁴³Ánerawe te zhing cice̱r be kukyem Adakunom. Nizen koangan tá te zhing be ike̱ng aYeso tá nye cei, yong aYeso fe̱ be álimazhiri wu'me ye,

⁴⁴“Wesek yin kuto be ike̱ng mi ta sen ka taas yin. A tà sok Igon Anerawe a tà re̱p ákak'e.”

⁴⁵Amma ba kyem á ren ike̱ng iya rife̱'me tá sor baꞌ. A tú ne̱r ba'me fan á bu ren ike̱ng'e. Inyim tú ro̱ ba, akak kyem á tú rip baꞌ.

⁴⁶Álimazhiri'me kpaan nanan awan ba ye angan kaye̱e̱r ba ne a ta nar kuyiik'e.

⁴⁷aYeso tá ren kuto̱ro̱ng ba, yong a sok igon kakak kahiir'e nong a tú ku sak a tá nyeseng nukim wu.

⁴⁸Ne a fe̱ be ba ye, “Aner aya ne a shan igon kahiir'e kyo̱ndi kayu kaye̱e̱r riyerek'i, i nye ye a ti shan. Aner aya ne a ti shan, i nye ye a shan aya a tin tom, kamok aner afe a ta mees rice wu ye wu raar kaye̱e̱r yin cei, wu ne a nye ayiik'e ne a nar.”

⁴⁹Ayong aYohana fe̱ be wu ye, “Atekasa, yir di yir aner akak a tá sen turung ítseng kaye̱e̱r riyerek wan yong yir fe̱ tú ku roon yir'e kamok wu ta nye akak kaye̱e̱r yir baꞌ.”

⁵⁰Ayong aYeso fe̱ be ba ye, “Sang tu ku ro̱n yin'e baꞌ, kamok aner aya ne a ta ka ranyin baꞌ, a kuus kama yin.”

⁵¹Izen tá be̱ bubarak aYeso tana ku bun naza yong a shim ma ke a be na aUshalima.

⁵²Ayong a tom átom ákak nasho̱o̱n wu áya a tana tseng nuwo̱p aSamariya nong á ta su ku nye kanye̱k.

⁵³Amma áner ame raba ku kushan, kamok a se niren kutseng na aUshalima.

⁵⁴Nizen álimazhiri wu, aYakub be aYohana tá di anong, yong á fe̱ be aYeso ye, “Agwo̱m Ágwo̱m, wan shim yir ta fe̱ yir be kuro̱ng nong ku ta ne naza nong ku tin kpa natoon ba ne ku kuya ba e̱?”

⁵⁵Ayong aYeso kirik a tú ku tigba ba.

⁵⁶Ne á be ba nuwo̱p kukak.

⁵⁷Á tá se be kutseng niren, aner akak fe̱ be aYeso ye, “Mi ta ka kuus koake̱ ne wan tà tseng.”

⁵⁸Ayong aYeso fe̱ be wu ye, “Áromong be ibong ba, ne nanon be are̱ ba tin sor, amma Igon Anerawe be karo̱ ku ni no̱ baꞌ.”

⁵⁹Ne aYeso bun a fe̱ be aner akak ye, “Ni kuus.” Amma aner'e fe̱ ye, “Atekasa, ni won ta se ne̱r ada mi nizham.”

⁶⁰Ayong aYeso fe̱ be wu ye, “Won ikom tu ne̱se̱k ikom ba, wan tseng ta se taas itak rigwo̱m Adakunom.”

⁶¹Akak bun a fe̱ be aYeso ye, “Atekasa, mi tà ka kuus, amma ni won ta se nye afekari atato̱ nizham.”

⁶²aYeso fe̱ be wu ye, “Aner aya a tan yiir kutse inyak ikap, ke a bun a kirik kama, a kyem a ta no̱ kaye̱e̱r rigwo̱m Adakunom baꞌ.”