Read izere aYohana 1 Bible Online

aYohana 1 - izere bible

aYohana 1

¹Ni ime̱se̱ng'e nye Rife̱, Rife̱'me se be Adakunom, Rife̱'me nye Adakunom.

²Wu ne a se mak be Adakunom kum ni ime̱se̱ng'e.

³Be wu ne a nye koakye ike̱ng, ike̱ng ikak kuse ife a tá nye dar wu baꞌ.

⁴Kaye̱e̱r wu kutser kuse, kutser na be̱e̱n be akanang nufe ánerawe.

⁵Akanang'e ya kaye̱e̱r awhi, amma awhi'me tú ku ren baꞌ.

⁶Aner akak be̱ afe Adakunom tú ku tom: riyerek wu ta nye aYohana.

⁷A be̱ nong a tá be̱ taas katsak natoon akanang'e, nong ase̱ kamok wu ne ánerawe cice̱r tin no̱o̱k katsak.

⁸Sang wu aYohana'me ne a nye akanang'e baꞌ, amma a be̱ nong a tá fe̱ itak natoon akanang'e tsek.

⁹Akanang afe katsak aya a ta nyeseng ánerawe akanang cice̱r kaye̱e̱r kazatse saase.

¹⁰Rife̱'me se kaye̱e̱r kazatse gbugbang, kamok be wu ne a tin nye kazatse, gip be anong kazatse'me tu ku ren baꞌ.

¹¹A be̱ nufe iya i tá nye afu, amma áfu'me tu ku shan baꞌ.

¹²Amma cice̱r áfe a tú ku shan ne á ni no̱o̱k katsak riyerek wu, a tá no̱o̱k ba iren kute inoon Adakunom.

¹³Sang inoon naya a tá tes kuri rife rinerawe baꞌ, ka kaye̱e̱r kushim kuro̱m tsek baꞌ, ka nushim aner tsek baꞌ, amma Adakunom be rice wu ne a nye Ada ba.

¹⁴Rife̱'me te anerawe ne a sor kaye̱e̱r yir. Yir n di yir kuyiik wu, kuyiik kuya ku ta nye kufe asuze̱r Igon ku ta ne nufe Ada wu tsek, a ta shining be ritek ne katsak.

¹⁵aYohana fe̱ itak natoon wu. A tá kuto̱ nong a tá fe̱ ye, “Ayu ne a nye aya mi tá fe̱ itak natoon wu nizen iya mi tá fe̱ ye, ‘Aya a tana be̱ nama mi, a ti nar, kamok wu tuse nizham a tá rin tes.’ ”

¹⁶Kaye̱e̱r ritek wu ri ta se dide̱ng ne yir cice̱r se̱ yir ritek natoon ritek.

¹⁷Kamok Itsi be̱ nubo̱k aMusa, amma ritek be katsak be̱ nubo̱k aYeso aKiristi.

¹⁸Aner akak kun di Adakunom baꞌ. Amma asuze̱r ke Igon wu tsek, aya a ta se rifam Atek wu, ne a sak yir tú ku ren yir.

¹⁹Iyu ne i nye ike̱ng ife aYohana tá fe̱ nizen iya áner aYahuda aya a tase na aUshalima tá tom átsi ne áner aLawi ye á ra su ku rip ye, “Wan nye angan e̱?”

²⁰aYohana ton ne baꞌ, amma a tú tak ba kanang ye, “Sang mi ne i nye aKiristi'me baꞌ.”

²¹Ayong á tú ku rip ye, “To̱, wan nye angan e̱? Wan ne i nye Iliya a?” Ne aYohana fe̱ be ba ye, “Wayo, mi ne i nye wu baꞌ.” “Ayong wan ne i nye Aner Kuzarap [1] ame a?” Ne a bun a fe̱ be ba ye, “Wayo.”

²²Ni igang'e á bun a tú ku rip ye, “To̱, wan nye angan e̱? Ni tak yir nong ase̱ tà se tak yir áya a tin tom yir. Wan fe̱ ye wan nye angan e̱?”

²³Ne aYohana ku tak ba be rife̱ Ishaya aner kuzarap, a tá fe̱ ye, “Mi ne i nye kuto̱ kuya ku ta yis kaye̱e̱r katse ye, ‘Nye yin iren cop kamok Agwo̱m Ágwo̱m.’ ”

²⁴Áyong aner aYahuda aya a tá se kaye̱e̱r kugung rice aFarisi [2] áya a tú ku tom ba,

²⁵rip aYohana'me ye, “Iyong akye̱ sak wan ta nye abatisma ke wan nye aKiristi, ka Iliya ka Aner Kuzarap'e baꞌ e̱?”

²⁶Ne aYohana fe̱ ye, “Mi nye abatisma be ashi, amma nunyeseng aze be yin akak kuse aya yin tu ku ren yin baꞌ.

²⁷Wu ne a nye aya a tana be̱ nama mi, idun akpatak wu mi ta kyem i bis baꞌ.”

²⁸A nye ike̱re̱ na cei na aBetani, nunyi isho̱ng aUrdun, naro̱ aYohana tú ku nye abatisma.

²⁹Katuk afe afa aYohana di aYeso saase nufu, yong a fe̱ ye, “Di yin, Aturuk Adakunom, [3] aya a tan n sok rine̱n kazatse!

³⁰Ayu ne a nye aya afe mi tin fe̱ natoon wu ye, ‘Aner aya a tana be̱ nama mi a ti nar kamok wu se nasho̱o̱n'i.’

³¹Mi tsang i tú ren gbugbang baꞌ, amma mi be̱ be kunye abatisma be ashi nong ta sak áner Isarela tu ku ren.”

³²Ayong aYohana no̱o̱k a sheda na ye, “Mi di Kabik Kazhe̱l'e ta ne naza kyo̱ndi abo̱p ka tin tiik natoon wu.

³³Mi tsang i ku ren baꞌ, amma Adakunom afe a tin tom nong ta nye abatisma be ashi ti tak ye, ‘Aner aya wan di Kabik ti tiik ne a ni sonong natoon wu to̱, wu ne a nye aner kunye abatisma be Kabik Kazhe̱l'e.’

³⁴Mi di anong, kamok anong mi ta kyem i fe̱ koakye natoon wu ye, wu ne a nye Igon Adakunom.”

³⁵Naya katson'e aYohana se azong be álimazhiri wu afa.

³⁶Nizen a tá di aYeso ta sen gor, a fe̱ be ba ye, “Di yin, Aturuk Adakunom!”

³⁷Nizen iya álimazhiri afa ame tá fa fok anong, yong á kuus aYeso.

³⁸aYeso kirik a tu di ba á ta sen ku kuus ne a ku rip ba ye, “Yin tse̱r yin akye̱ e̱?” Ne ba fe̱ ye, “aRabbi (i ta sor Aner Kubo̱so̱p), wan sor ake̱ e̱?”

³⁹Ayong aYeso fe̱ be ba ye, “Be̱ ta se di yin.” Iyong á tseng nong á ta se di karo̱ kaya wu tu ku sor ne á woso be wu. I se nabas itso̱m inaas nawhe̱shirim.

⁴⁰Adarawus, aronyining aSiman Bitrus, nye akak kaye̱e̱r áner afa áfe a tá fok ike̱ng iya aYohana tá fe̱ ne a kuus aYeso.

⁴¹Ike̱ng ife ime̱se̱ng'e Adarawus ta nye, nye a tse̱r aronyining wu aSiman, a tu ku tak ye, “Yir n se̱ yir aKiristi (wu nye a nye aMasihu[4]).”

⁴²Iyong a be̱ be aSiman nufe aYeso. aYeso tú ye̱re̱k ne a fe̱ be wu ye, “Wan ne i nye aSiman igon aYohana a? A tá ka yis ye aKefas” (i ta sor aBitrus).

⁴³Kadiding tá fa karak ne aYeso nye kanye̱k ku be na aGalili. Ayong a se se̱ aFilibus ne a fe̱ be wu ye, “Ni kuus.”

⁴⁴aFilibus nye aner kuwo̱p aBatseda, kuwo̱p kuzining be Adarawus be aBitrus.

⁴⁵Iyong aFilibus se̱ aNataniyel ne a fe̱ be wu ye, “Yir n se̱ yir aner aya aMusa tá zibir itak wu ne áner kuzarap bun zibir natoon wu, aner nye aYeso afu Nazaret, igon aYusufu.”

⁴⁶Ayong aNataniyel fe̱ ye, “I se ye ike̱ng ikak itek tà wuruk na aNazaret a?” Ne aFilibus fe̱ be wu ye, “Be̱ ta di.”

⁴⁷aYeso tá fa di aFilibus tá saase nufu ayong a fe̱ be wu ye, “Di, yin aner Isarela afe katsak, aya a ta be naborok baꞌ.”

⁴⁸Ayong aNataniyel rip aYeso ye, “Wan nye ane̱ i tin ren e̱?” Ne aYeso ku shim'e ye, “Mi tá di kum nizen wan tá rusek ritin atafo, nizham aFilibus tá ra ka yis.”

⁴⁹Iyong aNataniyel fe̱ ye, “Aner kubo̱so̱p, wan ne i nye Igon Adakunom; wan ne i nye agwo̱m Isarela.”

⁵⁰Ne aYeso fe̱ ye, “Wan ti no̱o̱k katsak kamok mi tá ka tak ye mi tá di ritin atafo a? Wan tà di ike̱re̱ azhing iya i ta nar iyong.”

⁵¹Iyong aYeso bun a fe̱ be wu ye, “Mi ta ka tak katsak'e, wan tà di kaza nukarak, ne ámaleka Adakunom ngarak naza ne á tisik natoon Igon Anerawe.”