Read izere aYohana 12 Bible Online

aYohana 12 - izere bible

aYohana 12

¹A tú ku won inom igataar ne a nye riye̱ rikan aPasova, yong aYeso be na aBetani, naro̱ kaya aLazarus tú ku sor. Aner aya aYeso tú ku dorok nure̱k ame.

²A nyes aYeso azong, aMarta ne a kasap naya'me ne aLazarus nye akak kaye̱e̱r áya a ta yas mak be aYeso'me.

³Ayong aMarya sok kudu name iko̱o̱n itek a tá yis ye anad [9] na ta be itso̱m dide̱ng nong a tá korok aYeso'me natak ne a re̱ng be nakuyo̱ng rice wu. Iko̱o̱n name'me shining kaye̱e̱r kasa'me cei.

⁴Amma aYahuza Iskariyot, azining kaye̱e̱r álimazhiri aYeso, aya a tá bun a sok aYeso a no̱o̱k, fe̱ ye,

⁵“Akye̱ sak a tá re̱p name na nong a tin se̱ itso̱m nong a tá no̱o̱k áfe rizor baꞌ e̱? Itso̱m name'me ta se kyo̱ndi itso̱m alebura ife inom iso̱k inyak itaar.”

⁶aYahuza fe̱ anong sang kamok wu tá daam be áfe rizor baꞌ, amma kamok wu tá nye akpatang. Wu ne a tá ceshek ishika itso̱m ba, a bo̱s azong ne a ni tobok rice wu.

⁷Ayong aYeso fe̱ ye, “Ku won, a sak name na kamok kunom kune̱r'i.

⁸Yin tà se yin mak be áfe rizor ye̱r ye̱r, amma mi tà se mak be yin ye̱r ye̱r baꞌ.”

⁹Áner aYahuda whe̱re̱ tá fa ren ye aYeso se azong, yong á be̱s, sang kamok aYeso'me wu tsek baꞌ, amma nong á ta di aLazarus, aya a tú ku dorok nure̱k ame.

¹⁰Ayong ágbang átsi ame tse̱r iren nong á tá fe̱r aLazarus gip,

¹¹kamok natoon wu ne áner aYahuda whe̱r san i kuus aYeso ne á ni no̱o̱k katsak ni wu.

¹²Katuk ife afa, áner aya a tá tsang á be̱ riye̱ rikan aPasova tá fok ye aYeso saase na aUshalima.

¹³Ayong á bo̱s afumung atarkai nong á tá tseng á tá se nyim be wu, ne á tang kuto̱ naza ye, “Nakerek nye nafe Adakunom. Aner riye̱ rikan ne nye aya a ta be̱ kaye̱e̱r riyerek Agwo̱m Ágwo̱m! Aner riye̱ rikan ne nye Agwo̱m Isarela.”

¹⁴aYeso tá se̱ igon azhaki kakak, yong a ti ngarak natoon'e, kyo̱ndi a tá zibir ye,

¹⁵“Sang tu fok yin inyim baꞌ, áner aUshalima, Di yin, Agwo̱m yin saase, natoon igon azhaki.”

¹⁶Ni ime̱se̱ng'e álimazhiri wu tsang á ren ike̱ng'e baꞌ, ma nama a tá dorok aYeso be kuyiik, ba tá ra yiring'e ye, ike̱re̱'ong se ni izibir natoon wu kyo̱ndi ba tá mu ku nye'me.

¹⁷Áner aya a tá se be aYeso nizen iya a tá yis aLazarus nure̱k, a tú ku dorok be kutser. Á yiir itaas ánerawe ike̱ng aYeso tá nye.

¹⁸Ánerawe whe̱re̱ a tá tsang á fok ye a nye itomong azhing kuri iyong wuruk nong a tú ku di.

¹⁹Ayong áner aFarisi fe̱ awan ba ye, “Di yin, yir i kyem i nye yir ike̱ng ikak baꞌ. Di yin kazatse cice̱r ta kuus kama wu.”

²⁰Áner aHeleni nye ákak kaye̱e̱r aya á ta be na aUshalima nong á tá ya Adakunom iben nizen riye̱ rikan ame.

²¹Áyong a be̱ nufe aFilibus, aner aBatseda ni iben aGalili, nong á tá fe̱ be wu ye, “Atekasa, yir shim ta di yir aYeso.”

²²aFilibus'me tseng a se tak Adarawus ne ba fa'ong se tak aYeso.

²³Ayong aYeso fe̱ be ba ye, “Izen a tana tiyiik Igon Anerawe n nye.

²⁴Katsak'e ne mi ta ka tak yin, sang ke a te ica naya kaben nong i ta bus baꞌ, i ta sor ica'me izining tsek. Amma ke i bus, to̱, ne i no̱o̱k íca whe̱re̱.

²⁵Aner aya a ta shim kutser wu tin wei. Aya a ta rawu rice wu kaye̱e̱r kazatse na tà se̱ kutser kufe izen izen.

²⁶Koangan afe a ta shim a ta te asam mi, a tin kuus dim. Karo̱ kafe mi tu ku se, a tà se azong gip. Ada mi tà tiyiik aner aya afe a tin nye itomong cice̱r.

²⁷“Kyo̱o̱rna mi be kudaam kaye̱e̱r riye̱ mi. Mi tà nye ane̱ e̱? Ke mi fe̱ ye, ‘Ada, ni sok risam na a?’ Wayo, iyuna ne i nye ike̱ng iya mi tin be̱ nizen na.

²⁸Ada, tiyiik riyerek wan.” Iyong kuto̱ ne naza ye, “Mi mu ku tiyiik, mi tà bun i ku tiyiik gbak.”

²⁹Ánerawe a tá se azong tá fa fok anong, yong á fe̱ ye, “Iza tar.” Ákak ye, “Amaleka ne a fe̱ be wu.”

³⁰aYeso fe̱ be ba ye, “Kuto̱ na se kamok yin sang mi baꞌ.

³¹Kyo̱o̱rna ne a ta to̱ kazatse na amok. Kyo̱o̱rna ne a tin shan rigwo̱m nufe agwo̱m kazatse.

³²Amma mi, izen iya a ti sok naza, mi tà ko̱ro̱k ánerawe cei nunaan.”

³³aYeso fe̱ anong, nong a ta tonong kuri riku wu tana ku.

³⁴Ayong ánerawe ame fe̱ be wu ye, “Yir fok yir kaye̱e̱r Itsi ye, ‘aKiristi'me tà sor ma izen izen.’ Akye̱ sak wan tá fe̱ ye, ‘A tá sok Igon Anerawe naza e̱?’ Angan ne a nye ‘Igon Anerawe'me e̱?’ ”

³⁵aYeso fe̱ be ba ye, “Akanang se mak be yin nizen cie̱k tsek. Kamok anong, kutseng yin kum ne akanang'e rusek, fan awhi ba ka se̱ yin. Aner aya a ta tseng nawhi ren karo̱ wu tu ku be baꞌ.

³⁶Ni no̱o̱k yin katsak na akanang'e kum ne akanang'e rusek be yin nong yin tà te yin inoon akanang.” Nama aYeso tá fa fe̱ anong, ne a ku won ba a tá se ne̱re̱ng.

³⁷Cei be ike̱re̱ azhing aYeso tá nye na anyisi ba, gip be anong ba ti no̱o̱k katsak ni wu baꞌ.

³⁸A nye anong, nong a tá shining rife̱ Ishaya aner kuzarap tá zibir ye, “Agwo̱m Ágwo̱m, angan ti no̱o̱k katsak rife̱ yir e̱? Nufe angan ne a tonong kukyem Agwo̱m Ágwo̱m e̱?”

³⁹Kamok anong ne ba ti no̱o̱k katsak baꞌ, kyo̱ndi Ishaya tá bun a fe̱ naro̱ kakak ye,

⁴⁰“A sak ba tá te ákpato̱o̱n'e, ne a whe̱e̱n aye̱ ba, fan á bu ye̱re̱k be anyisi ba, ne á ren be aye̱ ba, fan á bu kirik nunaan nong mi tà ka sak ba á tá te atser.”

⁴¹Ishaya fe̱ anong kamok wu di kuyiik aYeso ne a fe̱ itak wu.

⁴²Gip be anong, ánerawe whe̱re̱ ne áko̱k kasho̱o̱n aner aYahuda ti no̱o̱k katsak ni wu. Amma kamok áner aFarisi, ba fok inyim kutonong kuraar ba kanang fan á ba ka tun ba kaye̱e̱r atu aduwa ba,

⁴³kamok ba shim nakerek nufe ánerawe ne á nar nufe Adakunom.

⁴⁴Ayong aYeso tá kuto̱ naza a tá fe̱ ye, “Koangan ne a ti no̱o̱k katsak ni mi, ni mi ne a ti no̱o̱k katsak tsek baꞌ, amma naya a tin tom.

⁴⁵Koangan afe a tin di, a di aner aya a tin tom.

⁴⁶Mi be̱ nazatse kyo̱ndi akanang, nong ase̱ aya a tin no̱o̱k katsak ni mi ta sor nawhi baꞌ.

⁴⁷“Koangan afe a ta fok rife̱ mi amma a kuus baꞌ, mi ne i tù ku to̱ amok baꞌ, kamok mi be̱ nong ta to̱ kazatse amok baꞌ, amma ta shesh kazatse'me.

⁴⁸Aner kuto̱ amok kuse kamok aya a tin ramin ne a bun a rawu kushan rife̱ mi, rife̱ mi tá fe̱ tù ku to̱ amok katuk igang'e.

⁴⁹Kamok mi fe̱ rife̱ rice mi baꞌ, amma Ada mi afe a tin tom wu ne a ti tees ike̱ng iya mi tana fe̱ be iren iya mi tana fe̱.

⁵⁰Mi ren ye rife̱ wu be̱e̱n be kutser kufe izen izen. Kamok anong, koakye mi ta fe̱ nye ike̱ng iya Ada mi tin tees.”