Read izere aYohana 13 Bible Online

aYohana 13 - izere bible

aYohana 13

¹A tú ku won kuko̱s kuzining ne a nye Riye̱ Rikan aPasova. aYeso tá ren izen n nye ife wu tana won kazatse na nong a tá be nufe Ada wu. A shim ánerawe wu afe á ta se nazatse ne a ku tonong ba kushim wu ma nigang'e.

²Nizen iya aYeso be álimazhiri wu ta se be iya naya katuk, Ishetan tsang i no̱ riye̱ aYahuza Iskariyot igon aSiman nong a tà no̱o̱k aYeso.

³aYeso ren ye Ada'me n won ike̱re̱ cice̱r nubo̱k wu ne a ren ye wu ne nufe Adakunom, nufu Adakunom'me ne wu tù ku bun.

⁴Nizen iya ba tá se be iya naya'me, aYeso dorok a tá tun kukpiin wu kufe katoon'e, ne a rosom atawul nutin wu.

⁵Nama anong, ne a te ashi nures kukak ne a san kukusu átak álimazhiri wu, ne a re̱ng be atawul wu tá rosom nutin wu ame.

⁶Nizen iya a tá be̱ nufe aSiman Bitrus, ayong aBitrus fe̱ be aYeso ye, “Atekasa, wan tin kusu atak'i a?”

⁷Ne aYeso fe̱ be wu ye, “Wan ren ike̱ng mi ta sen nye'me kyo̱o̱rna baꞌ, amma wan tà ren nasho̱o̱n.”

⁸Ayong aBitrus fe̱ ye, “Wayo, wan tà kusu atak'i baꞌ, ko cie̱k.” Ne aYeso fe̱ be wu ye, “Ma mi ta kusu atak wan nizham, sang ke anong baꞌ, wan tà ba sor alimazhiri mi baꞌ.”

⁹Ayong aSiman Bitrus fe̱ ye, “To̱, Atekasa, sang atak'i tsek baꞌ, amma cei be rice be ibo̱k'i gip.”

¹⁰Ayong aYeso fe̱ be wu ye, “Aner aya a tan so tà kusu atak tsek, kamok kuro̱m wu forop. Yin forop yin amma sang cice̱r yin baꞌ.”

¹¹Kamok aYeso tá ren aner aya a tana ku sok a tà no̱o̱k, iyong a fe̱ ye, “Sang cice̱r yin forop baꞌ.”

¹²Nizen iya aYeso tá gang i ka kusu ba atak'e, ne a te ares wu nong a tú ku bun naro̱ kusonong wu, ne a ku rip ba ye, “Yin ren yin ike̱ng i tá sak mi tá nye anong a?

¹³Yin ti yis yin ye ‘Aner Kubo̱so̱p’ be ‘Agwo̱m Ágwo̱m,’ i se gye̱r anong, kamok mi nye anong.

¹⁴Mi nye Agwo̱m Ágwo̱m ne i nye Aner Kubo̱so̱p yin, mi n kusu atak yin, yin gip tana kusu yin'e.

¹⁵Mi ta tonong yin ike̱ng ife yin tana kuus yin, yin gip tà nye yin anong.

¹⁶Katsak'e, mi ta ka tak yin, asam nar atekasa wu baꞌ, ka atom ta nar aner a tu ku tom baꞌ.

¹⁷Kyo̱o̱rna, yin tá ren yin ike̱re̱ na, yin tà sor yin áfe riye̱ rikan ke yin kuus yin.

¹⁸“Sang natoon yin cice̱r ne mi ti fe̱ baꞌ, mi ren áya mi tá kasa. Amma iyu se anong, nong a ta shining rife̱ kufumung aZabura ta fe̱ ye, ‘Aya a tá ya naya mi ne a bun a ti bun ni mi.’

¹⁹“Mi ta taas yin ike̱re̱ na nizham, nong ase̱ ke izen'e nye, yin tà no̱o̱k yin katsak ye mi nye wu.

²⁰Katsak'e ne mi ta ka tak yin, aner aya ne a shan koangan afe mi tu ku tom be riye̱ rizining, i nye ye a ti shan mi. Aya ne a ti shan be riye̱ rizining, i nye ye a shan aner aya a tin tom.”

²¹Nama Yeso tá fe̱ rife̱ na, itak'e tú ku daam dide̱ng kaye̱e̱r riye̱ wu yong a fe̱ kanang ye, “Katsak'e mi ta ka tak yin, azining kaye̱e̱r yin tin sok a tà no̱o̱k.”

²²Áyong álimazhiri wu san i na ye̱re̱k ne á daam ka angan ne a ti fe̱.

²³Azining kaye̱e̱r álimazhiri'me afe aYeso'ma tá shim, a tá se nusonong bubarak be aYeso'me.

²⁴aBitrus tú ku tike̱r nong a tá fe̱ be alimazhiri'me ye, “Ku rip, wu ti fe̱ na angan de̱?”

²⁵Ayong alimazhiri aya a ta se bubarak be aYeso'me tú ku rip ye, “Atekasa aner'e nye angan e̱?”

²⁶Ayong aYeso fe̱ be wu ye, “A nye aya mi tana ku no̱o̱k abiredi na ke mi shumun kaye̱e̱r kures na.” Iyong a shumun abiredi'me ne a no̱o̱k aYahuza Iskariyot igon aSiman.

²⁷Kum aYahuza tá fa shan abiredi'me ne Ishetan no̱ riye̱ wu. Ayong aYeso fe̱ be wu ye, “Ike̱ng iya wan tan sak ye wan tà nye, nye zizirik.”

²⁸Amma akak naro̱ kuya naya'me ren ike̱ng iya i tá sak aYeso tá fe̱ anong be wu baꞌ.

²⁹aYahuza a tá nye aner kusaas itso̱m, ákak ba sor ye aYeso fe̱ be wu ye a ra se shan ike̱re̱ a tá tse̱r kamok aPasova'me, ka a ra se no̱o̱k áfe rizor ike̱ng ikak ayi.

³⁰Kum aYahuza tá fa shan abiredi'me, ne a wuruk nufang. Nizen iyong karo̱ tsang ka te katuk.

³¹Nama aYahuza tá wuruk, aYeso fe̱ ye, “Kyo̱o̱rna Igon Anerawe ta se̱ kuyiik ne Adakunom se̱ kuyiik kaye̱e̱r wu.

³²Ke Adakunom se̱ kuyiik kaye̱e̱r wu, to̱, Adakunom tà tiyiik Igon'e be rice wu ne a bun a tiyiik rice wu zizirik.

³³“Inoon'i, mi tà se be yin nizen cie̱k tsek. Yin tin tse̱r yin, amma kyo̱ndi mi tá fe̱ be áner aYahuda, anong ne mi bun i fe̱ be yin ye, ‘Karo̱ kaya mi tù ku be yin ta kyem i tseng yin baꞌ.’

³⁴“Itsi ifas ne mi ta tak yin ye; Yin ra naka shim yin. Kyo̱ndi mi tá ka shim yin, anong ne yin tana ka shim yin dim.

³⁵Be anong ne koangan tá ren ye yin nye yin álimazhiri mi ke yin naka shim yin.”

³⁶Ayong aSiman aBitrus tú rip ye, “Atekasa, wan be ake̱ e̱?” Ne aYeso fe̱ be wu ye, “Yin ta kyem i tseng yin naro̱ kaya mi tù ku be kyo̱o̱rna baꞌ, amma yin tà be̱ yin nama.”

³⁷aBitrus bun a fe̱ be wu ye, “Atekasa, akye̱ tà sak mi ta tseng be wan kyo̱o̱rna baꞌ e̱? Mi tà no̱o̱k rice mi kamok wan.”

³⁸Ayong aYeso fe̱ be wu ye, “Katsak'e wan tà no̱o̱k rice wan kamok mi a? Katsak'e ne mi ta ka tak, nizham atso̱n ta ra te̱p, wan tà fe̱ ye wan ti ren baꞌ, kutak kutaar.