Read izere aYohana 15 Bible Online

aYohana 15 - izere bible

aYohana 15

¹“Mi ne i nye ritin kakon anap rife̱ katsak, Ada mi ne a nye aner ikap'e.

²Iwhang iya i ta se kaye̱e̱r'i, i tà tes baꞌ a ta te̱se̱ng. Iwhang'e iya i ta tes, ne a nye gye̱r nong i tin barang kutes dide̱ng.

³Kyo̱o̱rna yin se yin zhe̱l kamok rife̱ mi tá fe̱ be yin.

⁴Sor yin kaye̱e̱r'i, ne mi ma kaye̱e̱r yin. Kyo̱ndi iwhang'e ikak tana kyem i tes a wan wu baꞌ, ma ke i se mak be kakon'e, anong ne yin ta kyem yin baꞌ ma yir sor kaye̱e̱r'i.

⁵“Mi ne i nye ritin kakon anap'e, yin nye yin íwhang'e. Aner aya a sor kaye̱e̱r'i ne mi ma se kaye̱e̱r wu, wu ne a tà tes dide̱ng. Kamok sang ke be mi baꞌ, yin tà kyem i nye yin ike̱ng ikak baꞌ.

⁶Koangan afe sang a ta se kaye̱e̱r'e baꞌ, a se kyo̱ndi iwhang'e iya a tan barak nong i tà koor. Ánerawe tusung iri ba ne á tes nuro̱ng, a ta shosh.

⁷Ke yin sor kaye̱e̱r'i ne rife̱ mi se kaye̱e̱r yin, yin tà rip yin koakye ike̱ng yin ta shim yin, a tà ka nye yin'e.

⁸Nye yin itomong iya Adakunom ta shim nong tà tonong yin ye yin nye yin álimazhiri wu, kamok iyu ne i tà be̱ be Ada'me kuyiik.

⁹“Kyo̱ndi Ada'me tin shim anong ne mi ma ka shim yin. To̱, sor yin kaye̱e̱r kuri kushim kuya mi ta ka kushim yin.

¹⁰Ke yin kuus yin Itsi mi, yin tà sor yin kaye̱e̱r kushim'i, kyo̱ndi mi tá kuus Itsi Ada mi ne i sor kaye̱e̱r kushim wu.

¹¹Mi fe̱ anong nong ase̱ riye̱ rikan'i tà se kaye̱e̱r yin, nong riye̱ rikan yin tà shining.

¹²Itsi mi se ye: Naka shim yin kyo̱ndi mi tá ka shim yin.

¹³Kushim kukak kuse ku ta nar kufe anerawe tana no̱o̱k kutser wu kamok áferime̱ wu baꞌ.

¹⁴Yin nye yin áferime̱ mi ke yin kuus yin Itsi mi.

¹⁵Mi tà ba ka yis yin ye ásam baꞌ, kamok asam ren kuto̱ro̱ng atekasa wu baꞌ. Mi ta ka yis yin ye áferime̱ mi makong, kamok koakye ike̱ng iya mi tá bo̱so̱p nufe Ada mi, mi ma ka taas yin.

¹⁶Sang yin ne i ti kasa yin baꞌ, amma mi ne i tá ka kasa yin, nong ta se tes yin kutes kutek, kuya ku tana sor ma izen izen. Be anong ne Ada mi tà ka no̱o̱k yin koakye ike̱ng iya yin ta rip yin kaye̱e̱r riyerek'i.

¹⁷Itsi mi se ye: Naka shim yin.

¹⁸“Ke kazatse ta ka rayin, to̱, ren yin ye ka tin ramin kum ni ime̱se̱ng'e.

¹⁹Ke a fa fe̱ ye yin nye yin áfe kazatse, ke kazatse ta shim yin kamok yin ta nye yin áfu. Kyo̱ndi i ta se, yin nye yin áfe kazatse baꞌ, amma mi ma ka kasa yin kaye̱e̱r áfe kazatse. Iyong ne i sak kazatse ta ka rayin yin.

²⁰Yiring yin be rife̱ mi tá fe̱ be yin ye: ‘Asam akak nar atekasa wu baꞌ.’ Ke á ti tabak, to̱, á tà ka tabak yin gip. Ke ba kuus rife̱ mi a tà kuus rife̱ yin gip.

²¹Ba tà nye be yin anong kamok riyerek'i, kamok ba ren aya a tin tom baꞌ.

²²Mi fa be̱ i tú ku tak ba baꞌ, ke á di rine̱n ba baꞌ. Amma kyo̱o̱rna, ba be iren kuwhe̱r natoon rine̱n ba baꞌ.

²³Aner aya a tin ramin, a rawu Ada mi gip.

²⁴Mi nye ike̱ng dide̱ng iya ánerawe tá baꞌ, kaye̱e̱r ba. Ke a fa fe̱ ye mi nye ba', ke a di rine̱n ba baꞌ. Amma kyo̱o̱rna ba n di itomong azhing iya mi tá nye, gip be anong, ba ti ramin ne á raba Ada mi.

²⁵Amma iyu se anong, nong a tá shining ike̱ng iya a ta zibir kaye̱e̱r afumung Itsi aMusa ye: ‘Á ti ramin kpe̱de̱ng tsek.’

²⁶“Izen iya ne Aner Kutobok'ong be̱, aya a tana ne nufe Ada. Wu ne a nye Kabik kafe katsak. A tà fe̱ itak natoon'i.

²⁷Yin gip yin tà fe̱ yin itak natoon'i dim, kamok yin se yin mak be mi kum ni ime̱se̱ng'e.