Read izere aYohana 16 Bible Online

aYohana 16 - izere bible

aYohana 16

¹“Mi tá taas yin ike̱re̱ na cei nong fan yin bu ku bun yin kama.

²Á tà ka turung yin kaye̱e̱r atu aduwa. Katsak'e, izen saase iya ke aner akak a ta fe̱r yin, a tà di ye wu sen nye itomong Adakunom.

³Á tà nye ike̱re̱ iyong kamok sang ba n ren Ada ka mi baꞌ.

⁴Mi ta ka tak yin ike̱re̱ na, nong ke izen'e nye yin tà yiring yin ye, mi ma ka ko̱ro̱k yin kuto. Mi ta tak yin iyu ni ime̱se̱ng'e baꞌ, kamok mi se mak be yin.

⁵“Kyo̱o̱rna, mi be nufe aya a tin tom, gip be anong akak yin ti rip ye, ‘Wan be ake̱ e̱?’ baꞌ.

⁶Yin nye yin riye̱ riwe ye kamok mi tá fe̱ ike̱re̱ na.

⁷Amma katsak'e ne mi ta ka tak yin: Kutseng'i tà ka sor yin ike̱ng itek kamok ke mi tseng baꞌ, Aner Kutobok ame tà be̱ baꞌ. Amma ke mi tseng mi tà se ka tom yin'e.

⁸Ke Aner Kutobok'e be̱, a tà te̱s rine̱n kazatse be ike̱ng iya i tana tonong kuse kuzhe̱l'e be amok Adakunom.

⁹Kuto̱ro̱ng ba se gye̱r ba' natoon rine̱n', kamok ba gaar ku nino̱o̱k katsak ni mi.

¹⁰Kuto̱ro̱ng ba se gye̱r ba' natoon kuse kuzhe̱l'e, kamok mi be nufe Ada mi, yin ta bin di yin baꞌ.

¹¹kuto̱ro̱ng ba se gye̱r ba' natoon amok, kamok a tsang an te̱n aner áfe tin nye rigwo̱m nazatse na amok.

¹²“Mi be rife̱ dide̱ng tana ka tak yin, amma yin ta kyem i na tsesek yin ta fok yin kyo̱o̱rna baꞌ.

¹³Amma izen iya ife Kabik kafe katsak'e be̱, a tà ka tonong yin iren katsak cei kamok sang, a tà fe̱ rife̱ rice wu baꞌ. Ike̱ng iya wu ta foos tsek ne wu tà fe̱. A tà bun a tà ka taas yin ike̱re̱ iya i ta rusek, nong a tà ra nye.

¹⁴A tin tiyiik, kamok a tà kok ike̱re̱ iya i ta nye inaan ne a ka taas yin.

¹⁵Ike̱re̱ iya i ta nye ife Ada'me cei nye inaan. Ike̱ng iya i tá sak mi tá fe̱ ye, Kabik tà kok ike̱re̱ inaan ne a ka taas yin.

¹⁶“Nizen cie̱k yin tà bin di yin baꞌ, amma nama izen cie̱k, ne yin bun i ni di yin.”

¹⁷Iyong álimazhiri wu ákak fe̱ awan ba ye, “Rife̱ wu na sor akye̱, a ta fe̱ ye, ‘Nizen cie̱k yin tà bin di yin baꞌ, amma nama izen cice̱r ne yin bun i ni di yin'e? Ne a bun a fe̱ ye: Kamok mi ta be nufe Ada'me e̱’?”

¹⁸Á yiir ku naka risim ye, “Akye̱ sak a tá fe̱ ye, ‘Amma nama izen cie̱k’ e̱? Yir ren yir ike̱ng iya wu tin fe̱ baꞌ.”

¹⁹aYeso tá ren ye álimazhiri wu shim á tú ku rip natoon ike̱ng'ong, ayong a fe̱ be ba ye, “Yin sen na ka risim yin ike̱ng iya rife̱ mi tá sor, mi tá fe̱ ye, ‘Nizen cie̱k yin tà bin di yin baꞌ, amma nama izen cie̱k ne yin bun ni di yin’ a?

²⁰Katsak ne mi ta ka tak yin, yin tà tos ne i nye yin riye̱ riwe ne kazatse nye riye̱ rikan. Yin tà nye yin riye̱ riwe, amma riye̱ riwe yin tà kubun ri ta te riye̱ rikan.

²¹Aner abining a ta sen tes igon fok kuro̱'me, kamok izen kutes wu tan nye. Amma izen iya ne a tes igon wu, ne a tiburum risam'me kamok a be riye̱ rikan wu tan tes igon nazatse.

²²Anong ne i se be yin gip, kyo̱o̱rna ne i nye izen riye̱ riwe yin. Amma mi tà bun i ka di yin ne i nye yin riye̱ rikan, akak ta kyem a ka roon yin riye̱ rikan yin baꞌ.

²³Katuk kayong yin tà bin rip yin ike̱ng ikak baba baꞌ. Katsak ne mi ta ka tak yin, Ada'me tà ka no̱o̱k yin koakye ike̱ng yin tana rip yin kaye̱e̱r riyerek'i.

²⁴Ko kyo̱o̱rna yin min rip yin ike̱ng ikak kaye̱e̱r riyerek'i baꞌ. Rip yin, yin ta se̱ yin nong riye̱ rikan yin tà shining.

²⁵“Mi ta taas yin ike̱re̱ na cei be kumaas gye̱r tatan, izen saase mi tana ba fe̱ be yin be kumaas baꞌ. Amma mi tà fe̱ be yin kanang natoon Ada mi.

²⁶Katuk'ong yin tà nye yin izong kaye̱e̱r riyerek'i. Yin tà rip yin Ada be rice yin sang mi ne ta ka rip yin'e baꞌ.

²⁷Wayo, Ada'me ta shim yin be rice wu, kamok yin ti shim yin ne i no̱o̱k yin katsak ye, mi ne nufe Adakunom.

²⁸Mi ne nufe Ada'me, i ta be̱ nazatse. Kyo̱o̱rna mi sen won kazatse'me nong tù ku bun nufe Ada'me.”

²⁹Ayong álimazhiri wu fe̱ ye, “Yawa, kyo̱o̱rna ne wan ma fe̱ rife̱ kanang dar kumaas.”

³⁰Kyo̱o̱rna ne yir ma ren yir ye wan ren koakye, sang ma akak tá rip baꞌ. Iyuna sak yir ti no̱o̱k yir katsak ye wan ne nufe Adakunom.

³¹aYeso fe̱ be ba ye, “Aser, ma kyo̱o̱rna ne yin ra min no̱o̱k yin katsak a?”

³²Amma izen saase, n be̱ gip ma, yin tana te yin shaam. Koangan tù ku bun kari wu, yin cei tin won yin mi ze̱r. Gip be anong, mi ta se mi ze̱r baꞌ, kamok Ada mi se mak be mi.

³³“Mi ta taas yin ike̱re̱ na, kamok kaye̱e̱r riyerek'i yin tà se̱ yin kusor caang. Yin tà so̱ yin risam kaye̱e̱r kazatse na, amma na ka tsesek yin. Mi canang kazatse na.”