Read izere aYohana 17 Bible Online

aYohana 17 - izere bible

aYohana 17

¹Nama aYeso tá fe̱ ike̱re̱ na, ne a sok rice wu naza a tá ye̱re̱k kaza nong a tá nye aduwa ye, “Ada, izen'e n nye. Tiyiik Igon wan, nong wu gip a tà ka tiyiik.

²Kamok wan tú ku no̱o̱k rigwo̱m natoon ánerawe cei, nong a ta no̱o̱k aya wan tú ku no̱o̱k cice̱r, kutser kufe izen izen.

³Kutser kufe izen izen'e nye ye, ánerawe ra ka ren ye, wan ze̱r ne i nye Adakunom afe katsak, ne á ren aYeso Kiristi aya wan tá tom.

⁴Mi tá be̱e̱n kuyiik kaye̱e̱r kazatse be itomong iya wan tin no̱o̱k i tá nye cei.

⁵To̱, kyo̱o̱rna Ada, ni tiyiik be kuyiik kuya mi tá be nasho̱o̱n wan nizham a tá ra nye kazatse.

⁶“Mi n sak ánerawe áfe wan tin no̱o̱k nazatse ma ka ren. Á nye áfuan, wan ne i tú sok ba i tin no̱o̱k. Ba ma kuus rife̱ wan.

⁷Kyo̱o̱rna ba ren ye koakye wan ta min no̱o̱k ne nufuan.

⁸Kamok rife̱, wan tin no̱o̱k ne mi tú ku taas ba ne ba shan, ne á ren be katsak ye mi ne nufuan, ne ba ni no̱o̱k katsak ye wan ne i ti tom.

⁹Mi nye aduwa kamok ba. Sang kamok ánerawe kazatse ne mi ti nye aduwa na baꞌ, amma mi nye aduwa'me kamok áfe wan tá min no̱o̱k, kamok ba nye afuan.

¹⁰Koakye mi ta be cei nye ifuan, ne ike̱re̱ wan ta be cei nye inaan. Mi n se̱ kuyiik kamok ba.

¹¹Mi saase nufuan, mi tà ba sor nazatse na baba baꞌ. Amma ba ruresek kaye̱e̱r kazatse na nizham. Ada Azhe̱l'e, ku fek ba be riyerek wan rife̱ kukyem, riyerek riya wan tin no̱o̱k, nong ba tà sor azining kyo̱ndi mi ta se be wan.

¹²Nizen iya mi tá se be ba, mi tú ku fek ba, ne mi ni sak riye̱ ni ba be riyerek riya wan tin te'me. Akak wei baꞌ, ma ke azining kaye̱e̱r ba aya a tá te kpe̱de̱ng nong ase̱ a tá shining Kufumung Rife̱ Adakunom.

¹³“Mi saase nufuan kyo̱o̱rna. Amma mi ta nye izong ike̱re̱ na kum ne mi ruresek kaye̱e̱r kazatse, nong ase̱ ba tà shining be kuri riye̱ rikan riya mi tá be kaye̱e̱r ba.

¹⁴Mi mak no̱o̱k ba rife̱ wan yong kazatse tú raba ba, kamok ba nye áfe kazatse baꞌ, kyo̱ndi mi ta nye afe kazatse baꞌ.

¹⁵Sang i se ye mi nye aduwa'me ye wan ra ka tun ba kaye̱e̱r kazatse baꞌ, amma ye wan ru ku fek ba nubo̱k Amaan Aner.

¹⁶Ba nye afe kazatse baꞌ, kyo̱ndi mi ta nye afe kazatse baꞌ.

¹⁷Ku sak ba á tu sor zhe̱l be katsak, rife̱ wan ne rinye katsak.

¹⁸Kyo̱ndi wan tin tom kaye̱e̱r kazatse, anong ne mi ka tom ba kaye̱e̱r kazatse.

¹⁹Kamok ba ne mi no̱o̱k rice mi zhe̱l nong ase̱ ba gip ta se̱ kute zhe̱l kufe katsak.

²⁰“Aduwa mi se kamok awan ba tsek baꞌ Amma mi nye aduwa kamok áya a tanin no̱o̱k katsak ni mi gip, kamok rife̱ ba.

²¹Ada, aduwa mi se ye, ba ra te azining cice̱r, kyo̱ndi wan ta se azining be mi ne mi ma se azining be wan. Won ba gip á tu te azining be yir. Be anong ne kazatse tin no̱o̱k katsak ye wan ne i ti tom.

²²Mi ma ka no̱o̱k ba kuyiik afe wan tin no̱o̱k, nong ase̱ ba tà te azining kyo̱ndi yir ta se yir be wan.

²³Mi sor kaye̱e̱r ba ne wan kaye̱e̱r'i. Won ba tù gung rice dide̱ng, nong ase̱ kazatse tà ren ye wan ti tom, ne ka ren ye mi tú shim ba kyo̱ndi wan tin shim.

²⁴“Ada, mi shim áfe wan tá min no̱o̱k tu se mak be mi naro̱ kaya mi tu ku se, ne á di kuyiik'i, kuyiik kuya wan tin tiyiik mo kamok wan tin shim nizham a tá ra nye kazatse.

²⁵“Ada, Wan nye azhe̱l'e, kazatse tá ka ren baꞌ gye̱r tatan, amma mi tá ren. Á ren ye wan ne i ti tom.

²⁶Mi n sak ba tá ma ka ren, mi tà ya kasho̱o̱n be ku sak ba tà ka ren, nong ase̱ ba gip á tà se̱ kuri kushim kuya wan tin shim nong mi be rice mi gip ta se kaye̱e̱r ba.”