Read izere aYohana 18 Bible Online

aYohana 18 - izere bible

aYohana 18

¹Nama aYeso tá gang i nye aduwa'me, a dorok be álimazhiri wu nong á tá tar isho̱ng aKidiron. Riko̱ rikak tuse azong ri tá be nafar, ayong aYeso no̱ kaye̱e̱r'e be álimazhiri wu.

²aYahuza afe a tá sok aYeso a tá no̱o̱k ren karo̱'me kamok aYeso n me̱ ne a nyiis azong be álimazhiri wu.

³Ayong aYahuza sok ásozha whe̱re̱ ne áner aya a tá tor áko̱k kasho̱o̱n átsi ne áner aFarisi, nong á tá tseng azong. Á se be íro̱ng ne apitila ne ike̱re̱ itsom.

⁴aYeso tá ren ike̱ng iya i tana ku se̱ cei, ayong a wuruk nong a tá fe̱ be ba ye, “Yin tse̱r yin angan e̱?”

⁵Ayong á fe̱ be wu ye, “aYeso afu aNazaret.” Ne aYeso fe̱ be ba ye, “Mi na.” (aYahuza aya a tú ku sok a tá no̱o̱k se azong be ba.)

⁶Nizen iya aYeso tá fe̱ be ba ye, “Mi na.” Yong ánerawe'me tú bun amaama ma á kpas kaben.

⁷A bun a tu ku rip ba ye, “Angan ne yin tse̱r yin e̱?” Ayong ba fe̱ ye, “aYeso afu Nazaret.”

⁸Ayong aYeso fe̱ be ba ye, “Mi ta tak yin ye mi ne i nye wu ne̱. Ke yin ti tse̱r yin, to̱, won yin ánerawe na tá tseng.”

⁹A nye anong, nong ase̱ a tá shining rife̱ aYeso tá tsang a fe̱ ye, “Ánerawe áya wan tin no̱o̱k mi n wei be ko azining baꞌ.”

¹⁰aSiman Bitrus se be awe̱n itsor, ayong a whiir a tin te̱n kuto kufe riya ásam agbang atsi akak. (Riyerek asam'me nye aMakus.)

¹¹Amma aYeso fe̱ be aBitrus ye, “Kute itsor wan nubas wu. Mi ta so̱ ako̱p risam aya Ada tin no̱o̱k aꞌa?”

¹²Ayong rigwo̱m ásozha ne áko̱k kasho̱o̱n ba, ne áfe a tor agbang atsi áner aYahuda yiir aYeso'me nong á tú ku roos.

¹³Á tseng be wu nufe Anas ni ime̱se̱ng'e, a tá nye aman aKayafas agbang atsi riye̱ riyong.

¹⁴aKayafas'me ne a kun fe̱ be áner aYahuda ye i se gye̱r aner azining tana ku kamok ánerawe cei.

¹⁵Ayong aSiman Bitrus be akak kaye̱e̱r álimazhiri aYeso kuus aYeso nama, kamok alimazhiri ren agbang atsi'me, yong a no̱ mak be aYeso kaye̱e̱r azuri agbang atsi'me.

¹⁶Amma aBitrus nyeseng nufang nanukutu'me. Alimazhiri aya agbang atsi tú ku ren ame tú ku bun, a ta fe̱ be kanamang ka tá nye itomong azong ye a ra no̱ be aBitrus kaye̱e̱r'e.

¹⁷Kanamang ka ta se be kutor kanukutu'me rip aBitrus ye, “Katsak'e wan nye azining kaye̱e̱r álimazhiri aner na a'a?” Ne aBitrus fe̱ ye, “Wayo, mi nye akak baꞌ?”

¹⁸Karo̱ shirim. Ayong ásam be áfe a ta tor karo̱ kuya Adakunom iben, kas kuro̱ng nong a ta sen fok'e. aBitrus se nunyeseng azong mak be ba ni fok kuro̱ng'e.

¹⁹Ayong agbang atsi risim aYeso natoon álimazhiri wu be kubo̱so̱p wu tá nye.

²⁰aYeso fe̱ be wu ye, “Ei, mi fe̱ koakye ike̱ng kanang nasho̱o̱n koangan. Mi bun ibo̱so̱p ánerawe'me kaye̱e̱r atu aduwa ne kaye̱e̱r agbang kutu kuya Adakunom iben naro̱ kaya áner aYahuda tú ku nyiis cice̱r. Mi kun i fe̱ ike̱ng ikak ni nune̱re̱ng baꞌ.

²¹Kamok akye̱ ne wan ti nye kurip e̱? Rip áfe a tin foos, ba ren ike̱ng iya mi tú ku tas ba.”

²²aYeso tá fa fe̱ anong ne azining kaye̱e̱r áya a tá tor karo̱ kuya Adakunom iben'e ku barak kubo̱k nanyisi. Ne a fe̱ be wu ye, “Anong ne wan tá shiish agbang atsi'me a?”

²³aYeso fe̱ be wu ye, “Ke mi fe̱ ike̱ng ikak imaan'e, ne i fe̱ á ta fok. Amma ke katsak'e ne mi fe̱, akye̱ sak wan ti rus e̱?”

²⁴Ayong Anas tu bun be wu nufe aKayafas agbang atsi'me be aYeso nurosom.

²⁵aSiman Bitrus ta se be ifok kuro̱ng wu ame nunyeseng yong akak tú ku rip ye, “Katsak'e wan nye azining kaye̱e̱r álimazhiri wu ba a?” Ayong aBitrus ton'e, a tá fe̱ ye “Wayo, mi nye akak baꞌ.”

²⁶Asam agbang atsi akak a tá nye afuri aner aya aBitrus tá tsang a te̱n kuto wu ame fe̱ be wu ye, “Aser, mi tá di yin mak be wu riko̱ nafar aꞌa?”

²⁷Ayong aBitrus bun a ton'e gbak nizen iyong ne atso̱n kpaan ku te̱p.

²⁸Nadiding bop, aner aYahuda'me won kasa aKayafas nong á ta tseng be aYeso nasa aner a tá nye agwo̱mna aRom. Áner aYahuda'me gaar kuno̱ kaye̱e̱r azuri rigwo̱m'e ye iyong ta sak ba ta ba se zhe̱l baꞌ. Kamok ba shim á ta se ya naya aPasova.

²⁹Kamok anong, aBilatus wuruk nufang nong a tú ku se̱ ba ne a fe̱ be ba ye, “Yin be̱e̱n yin kukun akye̱ natoon aner na e̱?”

³⁰Ayong ba fe̱ ye, “A fa fe̱ ye aner na nye amaan ike̱ng baꞌ, ke yir be̱e̱n yir be wu aze baꞌ.”

³¹Ne aBilatus fe̱ be ba ye, “Tseng yin be wu be rice yin nong tú ku to̱ yin amok be itsi yin'e.” Amma áner aYahuda ame fe̱ ye, “A ti no̱o̱k yir iren ku te̱n akak amok riku baꞌ.”

³²I se anong, nong a tá shining ike̱ng aYeso tá tsang a fe̱, a tá fe̱ kuri riku wu tana ku.

³³Ayong aBilatus tú ku bun kaye̱e̱r azuri wu ne a yis aYeso nong a tú ku rip ye, “Wan ne i nye agwo̱m áfe aYahuda a?”

³⁴aYeso fe̱ be wu ye, “Kurip na nye kufuan ka ákak ne á tá tees e̱?”

³⁵aBilatus fe̱ be wu ye, “Mi nye afu Yahuda baꞌ. Ánerawe wan ne ágbang átsi ne á be̱e̱n be wan aze. Wan nye akye̱ e̱?”

³⁶Ayong aYeso fe̱ be wu ye, “Rigwo̱m'i nye rife̱ kazatse na baꞌ. A fa fe̱ ye ri nye rife̱ kazatse na ke áfe a tin nye itomong kon nong á ta te̱ne̱ng áner aYahuda ku ni yiir. Amma kyo̱o̱rna rigwo̱m mi se naro̱ kakak.”

³⁷Amma aBilatus fe̱ ye, “Aser, wan nye agwo̱m a?” aYeso fe̱ ye, “Wan ne wan fe̱ be kanu wan ye mi nye agwo̱m. Ike̱ng iya i tá sak a tin tes'ong, nong ta taas katsak'e. Koangan a ta nye afe katsak, shim kufoos kuto̱ mi.”

³⁸aBilatus fe̱ be wu ye, “Akye̱ nye katsak e̱?” Nama a tá fe̱ anong ne a bun a wuruk nufang gbak a tá be nufe áner aYahuda nong a tá fe̱ be ba ye, “Ko mi tu se̱ be rine̱n ike̱ng ikak baꞌ.

³⁹Amma i nye igo̱o̱n yin, mi tana ka no̱o̱k yin aner azining kaye̱e̱r afe a ta se ni itso̱m nizen aPasova. Yin shim yin a tá ka won yin agwo̱m áfe aYahuda a?”

⁴⁰Ayong á ta kuto̱ a tú ku shim'e ye, “Wayo wu baꞌ, yir shim yir ke wan won aBarabas.” (aBarabas'e nye agbang akpatang.)