Read izere aYohana 21 Bible Online

aYohana 21 - izere bible

aYohana 21

¹Nama anong, aYeso bun a ti wuruk na álimazhiri wu nukim agbang Kudung aTibariya. Be anong ne a tonong rice wu'me.

²aSiman Bitrus be aToma, a tú ku yis ye Kafe̱e̱s ne aNataniyel afe aKenan ni iben aGalili ne inoon aZabedi be álimazhiri akak ba afa se mak azong.

³Ayong aSiman Bitrus fe̱ ye, “Mi be ni iyising izos.” Ribir álimazhiri'me fe̱ ye, “Yir tà tseng yir be wan gip.” Ayong á wuruk á tá no̱ kaye̱e̱r kukpara ashi, amma á yiir ike̱ng ikak natuk'ong baꞌ.

⁴Kadiding tá fa karak, ne aYeso se nunyeseng nukim agbang kudung'e, amma álimazhiri'me ren ye aner'e nye aYeso baꞌ.

⁵Ayong aYeso fe̱ be ba ye, “Aro̱, yin yiir yin izos ko izining aꞌa?” Ayong ba fe̱ ye, “Wayo.”

⁶aYeso fe̱ be ba ye, “Barak yin agunung yin nabas kubo̱k riya, yin tà se̱ yin ikak azong.” Á tá fa nye anong ne á se̱ izos whe̱re̱ ma a kyem a ko̱ro̱k agunung'e kaye̱e̱r kukpara'me baꞌ kamok izos'e tá se whe̱r.

⁷Ne álimazhiri aya aYeso tá shim dide̱ng ame fe̱ be aBitrus ye, “Aner na nye Agwo̱m Ágwo̱m.” Kum aSiman Bitrus tá fa fok ye, “Aner'e nye Agwo̱m Ágwo̱m.” Ayong a wor bisik kukpiin wu a tá te, kamok a se ica'me nong a tá furuk a tá no̱ kaye̱e̱r ashi'me.

⁸Ribir álimazhiri'me tseng nukim kudung'e be kukpara ashi'me nong á tá ko̱k agunung á tan shining be izos ame. Kamok ba se gugo̱k be kukyim kudung'e baꞌ. I ta se kyo̱ndi amita iso̱k inyak.

⁹Nizen iya ba tá fa be̱ nukim kudung'e ne á di atse̱n kuro̱ng azong be izos natoon'e be abiredi.

¹⁰Ayong aYeso fe̱ be ba ye, “Be̱e̱n yin izos ikak yin tá yising yin kyo̱o̱rna.”

¹¹Ne aSiman Bitrus ngarak natoon kukpara ashi ame nong a ta ko̱k agunung'e nukim kudung'e. Agunung'e shining be agbang izos inyak kuso̱k inyak be iso̱k itoon be ataar (153). Amma be izos whe̱re̱'ong agunung'e sarak baꞌ.

¹²Ayong aYeso fe̱ be ba ye, “Be̱ tá te yin azhibi.” Alimazhiri wu akak kyem a tú ku rip ka wu nye angan e̱? baꞌ. Kamok ba tá ren aner'e nye Agwo̱m Ágwo̱m.

¹³Ayong aYeso tseng a ta se sok abiredi'me a tú ku no̱o̱k baꞌ, ne a bun a ku no̱o̱k ba izos'e gip.

¹⁴Iyu ne i nye ife ataar ne aYeso tosong rice wu nufe álimazhiri wu nama a tú ku dorok nure̱k.

¹⁵Nizen iya á tá gang iya azhibi ame, yong aYeso rip aSiman Bitrus ye, “aSiman igon aYohana, wan ti shim katsak ne i nar ribir áfudang wan a?” Ayong aBitrus fe̱ be wu ye, “Ei, aYeso, wan nye Agwo̱m Ágwo̱m, wan ren mi ka shim.” Yeso fe̱ be wu ye, “To̱, nyesek naban áturuk'i naya.”

¹⁶Ayong aYeso bun a fe̱ be wu ife afa ye, “aSiman igon aYohana, wan ti shim kushim kufe katsak a?” Ayong aBitrus bun a fe̱ ye “Ei, atekasa, wan ren mi ka shim.” aYeso fe̱ be wu ye, “Ni sak riye̱ ni ítsamang'i.”

¹⁷aYeso bun a tú ku rip kutak kufe ataar ye, “aSiman igon aYohana, wan ti shim a?” Ayong aBitrus nye riye̱ riwe kamok kurip kufe ataar aYeso tá bu a tú ku rip ye, “Wan ti shim be katsak a?” Ayong wu fe̱ ye, “Atekasa, Ei, wan ren koakye, wan ren mi tá shim.” aYeso fe̱ be wu ye “To̱, nyeseng ítsamang'i naya.

¹⁸Katsak'e ne mi tá ka tak, nizen iya wan tá ruresek acam, wan kyem i te rice wan ares ne i tseng koake̱ wan tá shim, amma izen iya ne wan kop, wan ta nabak ibo̱k nong akak ta ka te ares, ne a tseng be wan naro̱ kaya wan ta shim ta tseng baꞌ.”

¹⁹aYeso fe̱ anong, nong a ta tonong kuri riku aBitrus tana ku nong a tin tiyiik Adakunom. Nama rife̱ na, aYeso fe̱ be aBitrus ye, “Ni kuus!”

²⁰aBitrus kirik ne a di alimazhiri aya aYeso tá shim dide̱ng ame tá sen ku kuus ba. (Wu ne a nye alimazhiri aya a tin fereng na aYeso nizen iya ba tá sen ya naya aPasova ame. Wu ne a rip aYeso ye, “Atekasa, angan ne a tà ka sok a tà no̱o̱k e̱?”)

²¹aBitrus tú ku di. Ayong a rip aYeso ye, “Atekasa, aner ayu ane̱?”

²²Amma aYeso fe̱ be wu ye, “Ke mi tú ku shim be anong a ta sor be kutser ma izen iya mi tana bun i be̱, akye̱ wan azong e̱? Wan ni kuus tsek.”

²³Kamok anong, itak na te shaam kaye̱e̱r áfikuus aYeso ye alimazhiri ayong tà ku baꞌ. Sang aYeso fe̱ ye a won dar a ku ba'. Amma a fe̱ ye “Ke mi tú ku shim be anong, a ta sor be kutser ma izen iya mi tana bun i be̱, akye̱ wan azong e̱?”

²⁴Ayu ne a nye alimazhiri'me aya a ta sen fe̱ itak natoon ike̱re̱ na, ne a bun a te ni izibir. Yir ren yir ye rife̱ wu nye katsak.

²⁵Ike̱re̱ ikak dide̱ng iya aYeso tá nye, a fa nye ye a zibir cei, mi di ye ke kazatse be rice wu kyem ka sok afumung a tana zibir baꞌ.