Read izere aYohana 3 Bible Online

aYohana 3 - izere bible

aYohana 3

¹Aner akak tuse á tú ku yis ye, aNikodimus, akak kaye̱e̱r áko̱k kasho̱o̱n áner aYahuda, a tá se kaye̱e̱r kugung rice aFarisi.

²A tseng nufe aYeso natuk a tá fe̱ be wu ye, “Aner Kubo̱so̱p, yir ren yir ye wan nye aner kubo̱so̱p i ta ne nufe Adakunom. Kamok akak ta kyem a nye itomong azhing afe wan tá nye baꞌ, sang ke Adakunom se mak be wu baꞌ.”

³Ayong aYeso fe̱ be wu ye, “Katsak'e ne mi ta ka tak, akak kusa a ta kyem a no̱ kaye̱e̱r rigwo̱m Adakunom baꞌ, sang ke a bun a tu ku tes kutes dim ba'.”

⁴Ne aNikodimus ku rip ye, “Ane̱ ne a ta bun a tes anerawe aya a tan te asho̱n'e e̱? A ta san'e ane̱ a ta bun a no̱ nafa ango̱ wu nong a ta bun a tu ku tes kutes kufe afa e̱?”

⁵aYeso fe̱ be wu ye, “Katsak'e ne mi ta ka tak, sang ke a bun a tes anerawe be ashi ne Kabik baꞌ, a ta kyem a no̱ kaye̱e̱r rigwo̱m Adakunom baꞌ.

⁶Anerawe tes anerawe afudang, amma Kabik tes afe Kabik.

⁷Sang tu fok azhing be rife̱ mi ta fe̱ ye, ‘Ma ke a bun a ta ka tes yin baꞌ.’

⁸Kuwun fe̱se̱m ne ku tseng nabas aya ku ta shim wan ta fok nawor'e, amma wan ta kyem i ren karo̱ ku ta ne ka karo̱ ku tú ku be baꞌ. Anong ne i se be koangan afe a ta be kutes Kabik.”

⁹aNikodimus tú rip ye, “Iyu ta san ane̱ i ta nye e̱?”

¹⁰Ayong aYeso fe̱ be wu ye, “Wan nye aner akak'e kaye̱e̱r áfe kubo̱so̱p áner Isarela'me, wan ra kyem i ren iyu gip aꞌa?

¹¹Katsak'e ne mi ta ka tak, yir fe̱ yir natoon ike̱re̱ yir ta ren yir, ne iya yir ta di yir, gip be anong yin ti no̱o̱k yin katsak nike̱ng ife yir ta fe̱ yir baꞌ.

¹²Ke mi fe̱ be yin natoon ike̱re̱ kazatse yin ti no̱o̱k yin katsak rife̱ mi baꞌ, yong ane̱ ne yin tin no̱o̱k katsak ke mi fe̱ be yin natoon ike̱re̱ kaza e̱?

¹³Akak kun tseng naza baꞌ, ma ke aya a ta ne naza, wu ne a nye Igon Ánerawe.

¹⁴Kyo̱ndi aMusa tá sok iwhen naza kaye̱e̱r katse anong ne a tá sok Igon Anerawe naza dim.

¹⁵Nong koangan afe a tin no̱o̱k katsak ni wu tà se̱ kutser kufe izen izen.

¹⁶“Kamok kushim afe Adakunom ta shim kazatse dide̱ng, ma a no̱o̱k asuze̱r Igon wu, kamok koangan afe a tin no̱o̱k katsak ni wu, tà wei baꞌ, amma a ta se̱ kutser kufe izen izen.

¹⁷Kamok sang Adakunom tom Igon wu kaye̱e̱r kazatse nong a tà be̱ a to̱ kazatse amok baꞌ, amma nong kazatse tin se̱ kashesh ni wu.

¹⁸Koangan afe a tin no̱o̱k katsak ni wu, a tu ku to̱ amok baꞌ, amma aya a tin no̱o̱k katsak baꞌ, a mu ku to̱ amok kamok a tin no̱o̱k katsak riyerek asuze̱r Igon Adakunom baꞌ.

¹⁹Iyu ne i nye amok'e, akanang be̱ kaye̱e̱r kazatse, amma ánerawe raba akanang'e nong á ta shim awhi ingya, kamok kunye ba nye kumaan'e.

²⁰Koangan afe a ta nye imaan'e, a rawu akanang'e. A ta shim kube̱ na akanang'e baꞌ, fan kunye wu bu wuruk de̱s.

²¹Amma aya a ta nye katsak shim kube̱ na akanang nong a ta tonong kanang ye kunye wu ta nye Adakunom ne a tu se̱ mo.”

²²Nama anong, aYeso be álimazhiri wu tseng ni iben aYahudiya, a sor cie̱k azong be ba, ne a nye abatisma azong.

²³aYohana gip a se be i nye abatisma azong na Ainon bubarak be aSalim, kamok ashi tuse whe̱re̱ azong. Ánerawe yiir be̱s nufu nong á tu ku nye ba abatisma.

²⁴(Nizen iyong a tsang a te aYohana kaye̱e̱r itso̱m baꞌ.)

²⁵Iyong nanan dorok natite álimazhiri aYohana ne aner aYahuda akak natoon igo̱o̱n ku naka kusu nong á tá te zhe̱l.

²⁶Ayong álimazhiri'me tseng nufe aYohana, a tá fe̱ be wu ye, “Aner Kubo̱so̱p, aner aya yin tá se yin mak be wu nunyi isho̱ng aUrdun, aya wan tá fe̱ itak natoon wu ame, di aya a sen nye abatisma, ma koangan n tseng nufu.”

²⁷Ayong aYohana fe̱ be ba ye, “Anerawe ta kyem a se̱ ike̱ng be rice wu ba', sang ke a tú ku no̱o̱k natoon kaza ba'.

²⁸Yin be rice yin ta kyem i fe̱ yin ike̱ng iya mi tá fe̱ be yin ye, ‘Sang mi nye aKiristi baꞌ,’ amma a ti tom nasho̱o̱n wu.

²⁹Abining afas nye afe aner a tu ku sok. Afertseng wu kuus kama aner a ta sok abining afas'e tsek. Ne a nye riye̱ rikan ke a fok kuto̱ aner a tá sok abining afas'e. Be anong ne riye̱ rikan'i ma shining.

³⁰Ma wu te garang dim, ne mi te hiir.”

³¹“Aya a ta ne naza nar koangan. Koangan afa a ta kaye̱e̱r kazatse nye afe kazatse'me, ne a fe̱ rife̱ ike̱re̱ kazatse'me. Aya a ta ne kaye̱e̱r kaza nar koangan cice̱r.

³²Ike̱re̱ iya wu ta di ne a fok ne wu fe̱ natoon'e, gip be anong ko akak shan rife̱ wu baꞌ.

³³Amma aner aya a ta shan rife̱ wu tonong ye Adakunom nye katsak.

³⁴Kamok aya Adakunom ta tom fe̱ rife̱ Adakunom, kamok Adakunom tu ku no̱o̱k Kabik wu dar igak.

³⁵Atek'e shim Igon wu, ayong a sak koakye nubo̱k wu.

³⁶Koangan ne a tin no̱o̱k katsak ni Igon'e, a be kutser kufe izen izen. Amma afe a ta rawu Igon'e, a tà se̱ kutser'ong baꞌ, kamok riye̱ kubeseng Adakunom se rice wu.”