Read izere aYohana 4 Bible Online

aYohana 4 - izere bible

aYohana 4

¹Izen iya áner aFarisi tá fok ye aYeso se̱s álimazhiri ne a kunye ba abatisma ne a nar aYohana,

²(Amma sang aYeso'me be rice wu ne a nye abatisma'me baꞌ, álimazhiri wu ne á nye)

³aYeso tá fa fok itak'e ayong a won kaben aYahudiya nong a tú ku bun na aGalili.

⁴I tú ku sor adole, a gor kaben aSamariya.

⁵Ayong a be̱ kaye̱e̱r kuwo̱p kukak na aSamariya a tá yis ye aSakar. Kuwo̱p'e se bubarak be riko̱ rikak aYakub tá no̱o̱k igon wu aYusufu gbugbang.

⁶Azong ne ribong ashi aYakub. aYeso tá fa ro̱n be kutseng, ayong a sonong azong nanu ribong'e. Iyu se nabas katite kunom.

⁷Nizen iya abafe aSamariya akak tá be̱ kuto̱k ashi. aYeso fe̱ be wu ye, “Ni nang ashi ta so̱.”

⁸(Álimazhiri wu tsang á be kaye̱e̱r kuwo̱p ni ishan naya.)

⁹Abafe aSamariya ame fe̱ be wu ye, “Wan nye afu Yahuda ne mi nye abafe aSamariya, akye̱ sak wan tin rip ashi e̱”? (Kamok ike̱ng ikak gung áner aYahuda be afe aSamariya baꞌ.)

¹⁰aYeso tú shim'me ye, “Ke a fa fe̱ ye wan ren kunang Adakunom ne aya a ta ka rip ashi na, ke wan tú ku rip, a ta ka no̱o̱k ashi aya a tà no̱o̱k kutser.”

¹¹Ne abining ame fe̱ ye, “Atekasa, wan be ike̱ng ikak nong tin korok ashi'me baꞌ, ribong'e se tsik. Iyong wan ta se̱ ashi kutser'ong ake̱ e̱?

¹²Wan nar ada yir aYakub'a aya a tin won yir ribong na a? Wu be inoon wu ne ike̱re̱ kasa wu so̱ ashi aze gip.”

¹³aYeso tu shim'me ye, “Koangan ne a so̱ ashi na, a ta bun a fok kuto̱ kukoor gbak,

¹⁴amma koangan ne a so̱ ashi mi tana ku no̱o̱k a tà ba fok kuto̱ kukoor baꞌ. Ashi mi tana ku no̱o̱k ta sor itop ashi kuro̱m wu, ife i tana ku no̱o̱k kutser kufe izen izen.”

¹⁵Abining ame fe̱ be wu ye, “Atekasa, ni no̱o̱k ashi na nong mi ta ba fok kuto̱ kukoor baꞌ, nong ta ba be̱ ma aze ni ito̱k ashi baꞌ.”

¹⁶Ne aYeso fe̱ be wu ye, “Tseng yis amitek wan ta be̱ yin aze.”

¹⁷Abining ame fe̱ ye, “Mi be amitek baꞌ.” Iyong aYeso fe̱ be wu ye, “Wan fe̱ gye̱r, wan ta fe̱ ye wan be amitek baꞌ.

¹⁸Katsak'e nye, wan kun nye kuwe̱ne̱ng be atek atoon, aner wan ta se be wu kyo̱o̱rna nye amitek wan baꞌ, ike̱ng wan ta fe̱'ong nye katsak.”

¹⁹Ne abining ame fe̱ ye, “Atekasa, mi di wan nye aner kuzarap Adakunom.

²⁰Atukop yir ya Adakunom iben aze nawhanang na, amma yin afe Yahuda fe̱ yin ye ma a ra ya Adakunom iben na aUshalima dim.”

²¹Ne aYeso fe̱ be wu ye, “Ni no̱o̱k katsak ni mi, aner abining, izen saase ife yin tana ya yin Ada'me iben nawhanang na ka na aUshalima baꞌ.

²²Yin áfe aSamariya, yin ya yin ike̱ng ife yin tu ku ren yin baꞌ iben, amma yir ya yir aner afe yir ta ren yir iben, kamok kashesh na ne nufe afe aYahuda.

²³Amma izen saase, n nye, ife áfe kuya Adakunom iben kaye̱e̱r katsak tana ya Ada'me kaye̱e̱r kabik be katsak, kamok ba ne á nye kuri aya afe Ada'me ta tse̱r.

²⁴Adakunom nye kabik, áfe a tana ku ya iben ru ku ya'me kaye̱e̱r kabik be katsak dim.”

²⁵Ne abining'e fe̱ be aYeso ye, “Mi ren ye áfe Adakunom ta kasa, a tu ku yis ye aKiristi saase. Izen iya ne a be̱ a tin taas yir koakye ike̱ng.”

²⁶Iyong aYeso fe̱ be wu ye, “Mi afe i ta sen fe̱ be wan, mi ne i nye wu.”

²⁷Nizen'ong álimazhiri wu be̱ á tu se̱, á fok azhing á tu ku se̱ a ta sen fe̱ be aner abining, amma akak ba tu rip ye, “Wan tse̱r akye̱ e̱?” baꞌ. Ka a ta rip aYeso ye, “Akye̱ ne wan sen fe̱'me be wu e̱?” baꞌ.

²⁸Ne abining ame won kafeneng ashi wu nong a tu ku bun kaye̱e̱r kuwo̱p, ne a fe̱ be ánerawe ye,

²⁹“Be̱ ta di yin aner akak a ti tak koakye ike̱ng mi ta kun nye. Ka wu ne a nye aKiristi ame e̱?”

³⁰Iyong á wuruk kaye̱e̱r kuwo̱p ame nong á ta be̱ nufe aYeso.

³¹Natoon anong álimazhiri aYeso tu nye akusuk ye, “Aner kubo̱so̱p, ya naya.”

³²Amma aYeso fe̱ be ba ye, “Mi be naya kuya nafe yin ta ren yin ike̱ng ikak natoon'e baꞌ.”

³³Iyong álimazhiri wu san i naka risim ace ba ye, “Ka aner akak mu ku be̱e̱n naya e̱?”

³⁴Ne aYeso fe̱ be ba ye, “Naya mi nye tu nye ike̱ng wu aya a tin tom ta shim ne i gang itomong wu.

³⁵Yin fe̱ yin ye, ‘Ishamang a tu won ife̱n inaas aꞌa?’ Mi ta tak yin ye, ye̱re̱k yin ta di yin ako̱! Naya nbeen, na n te nafe kutusung.

³⁶Kyo̱o̱rna aner kutusung'e se̱ ishorong wu, a tusung kamok kutser kufe izen izen, nong ase̱ aner afe a ta tuus ne afe a ta tusung ta nye riye̱ rikan mak.

³⁷Be anong ne kumaas na te katsak a ta fe̱ ye, ‘Akak tuus ne akak tse̱k.’

³⁸Mi tá tom yin ta se tusung yin ike̱ng iya sang yin tá nye yin itomong'e baꞌ, ákak so̱ risam ni itomong'e dide̱ng ne yin ya yin ibo̱k ba.”

³⁹Áner aSamariya whe̱re̱ ti no̱o̱k katsak na aYeso kamok ike̱re̱ abining'e tá fe̱ be ba ye, “A min taas ike̱re̱ afe mi ta kun nye cei.”

⁴⁰Iyong izen áfe aSamariya ame tá be̱ nufu, ba tu nye izong ye a ra sor be ba, yong aYeso sor be ba inom ifa.

⁴¹Kamok rife̱ wu, ánerawe whe̱re̱ ti no̱o̱k katsak na aYeso.

⁴²Iyong ba fe̱ be abining ame ye, “Yir ti no̱o̱k yir katsak, kyo̱o̱rna sang kamok ike̱ng wan tá fe̱ tsek baꞌ, amma yir tu ku fok yir be rice yir, ye aner na nye aner kashesh kazatse be katsak.”

⁴³Nama a tá sor inom ifa azong, aYeso be na aGalili.

⁴⁴(Kamok aYeso be rice wu tsang a fe̱ ye, “Aner kuzarap be kuyiik nuwo̱p wu baꞌ.”)

⁴⁵Nizen a tá no̱ na aGalili, áner aGalili tu shan niren kamok ba tsang á di cei ike̱re̱ ife wu tá nye na aUshalima nizen aPasova, kamok ba gip a se azong.

⁴⁶Iyong aYeso bun a tseng na aKana niben aGalili, naro̱ wu ta kirik ashi a ta te ashi anap. Afe itomong rigwo̱m akak tu se azong na aKapanum aya igon wu ta nye katser baꞌ.

⁴⁷Nizen aner na ta fok ye aYeso ne na aYahuda, a mu ku bun na aGalili, a tseng nufu nong a tu ku nye izong ye a ra be̱ nong a ta se sak igon wu kaya ka tan te kyo̱ndi ka ta ku tà te katser.

⁴⁸aYeso fe̱ be wu ye, “Sang ke yin di yin ike̱re̱ i tana tonong ne itomong azhing baꞌ, yin ti no̱o̱k yin katsak natoon'i baꞌ.”

⁴⁹Ne aner itomong rigwo̱m ame fe̱ ye, “Atekasa, be̱ i tseng yir nizham fan igon'i bu ku.”

⁵⁰aYeso fe̱ be wu ye, “Tseng tsek. Igon wan tà te katser.” Aner ame fok rife̱ aYeso yong a tseng.

⁵¹Kum ne a ruresek niren, ásam wu nyim be wu be itak ye ariwu n te atser.

⁵²A tú rip ba ye, “Akye̱ izen ne igon'e te katser e̱?” Ba ye, “Kuro̱m'e tu won nure nabas itso̱m izining nunom.”

⁵³Iyong atek igon'e yiring ye, izen'e yong dim ne aYeso fe̱ be wu ye, “Igon wan tà te katser.” Wu be áfekari wu cice̱r no̱o̱k katsak na aYeso.

⁵⁴Iyu ne i nye ike̱ng azhing ife afa aYeso tá nye nizen a tá ne na aYahuda, a ta be na aGalili.