Read izere aYohana 5 Bible Online

aYohana 5 - izere bible

aYohana 5

¹Nama anong, aYeso tseng na aUshalima kamok riye̱ rikan igo̱o̱n aner aYahuda.

²To̱, na aUshalima'me kudung ku ka tuse a tá gorok be abur atoon. A yis karo̱'me nirem aYahuda ye aBatseda. Kudung na se bubarak be kanukutu a ta yis ye Iren izha.

³Azong kaye̱e̱r abur'e ne áfe iro̱k mereng, ákpato̱o̱n be ákparo̱ng ne áfe a ta we̱ abas azining.

⁴Be anong ne ba tor a ta be̱ a buruk ashi. Kamok nizen ikak amaleka man ne a tiik nong a ta be̱ buruk ashi'me. Kum aner aya afe a ta san i no̱ nashi'me, nama a tan buruk, ne a wor a te atser kaye̱e̱r kuro̱k wu.

⁵Azong aner akak tu se a tan te aye̱ iso̱k itaar be ikara be kuro̱k.

⁶Nizen aYeso tu ku di nameneng'e a ren ye aner'e n sor gaan be kuro̱k'e, yong a tu rip ye, “Wan shim ta te atser a?”

⁷Ne aner kuro̱k ame fe̱ ye, “Atekasa, mi be akak afe a tanin se̱ mo nong ta no̱ nudung'e nizen iya ne a be̱ a buruk ashi'me baꞌ. Izen iya ne mi tse̱r ta no̱ ne akak no̱ nasho̱o̱n'i.”

⁸Iyong aYeso fe̱ be wu ye, “Dorok! Sok ike̱re̱ kameneng wan ta tseng.”

⁹Aner ame wor a te atser. A sok ike̱re̱ kameneng wu a ta tseng. A nye ike̱re̱'ong katuk Asabar.

¹⁰Iyong afu Yahuda fe̱ be aner a tá te atser ame ye, “Katuur nye Asabar, Itsi ta roon i sok ike̱ng kameneng wan.”

¹¹Amma aner ame fe̱ ye, “Aner a tá sak mi ta te atser, fe̱ be mi ye i ra sok ike̱ng kameneng'e ta tseng.”

¹²Iyong á tu rip ye, “Angan ne a fe̱ be wan ye i ri sok ike̱ng kameneng wan nong ta tseng'e e̱?”

¹³Aner a tá te atser'e, ren aner a tá sak wu tá te atser'e baꞌ, kamok aYeso tsang a no̱ kaye̱e̱r rigwo̱m ánerawe'me.

¹⁴Nama izen cie̱k aYeso su ku se̱ kaye̱e̱r agbang kutu kuya Adakunom iben, ne a fe̱ be wu ye, “Di wan te atser kyo̱o̱rna, won kunye rine̱n fan ike̱ng ikak iya i ta nar iyong imaan'e ba ka se̱.”

¹⁵Iyong aner ame tseng nong a tá se tak áko̱k kasho̱o̱n aner aYahuda ye aYeso ne a sak wu ta te atser.

¹⁶Kamok aYeso tá nye ike̱re̱ na katuk Asabar, áner aYahuda tu tabak.

¹⁷aYeso fe̱ be ba ye, “Ada mi se kaye̱e̱r itomong wu koakye izen, mi gip mi se be itomong'i.”

¹⁸Kamok anong áner aYahuda tse̱r iren kufe̱r aYeso, sang kamok a tá shorop itsi kunom Asabar tsek baꞌ, amma a yis Adakunom ye ada wu, ne a sok rice wu tite̱re̱ be Adakunom.

¹⁹Iyong aYeso tú shim ba'me ye, “Katsak'e ne mi ta ka tak yin, Igon'e nye ike̱ng ikak be rice wu baꞌ, a nye ike̱ng ife wu ta di Ada wu ta nye tsek, kamok ike̱ng ife Ada'me ta nye ne Igon'e nye gip.

²⁰Kamok Ada'me shim Igon'e, ne a ku tosong ike̱re̱ ife wu ta nye cei. A tu ku tosong ike̱re̱ igbang'e iya i ta nar iyu ma a ta ka te yin zhing.

²¹Kyo̱ndi Ada'me ta dorok áya a tan kus ne a ka no̱o̱k ba kutser, anong ne Igon'e nyesek aya riye̱ wu ta shim kutser.

²²Ada'me to̱ akak amok baꞌ, amma an won Igon'e kuto̱ amok'e cei,

²³nong ase̱ ánerawe cice̱r tà tiyiik Igon'e kyo̱ndi ba tá tiyiik Ada'me.

²⁴“Katsak'e, mi ta ka tak yin, koangan ne a ta fok rife̱ mi, ne a ni no̱o̱k katsak ni wu aya a tin tom, a be kutser kufe izen izen. A tu ku to̱ amok baꞌ, kamok an wher riku a ta se̱ kutser.

²⁵Katsak'e, mi ta ka tak yin, izen saase, n nye gip ma iya áya a tan kus tana fok kuto̱ Igon Adakunom, áya a tana fok ta se̱ kutser.

²⁶Kyo̱ndi Ada'me ta nye iren kutser, anong ne a sak Igon wu ta sor iren kutser.

²⁷Ne a ku no̱o̱k iren kuto̱ amok, kamok wu ta nye Igon Anerawe.

²⁸“Sang tu te yin zhing be iyu baꞌ, kamok izen saase iya cei áya a ta se nure̱k ta fok kuto̱ wu,

²⁹ne á wuruk, áya a tá nye kunye kutek tà dorok be kutser, ne áya a tá nye kunye kumaan'e ta dorok nong a tú ku to̱ ba amok.

³⁰Mi kyem i nye ike̱ng ikak be rice mi ze̱r baꞌ. Mi to̱ amok'i kyo̱ndi Adakunom tin tak ye i ra nye. Kamok anong amok'i nye afe katsak, kamok mi nye ike̱ng mi ta shim tsek baꞌ, amma ife aya a tin tom.

³¹“Ke mi fe̱ rife̱ natoon rice mi, to̱, i nye ye rife̱'me yong nye katsak baꞌ.

³²Amma akak kuse a ta fe̱ rife̱ natoon'i, mi ren ike̱ng ife wu ta sen fe̱'me natoon'i nye katsak.

³³“Yin tom yin nufe aYohana, wu tá tak yin katsak'e.

³⁴Sang i se ye mi shim anerawe ta fe̱ natoon'i baꞌ. Amma mi fe̱ anong, nong yin tà se̱ yin kashesh.

³⁵aYohana se kyo̱ndi apitila aya a tá ya, a tá se kanang, yin ti nye yin riye̱ rikan be akanang wu nizen cie̱k.

³⁶“Mi be ayiik rife̱ natoon'i rife̱ i ta nar rife̱ aYohana, kamok itomong iya Ada tin no̱o̱k ye i ra gang, iyong ne mi sen nye'me ne i fe̱ ye, Ada ti tom.

³⁷Ada'me afe a tin tom'e, fe̱ natoon'i, yin kun fok yin kuto̱ wu ka yin kun ku di yin baꞌ.

³⁸Rife̱ wu kuse naye̱ yin baꞌ, kamok yin ti no̱o̱k yin katsak naya wu ta tom baꞌ.

³⁹Yin yiir bo̱so̱p yin Afumung rife̱ Adakunom, kamok yin di yin ye yin tà se̱ yin kutser kufe izen izen kaye̱e̱r ba. Ba fe̱ rife̱ natoon'i.

⁴⁰Gip be anong, yin gaar yin kube̱ nunaan nong tà se̱ yin kutser.

⁴¹“Mi tse̱r nakerek nufe ánerawe baꞌ.

⁴²Amma mi ta ren yin, yin be yin kushim Adakunom naye̱ yin baꞌ.

⁴³Mi be̱ riyerek Ada mi, amma yin ti shan yin baꞌ, amma ke akak be̱ kube̱ rice wu, ne yin ku shan yin.

⁴⁴Ane̱ ne yin tà no̱o̱k yin katsak'e, yin ta tse̱r yin nakerek nufe ánerawe, amma sang i tse̱r yin nakerek nufe Adakunom wu ze̱e̱r baꞌ e̱?

⁴⁵“Amma tu di yin ye mi tà tseng kukun yin nufe Ada mi baꞌ. Aner amok yin nye aMusa, aya yin tin te yin riye̱.

⁴⁶Ke a fa nye ye yin tin no̱o̱k yin katsak na aMusa ke yin tin no̱o̱k yin katsak ni mi, kamok wu zibir natoon'i.

⁴⁷Amma kum yin tin no̱o̱k yin katsak nike̱ng wu ta zibir baꞌ, ane̱ ne yin tin no̱o̱k yin katsak nike̱ng mi ta fe̱ e̱?”